૧૭. કેસકારીવિમાનવત્થુ

૧૫૦. ‘‘ઇદં વિમાનં રુચિરં પભસ્સરં, વેળુરિયથમ્ભં સતતં સુનિમ્મિતં;

સુવણ્ણરુક્ખેહિ સમન્તમોત્થતં, ઠાનં મમં કમ્મવિપાકસમ્ભવં.

૧૫૧. ‘‘તત્રૂપપન્ના પુરિમચ્છરા ઇમા, સતં સહસ્સાનિ સકેન કમ્મુના;

તુવંસિ અજ્ઝુપગતા યસસ્સિની, ઓભાસયં તિટ્ઠસિ પુબ્બદેવતા.

૧૫૨. ‘‘સસી અધિગ્ગય્હ યથા વિરોચતિ, નક્ખત્તરાજારિવ તારકાગણં;

તથેવ ત્વં અચ્છરાસઙ્ગણં [અચ્છરાસઙ્ગમં (સી.)] ઇમં, દદ્દલ્લમાના યસસા વિરોચસિ.

૧૫૩. ‘‘કુતો નુ આગમ્મ અનોમદસ્સને, ઉપપન્ના ત્વં ભવનં મમં ઇદં;

બ્રહ્મંવ દેવા તિદસા સહિન્દકા, સબ્બે ન તપ્પામસે દસ્સનેન ત’’ન્તિ.

૧૫૪. ‘‘યમેતં સક્ક અનુપુચ્છસે મમં, ‘કુતો ચુતા ત્વં ઇધ આગતા’તિ [કુતો ચુતા ઇધ આગતા તુવં (સ્યા.), કુતો ચુતાય આગતિ તવ (પી.)];

બારાણસી નામ પુરત્થિ કાસિનં, તત્થ અહોસિં પુરે કેસકારિકા.

૧૫૫. ‘‘બુદ્ધે ચ ધમ્મે ચ પસન્નમાનસા, સઙ્ઘે ચ એકન્તગતા અસંસયા;

અખણ્ડસિક્ખાપદા આગતપ્ફલા, સમ્બોધિધમ્મે નિયતા અનામયા’’તિ.

૧૫૬. ‘‘તન્ત્યાભિનન્દામસે સ્વાગતઞ્ચ [સાગતઞ્ચ (સી.)] તે, ધમ્મેન ચ ત્વં યસસા વિરોચસિ;

બુદ્ધે ચ ધમ્મે ચ પસન્નમાનસે, સઙ્ઘે ચ એકન્તગતે અસંસયે;

અખણ્ડસિક્ખાપદે આગતપ્ફલે, સમ્બોધિધમ્મે નિયતે અનામયે’’તિ.

કેસકારીવિમાનં સત્તરસમં.

પીઠવગ્ગો પઠમો નિટ્ઠિતો.

તસ્સુદ્દાનં –

પઞ્ચ પીઠા તયો નાવા, દીપતિલદક્ખિણા દ્વે;

પતિ દ્વે સુણિસા ઉત્તરા, સિરિમા કેસકારિકા;

વગ્ગો તેન પવુચ્ચતીતિ.