૧૦. ઉતેનસુત્તં

૭૦. એવં મે સુતં – એકં સમયં ભગવા કોસમ્બિયં વિહરતિ ઘોસિતારામે. તેન ખો પન સમયેન રઞ્ઞો ઉતેનસ્સ [ઉદેનસ્સ (સી. સ્યા. પી.)] ઉય્યાનગતસ્સ અન્તેપુરં દડ્ઢં હોતિ, પઞ્ચ ચ ઇત્થિસતાનિ [પઞ્ચ ઇત્થિસતાનિ (સી. સ્યા. પી.)] કાલઙ્કતાનિ હોન્તિ સામાવતીપમુખાનિ.

અથ ખો સમ્બહુલા ભિક્ખૂ પુબ્બણ્હસમયં નિવાસેત્વા પત્તચીવરમાદાય કોસમ્બિં પિણ્ડાય પાવિસિંસુ. કોસમ્બિયં પિણ્ડાય ચરિત્વા પચ્છાભત્તં પિણ્ડપાતપટિક્કન્તા યેન ભગવા તેનુપસઙ્કમિંસુ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિંસુ. એકમન્તં નિસિન્ના ખો તે ભિક્ખૂ ભગવન્તં એતદવોચું – ‘‘ઇધ, ભન્તે, રઞ્ઞો ઉતેનસ્સ ઉય્યાનગતસ્સ અન્તેપુરં દડ્ઢં, પઞ્ચ ચ ઇત્થિસતાનિ કાલઙ્કતાનિ સામાવતીપમુખાનિ. તાસં, ભન્તે, ઉપાસિકાનં કા ગતિ કો અભિસમ્પરાયો’’તિ?

‘‘સન્તેત્થ, ભિક્ખવે, ઉપાસિકાયો સોતાપન્ના, સન્તિ સકદાગામિનિયો, સન્તિ અનાગામિનિયો. સબ્બા તા, ભિક્ખવે, ઉપાસિકાયો અનિપ્ફલા કાલઙ્કતા’’તિ.

અથ ખો ભગવા એતમત્થં વિદિત્વા તાયં વેલાયં ઇમં ઉદાનં ઉદાનેસિ –

‘‘મોહસમ્બન્ધનો લોકો, ભબ્બરૂપોવ દિસ્સતિ;

ઉપધિબન્ધનો [ઉપધિસમ્બન્ધનો (ક. સી.)] બાલો, તમસા પરિવારિતો;

સસ્સતોરિવ [સસ્સતિ વિય (ક. સી.)] ખાયતિ, પસ્સતો નત્થિ કિઞ્ચન’’ન્તિ. દસમં;

તસ્સુદ્દાનં –

દ્વે ભદ્દિયા દ્વે ચ સત્તા, લકુણ્ડકો તણ્હાખયો;

પપઞ્ચખયો ચ કચ્ચાનો, ઉદપાનઞ્ચ ઉતેનોતિ.

ચૂળવગ્ગો [ચુલ્લવગ્ગો (સી.), ચૂલવગ્ગો (પી.)] સત્તમો નિટ્ઠિતો.