૧૧. દ્વાદસકનિપાતો

૧. ઉપ્પલવણ્ણાથેરીગાથા

૨૨૪. ‘‘ઉભો માતા ચ ધીતા ચ, મયં આસું [આભું (સી.)] સપત્તિયો;

તસ્સા મે અહુ સંવેગો, અબ્ભુતો લોમહંસનો.

૨૨૫. ‘‘ધિરત્થુ કામા અસુચી, દુગ્ગન્ધા બહુકણ્ટકા;

યત્થ માતા ચ ધીતા ચ, સભરિયા મયં અહું.

૨૨૬. ‘‘કામેસ્વાદીનવં દિસ્વા, નેક્ખમ્મં દટ્ઠુ ખેમતો;

સા પબ્બજ્જિં રાજગહે, અગારસ્માનગારિયં.

૨૨૭. ‘‘પુબ્બેનિવાસં જાનામિ, દિબ્બચક્ખું વિસોધિતં;

ચેતોપરિચ્ચઞાણઞ્ચ, સોતધાતુ વિસોધિતા.

૨૨૮. ‘‘ઇદ્ધીપિ મે સચ્છિકતા, પત્તો મે આસવક્ખયો;

છળભિઞ્ઞા સચ્છિકતા, કતં બુદ્ધસ્સ સાસનં.

૨૨૯. ‘‘ઇદ્ધિયા અભિનિમ્મિત્વા, ચતુરસ્સં રથં અહં;

બુદ્ધસ્સ પાદે વન્દિત્વા, લોકનાથસ્સ તાદિનો’’ [સિરીમતો (સ્યા. ક.)].

૨૩૦. ‘‘સુપુપ્ફિતગ્ગં ઉપગમ્મ પાદપં, એકા તુવં તિટ્ઠસિ સાલમૂલે [રુક્ખમૂલે (સ્યા. ક.)];

ન ચાપિ તે દુતિયો અત્થિ કોચિ, ન ત્વં બાલે ભાયસિ ધુત્તકાનં’’.

૨૩૧. ‘‘સતં સહસ્સાનિપિ ધુત્તકાનં, સમાગતા એદિસકા ભવેય્યું;

લોમં ન ઇઞ્જે નપિ સમ્પવેધે, કિં મે તુવં માર કરિસ્સસેકો.

૨૩૨. ‘‘એસા અન્તરધાયામિ, કુચ્છિં વા પવિસામિ તે;

ભમુકન્તરે તિટ્ઠામિ, તિટ્ઠન્તિં મં ન દક્ખસિ.

૨૩૩. ‘‘ચિત્તમ્હિ વસીભૂતાહં, ઇદ્ધિપાદા સુભાવિતા;

છળભિઞ્ઞા સચ્છિકતા, કતં બુદ્ધસ્સ સાસનં.

૨૩૪. ‘‘સત્તિસૂલૂપમા કામા, ખન્ધાસં અધિકુટ્ટના;

યં ત્વં ‘કામરતિં’ બ્રૂસિ, ‘અરતી’ દાનિ સા મમ.

૨૩૫. ‘‘સબ્બત્થ વિહતા નન્દી, તમોખન્ધો પદાલિતો;

એવં જાનાહિ પાપિમ, નિહતો ત્વમસિ અન્તકા’’તિ.

… ઉપ્પલવણ્ણા થેરી….

દ્વાદસનિપાતો નિટ્ઠિતો.