૩. તિકનિપાતો

૧. અપરાસામાથેરીગાથા

૩૯. ‘‘પણ્ણવીસતિવસ્સાનિ, યતો પબ્બજિતાય મે;

નાભિજાનામિ ચિત્તસ્સ, સમં લદ્ધં કુદાચનં.

૪૦. ‘‘અલદ્ધા ચેતસો સન્તિં, ચિત્તે અવસવત્તિની;

તતો સંવેગમાપાદિં, સરિત્વા જિનસાસનં.

૪૧. ‘‘બહૂહિ દુક્ખધમ્મેહિ, અપ્પમાદરતાય મે;

તણ્હક્ખયો અનુપ્પત્તો, કતં બુદ્ધસ્સ સાસનં;

અજ્જ મે સત્તમી રત્તિ, યતો તણ્હા વિસોસિતા’’તિ.

… અપરા સામા થેરી….

૨. ઉત્તમાથેરીગાથા

૪૨. ‘‘ચતુક્ખત્તું પઞ્ચક્ખત્તું, વિહારા ઉપનિક્ખમિં;

અલદ્ધા ચેતસો સન્તિં, ચિત્તે અવસવત્તિની.

૪૩. ‘‘સા ભિક્ખુનિં ઉપગચ્છિં, યા મે સદ્ધાયિકા અહુ;

સા મે ધમ્મમદેસેસિ, ખન્ધાયતનધાતુયો.

૪૪. ‘‘તસ્સા ધમ્મં સુણિત્વાન, યથા મં અનુસાસિ સા;

સત્તાહં એકપલ્લઙ્કેન, નિસીદિં પીતિસુખસમપ્પિતા [નિસીદિં સુખસમપ્પિતા (સી.)];

અટ્ઠમિયા પાદે પસારેસિં, તમોખન્ધં પદાલિયા’’તિ.

… ઉત્તમા થેરી….

૩. અપરાઉત્તમાથેરીગાથા

૪૫. ‘‘યે ઇમે સત્ત બોજ્ઝઙ્ગા, મગ્ગા નિબ્બાનપત્તિયા;

ભાવિતા તે મયા સબ્બે, યથા બુદ્ધેન દેસિતા.

૪૬. ‘‘સુઞ્ઞતસ્સાનિમિત્તસ્સ, લાભિનીહં યદિચ્છકં;

ઓરસા ધીતા બુદ્ધસ્સ, નિબ્બાનાભિરતા સદા.

૪૭. ‘‘સબ્બે કામા સમુચ્છિન્ના, યે દિબ્બા યે ચ માનુસા;

વિક્ખીણો જાતિસંસારો, નત્થિ દાનિ પુનબ્ભવો’’તિ.

… અપરા ઉત્તમા થેરી….

૪. દન્તિકાથેરીગાથા

૪૮. ‘‘દિવાવિહારા નિક્ખમ્મ, ગિજ્ઝકૂટમ્હિ પબ્બતે;

નાગં ઓગાહમુત્તિણ્ણં, નદીતીરમ્હિ અદ્દસં.

૪૯. ‘‘પુરિસો અઙ્કુસમાદાય, ‘દેહિ પાદ’ન્તિ યાચતિ;

નાગો પસારયી પાદં, પુરિસો નાગમારુહિ.

૫૦. ‘‘દિસ્વા અદન્તં દમિતં, મનુસ્સાનં વસં ગતં;

તતો ચિત્તં સમાધેસિં, ખલુ તાય વનં ગતા’’તિ.

… દન્તિકા થેરી….

૫. ઉબ્બિરિથેરીગાથા

૫૧. ‘‘અમ્મ જીવાતિ વનમ્હિ કન્દસિ, અત્તાનં અધિગચ્છ ઉબ્બિરિ;

ચુલ્લાસીતિસહસ્સાનિ [ચૂળાસીતિસહસ્સાનિ (સી.)], સબ્બા જીવસનામિકા;

એતમ્હાળાહને દડ્ઢા, તાસં કમનુસોચસિ.

૫૨. ‘‘અબ્બહી [અબ્બુતી (સ્યા.), અબ્બુળ્હં (ક.)] વત મે સલ્લં, દુદ્દસં હદયસ્સિતં [હદયનિસ્સિતં (સી. સ્યા.)];

યં મે સોકપરેતાય, ધીતુસોકં બ્યપાનુદિ.

૫૩. ‘‘સાજ્જ અબ્બૂળ્હસલ્લાહં, નિચ્છાતા પરિનિબ્બુતા;

બુદ્ધં ધમ્મઞ્ચ સઙ્ઘઞ્ચ, ઉપેમિ સરણં મુનિ’’ન્તિ.

… ઉબ્બિરી થેરી….

૬. સુક્કાથેરીગાથા

૫૪. ‘‘કિંમે કતા રાજગહે મનુસ્સા, મધું પીતાવ [મધુપીતાવ (સી.)] અચ્છરે;

યે સુક્કં ન ઉપાસન્તિ, દેસેન્તિં બુદ્ધસાસનં.

૫૫. ‘‘તઞ્ચ અપ્પટિવાનીયં, અસેચનકમોજવં;

પિવન્તિ મઞ્ઞે સપ્પઞ્ઞા, વલાહકમિવદ્ધગૂ.

૫૬. ‘‘સુક્કા સુક્કેહિ ધમ્મેહિ, વીતરાગા સમાહિતા;

ધારેતિ અન્તિમં દેહં, જેત્વા મારં સવાહન’’ન્તિ.

… સુક્કા થેરી….

૭. સેલાથેરીગાથા

૫૭. ‘‘નત્થિ નિસ્સરણં લોકે, કિં વિવેકેન કાહસિ;

ભુઞ્જાહિ કામરતિયો, માહુ પચ્છાનુતાપિની’’.

૫૮. ‘‘સત્તિસૂલૂપમા કામા, ખન્ધાસં અધિકુટ્ટના;

યં ત્વં ‘કામરતિં’ બ્રૂસિ, ‘અરતી’ દાનિ સા મમ.

૫૯. ‘‘સબ્બત્થ વિહતા નન્દી [નન્દિ (સી. સ્યા.)], તમોખન્ધો પદાલિતો;

એવં જાનાહિ પાપિમ, નિહતો ત્વમસિ અન્તકા’’તિ.

… સેલા થેરી….

૮. સોમાથેરીગાથા

૬૦. ‘‘યં તં ઇસીહિ પત્તબ્બં, ઠાનં દુરભિસમ્ભવં;

ન તં દ્વઙ્ગુલપઞ્ઞાય, સક્કા પપ્પોતુમિત્થિયા’’.

૬૧. ‘‘ઇત્થિભાવો નો કિં કયિરા, ચિત્તમ્હિ સુસમાહિતે;

ઞાણમ્હિ વત્તમાનમ્હિ, સમ્મા ધમ્મં વિપસ્સતો.

૬૨. ‘‘સબ્બત્થ વિહતા નન્દી, તમોખન્ધો પદાલિતો;

એવં જાનાહિ પાપિમ, નિહતો ત્વમસિ અન્તકા’’તિ.

… સોમા થેરી….

તિકનિપાતો નિટ્ઠિતો.