૯. નવકનિપાતો

૧. વડ્ઢમાતુથેરીગાથા

૨૦૪. ‘‘મા સુ તે વડ્ઢ લોકમ્હિ, વનથો આહુ કુદાચનં;

મા પુત્તક પુનપ્પુનં, અહુ દુક્ખસ્સ ભાગિમા.

૨૦૫. ‘‘સુખઞ્હિ વડ્ઢ મુનયો, અનેજા છિન્નસંસયા;

સીતિભૂતા દમપ્પત્તા, વિહરન્તિ અનાસવા.

૨૦૬. ‘‘તેહાનુચિણ્ણં ઇસીભિ, મગ્ગં દસ્સનપત્તિયા;

દુક્ખસ્સન્તકિરિયાય, ત્વં વડ્ઢ અનુબ્રૂહય’’.

૨૦૭. ‘‘વિસારદાવ ભણસિ, એતમત્થં જનેત્તિ મે;

મઞ્ઞામિ નૂન મામિકે, વનથો તે ન વિજ્જતિ’’.

૨૦૮. ‘‘યે કેચિ વડ્ઢ સઙ્ખારા, હીના ઉક્કટ્ઠમજ્ઝિમા;

અણૂપિ અણુમત્તોપિ, વનથો મે ન વિજ્જતિ.

૨૦૯. ‘‘સબ્બે મે આસવા ખીણા, અપ્પમત્તસ્સ ઝાયતો;

તિસ્સો વિજ્જા અનુપ્પત્તા, કતં બુદ્ધસ્સ સાસનં’’.

૨૧૦. ‘‘ઉળારં વત મે માતા, પતોદં સમવસ્સરિ;

પરમત્થસઞ્હિતા ગાથા, યથાપિ અનુકમ્પિકા.

૨૧૧. ‘‘તસ્સાહં વચનં સુત્વા, અનુસિટ્ઠિં જનેત્તિયા;

ધમ્મસંવેગમાપાદિં, યોગક્ખેમસ્સ પત્તિયા.

૨૧૨. ‘‘સોહં પધાનપહિતત્તો, રત્તિન્દિવમતન્દિતો;

માતરા ચોદિતો સન્તો, અફુસિં સન્તિમુત્તમં’’.

… વડ્ઢમાતા થેરી….

નવકનિપાતો નિટ્ઠિતો.