૧. યસવતીપમુખઅટ્ઠારસભિક્ખુનીસહસ્સઅપદાનં

૧. ‘‘ભવા સબ્બે પરિક્ખીણા, ભવા સન્તિ વિમોચિતા;

સબ્બાસવા ચ નો નત્થિ, આરોચેમ મહામુને.

૨. ‘‘પુરિમં કુસલં કમ્મં [પરિકમ્મઞ્ચ કુસલં (સ્યા.)], યં કિઞ્ચિ સાધુપત્થિતં;

પરિભોગમયં દિન્નં, તુય્હત્થાય મહામુને.

૩. ‘‘બુદ્ધપચ્ચેકબુદ્ધાનં, સાવકાનઞ્ચ પત્થિતં [બુદ્ધાનં સાવકાનઞ્ચ (સી. ક.)];

પરિભોગમયં દિન્નં, તુય્હત્થાય મહામુને.

૪. ‘‘ઉચ્ચનીચમયં કમ્મં, ભિક્ખૂનં સાધુપત્થિતં;

ઉચ્ચાકુલપરિકમ્મં, કતમેતં મહામુને [કતમ્હેહિ મહામુને (સ્યા. પી.)].

૫. ‘‘તેનેવ સુક્કમૂલેન, ચોદિતા કમ્મસમ્પદા;

માનુસિકમતિક્કન્તા, જાયિંસુ ખત્તિયે કુલે.

૬. ‘‘ઉપ્પત્તે ચ કતે કમ્મે, જાતિયા વાપિ એકતો;

પચ્છિમે એકતો જાતા, ખત્તિયા કુલસમ્ભવા.

૭. ‘‘રૂપવતી ભોગવતી, લાભસક્કારપૂજિતા;

અન્તેપુરે મહાવીર, દેવાનં વિય નન્દને.

૮. ‘‘નિબ્બિન્દિત્વા અગારમ્હા, પબ્બજિમ્હનગારિયં;

કતિપાહં ઉપાદાય, સબ્બા પત્તામ્હ નિબ્બુતિં.

૯. ‘‘ચીવરં પિણ્ડપાતઞ્ચ, પચ્ચયં સયનાસનં;

ઉપનેન્તિ બહૂ અમ્હે, સદા સક્કતપૂજિતા.

૧૦. ‘‘કિલેસા ઝાપિતા અમ્હં, ભવા સબ્બે સમૂહતા;

નાગીવ બન્ધનં છેત્વા, વિહરામ અનાસવા.

૧૧. ‘‘સ્વાગતં વત નો આસિ, મમ બુદ્ધસ્સ સન્તિકે;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૧૨. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં યસવતીપમુખાનિ ખત્તિયકઞ્ઞાભિક્ખુનિયો અટ્ઠારસસહસ્સાનિ ભગવતો સમ્મુખા ઇમા ગાથાયો અભાસિત્થાતિ.

યસવતીપમુખઅટ્ઠારસભિક્ખુનીસહસ્સાપદાનં પઠમં.