૧૫. ઉત્તરાવિમાનવત્થુ

૧૨૪. ‘‘અભિક્કન્તેન વણ્ણેન, યા ત્વં તિટ્ઠસિ દેવતે;

ઓભાસેન્તી દિસા સબ્બા, ઓસધી વિય તારકા.

૧૨૫. ‘‘કેન તેતાદિસો વણ્ણો, કેન તે ઇધ મિજ્ઝતિ;

ઉપ્પજ્જન્તિ ચ તે ભોગા, યે કેચિ મનસો પિયા.

૧૨૬. ‘‘પુચ્છામિ તં દેવિ મહાનુભાવે, મનુસ્સભૂતા કિમકાસિ પુઞ્ઞં;

કેનાસિ એવં જલિતાનુભાવા, વણ્ણો ચ તે સબ્બદિસા પભાસતી’’તિ.

૧૨૭. સા દેવતા અત્તમના, મોગ્ગલ્લાનેન પુચ્છિતા;

પઞ્હં પુટ્ઠા વિયાકાસિ, યસ્સ કમ્મસ્સિદં ફલં.

૧૨૮. ‘‘ઇસ્સા ચ મચ્છેરમથો [મચ્છરિયમથો ચ (ક.)] પળાસો, નાહોસિ મય્હં ઘરમાવસન્તિયા;

અક્કોધના ભત્તુવસાનુવત્તિની, ઉપોસથે નિચ્ચહમપ્પમત્તા.

૧૨૯. ‘‘ચાતુદ્દસિં પઞ્ચદસિં, યા ચ [યાવ (સી. અટ્ઠ., ક. અટ્ઠ.) થેરીગાથાઅટ્ઠકથા પસ્સિતબ્બા] પક્ખસ્સ અટ્ઠમી;

પાટિહારિયપક્ખઞ્ચ, અટ્ઠઙ્ગસુસમાગતં.

૧૩૦. ‘‘ઉપોસથં ઉપવસિસ્સં, સદા સીલેસુ સંવુતા;

સઞ્ઞમા સંવિભાગા ચ, વિમાનં આવસામહં [આવસામિમં (સી. અટ્ઠ., ક.) પરતો પન સબ્બત્થપિ ‘‘આવસામહં’’ ઇચ્ચેવ દિસ્સતિ].

૧૩૧. ‘‘પાણાતિપાતા વિરતા, મુસાવાદા ચ સઞ્ઞતા;

થેય્યા ચ અતિચારા ચ, મજ્જપાના ચ આરકા [આરતા (?)].

૧૩૨. ‘‘પઞ્ચસિક્ખાપદે રતા, અરિયસચ્ચાન કોવિદા;

ઉપાસિકા ચક્ખુમતો, ગોતમસ્સ યસસ્સિનો.

૧૩૩. ‘‘સાહં સકેન સીલેન, યસસા ચ યસસ્સિની;

અનુભોમિ સકં પુઞ્ઞં, સુખિતા ચમ્હિનામયા.

૧૩૪. ‘‘તેન મેતાદિસો વણ્ણો, તેન મે ઇધ મિજ્ઝતિ;

ઉપ્પજ્જન્તિ ચ મે ભોગા, યે કેચિ મનસો પિયા.

૧૩૫. ‘‘અક્ખામિ તે ભિક્ખુ મહાનુભાવ, મનુસ્સભૂતા યમહં અકાસિં;

તેનમ્હિ એવં જલિતાનુભાવા, વણ્ણો ચ મે સબ્બદિસા પભાસતીતિ.

૧૩૬. ‘‘મમ ચ, ભન્તે, વચનેન ભગવતો પાદે સિરસા વન્દેય્યાસિ – ‘ઉત્તરા નામ, ભન્તે, ઉપાસિકા ભગવતો પાદે સિરસા વન્દતી’તિ. અનચ્છરિયં ખો પનેતં, ભન્તે, યં મં ભગવા અઞ્ઞતરસ્મિં સામઞ્ઞફલે બ્યાકરેય્ય [બ્યાકરેય્યાતિ (?)], તં ભગવા સકદાગામિફલે બ્યાકાસી’’તિ.

ઉત્તરાવિમાનં પન્નરસમં.