૧૨. દુતિયપતિબ્બતાવિમાનવત્થુ

૧૦૧. ‘‘વેળુરિયથમ્ભં રુચિરં પભસ્સરં, વિમાનમારુય્હ અનેકચિત્તં;

તત્થચ્છસિ દેવિ મહાનુભાવે, ઉચ્ચાવચા ઇદ્ધિ વિકુબ્બમાના;

ઇમા ચ તે અચ્છરાયો સમન્તતો, નચ્ચન્તિ ગાયન્તિ પમોદયન્તિ ચ.

૧૦૨. ‘‘દેવિદ્ધિપત્તાસિ મહાનુભાવે, મનુસ્સભૂતા કિમકાસિ પુઞ્ઞં;

કેનાસિ એવં જલિતાનુભાવા, વણ્ણો ચ તે સબ્બદિસા પભાસતી’’તિ.

૧૦૩. સા દેવતા અત્તમના, મોગ્ગલ્લાનેન પુચ્છિતા;

પઞ્હં પુટ્ઠા વિયાકાસિ, યસ્સ કમ્મસ્સિદં ફલં.

૧૦૪. ‘‘અહં મનુસ્સેસુ મનુસ્સભૂતા, ઉપાસિકા ચક્ખુમતો અહોસિં;

પાણાતિપાતા વિરતા અહોસિં, લોકે અદિન્નં પરિવજ્જયિસ્સં.

૧૦૫. ‘‘અમજ્જપા નો ચ [નાપિ (સ્યા.)] મુસા અભાણિં [અભાસિં (ક.)], સકેન સામિના [સામિનાવ (સી.)] અહોસિં તુટ્ઠા;

અન્નઞ્ચ પાનઞ્ચ પસન્નચિત્તા, સક્કચ્ચ દાનં વિપુલં અદાસિં.

૧૦૬. ‘‘તેન મેતાદિસો વણ્ણો, તેન મે ઇધ મિજ્ઝતિ;

ઉપ્પજ્જન્તિ ચ મે ભોગા, યે કેચિ મનસો પિયા.

૧૦૭. ‘‘અક્ખામિ તે ભિક્ખુ મહાનુભાવ, મનુસ્સભૂતા યમકાસિ પુઞ્ઞં;

તેનમ્હિ એવં જલિતાનુભાવા, વણ્ણો ચ મે સબ્બદિસા પભાસતી’’તિ.

દુતિયપતિબ્બતાવિમાનં દ્વાદસમં.