૫. કુઞ્જરવિમાનવત્થુ

૩૧. ‘‘કુઞ્જરો તે વરારોહો, નાનારતનકપ્પનો;

રુચિરો થામવા જવસમ્પન્નો, આકાસમ્હિ સમીહતિ.

૩૨. ‘‘પદુમિ પદ્મ [પદુમ… (સી. સ્યા.) એવમુપરિપિ] પત્તક્ખિ, પદ્મુપ્પલજુતિન્ધરો;

પદ્મચુણ્ણાભિકિણ્ણઙ્ગો, સોણ્ણપોક્ખરમાલધા [… માલવા (સી. સ્યા.)].

૩૩. ‘‘પદુમાનુસટં મગ્ગં, પદ્મપત્તવિભૂસિતં.

ઠિતં વગ્ગુમનુગ્ઘાતી, મિતં ગચ્છતિ વારણો.

૩૪. ‘‘તસ્સ પક્કમમાનસ્સ, સોણ્ણકંસા રતિસ્સરા;

તેસં સુય્યતિ નિગ્ઘોસો, તુરિયે પઞ્ચઙ્ગિકે યથા.

૩૫. ‘‘તસ્સ નાગસ્સ ખન્ધમ્હિ, સુચિવત્થા અલઙ્કતા;

મહન્તં અચ્છરાસઙ્ઘં, વણ્ણેન અતિરોચસિ.

૩૬. ‘‘દાનસ્સ તે ઇદં ફલં, અથો સીલસ્સ વા પન;

અથો અઞ્જલિકમ્મસ્સ, તં મે અક્ખાહિ પુચ્છિતા’’તિ;

૩૭. સા દેવતા અત્તમના, મોગ્ગલ્લાનેન પુચ્છિતા;

પઞ્હં પુટ્ઠા વિયાકાસિ, યસ્સ કમ્મસ્સિદં ફલં.

૩૮. ‘‘દિસ્વાન ગુણસમ્પન્નં, ઝાયિં ઝાનરતં સતં;

અદાસિં પુપ્ફાભિકિણ્ણં, આસનં દુસ્સસન્થતં.

૩૯. ‘‘ઉપડ્ઢં પદ્મમાલાહં, આસનસ્સ સમન્તતો;

અબ્ભોકિરિસ્સં પત્તેહિ, પસન્ના સેહિ પાણિભિ.

૪૦. ‘‘તસ્સ કમ્મકુસલસ્સ [કમ્મસ્સ કુસલસ્સ (સી. પી.)], ઇદં મે ઈદિસં ફલં;

સક્કારો ગરુકારો ચ, દેવાનં અપચિતા અહં.

૪૧. ‘‘યો વે સમ્માવિમુત્તાનં, સન્તાનં બ્રહ્મચારિનં;

પસન્નો આસનં દજ્જા, એવં નન્દે યથા અહં.

૪૨. ‘‘તસ્મા હિ અત્તકામેન [અત્થકામેન (ક.)], મહત્તમભિકઙ્ખતા;

આસનં દાતબ્બં હોતિ, સરીરન્તિમધારિન’’ન્તિ.

કુઞ્જરવિમાનં પઞ્ચમં.