૯. દીપવિમાનવત્થુ

૭૫. ‘‘અભિક્કન્તેન વણ્ણેન, યા ત્વં તિટ્ઠસિ દેવતે;

ઓભાસેન્તી દિસા સબ્બા, ઓસધી વિય તારકા.

૭૬. ‘‘કેન તેતાદિસો વણ્ણો, કેન તે ઇધ મિજ્ઝતિ;

ઉપ્પજ્જન્તિ ચ તે ભોગા, યે કેચિ મનસો પિયા.

૭૭. ‘‘કેન ત્વં વિમલોભાસા, અતિરોચસિ દેવતા [દેવતે (બહૂસુ) ૮૩ વિસ્સજ્જનગાથાય સંસન્દેતબ્બં];

કેન તે સબ્બગત્તેહિ, સબ્બા ઓભાસતે દિસા.

૭૮. ‘‘પુચ્છામિ તં દેવિ મહાનુભાવે, મનુસ્સભૂતા કિમકાસિ પુઞ્ઞં;

કેનાસિ એવં જલિતાનુભાવા, વણ્ણો ચ તે સબ્બદિસા પભાસતી’’તિ.

૭૯. સા દેવતા અત્તમના, મોગ્ગલ્લાનેન પુચ્છિતા;

પઞ્હં પુટ્ઠા વિયાકાસિ, યસ્સ કમ્મસ્સિદં ફલં.

૮૦. ‘‘અહં મનુસ્સેસુ મનુસ્સભૂતા, પુરિમાય જાતિયા મનુસ્સલોકે;

તમન્ધકારમ્હિ તિમીસિકાયં, પદીપકાલમ્હિ અદાસિ દીપં [અદં પદીપં (સી. સ્યા. પી.)].

૮૧. ‘‘યો અન્ધકારમ્હિ તિમીસિકાયં, પદીપકાલમ્હિ દદાતિ દીપં;

ઉપ્પજ્જતિ જોતિરસં વિમાનં, પહૂતમલ્યં બહુપુણ્ડરીકં.

૮૨. ‘‘તેન મેતાદિસો વણ્ણો, તેન મે ઇધ મિજ્ઝતિ;

ઉપ્પજ્જન્તિ ચ મે ભોગા, યે કેચિ મનસો પિયા.

૮૩. ‘‘તેનાહં વિમલોભાસા, અતિરોચામિ દેવતા;

તેન મે સબ્બગત્તેહિ, સબ્બા ઓભાસતે દિસા.

૮૪. ‘‘અક્ખામિ તે ભિક્ખુ મહાનુભાવ, મનુસ્સભૂતા યમકાસિ પુઞ્ઞં;

તેનમ્હિ એવં જલિતાનુભાવા, વણ્ણો ચ મે સબ્બદિસા પભાસતી’’તિ.

દીપવિમાનં નવમં.