૯. યસોધરાપમુખદસભિક્ખુનીસહસ્સઅપદાનં

૪૧૧. ‘‘કપ્પે ચ સતસહસ્સે, ચતુરો ચ અસઙ્ખિયે;

દીપઙ્કરો નામ જિનો, ઉપ્પજ્જિ લોકનાયકો.

૪૧૨. ‘‘દીપઙ્કરો મહાવીરો, વિયાકાસિ વિનાયકો;

સુમેધઞ્ચ સુમિત્તઞ્ચ, સમાનસુખદુક્ખતં.

૪૧૩. ‘‘સદેવકઞ્ચ પસ્સન્તો, વિચરન્તો સદેવકં;

તેસં પકિત્તને અમ્હે, ઉપગમ્મ સમાગમં.

૪૧૪. ‘‘અમ્હં સબ્બપતિ હોહિ [સબ્બા પતી હોન્તિ (પી.)], અનાગતસમાગમે;

સબ્બાવ તુય્હં ભરિયા, મનાપા પિયવાદિકા.

૪૧૫. ‘‘દાનં સીલમયં સબ્બં, ભાવના ચ સુભાવિતા;

દીઘરત્તઞ્ચ નો [દીઘરત્તમિદં (સ્યા. ક.)] સબ્બં, પરિચ્ચત્તં મહામુને.

૪૧૬. ‘‘ગન્ધં વિલેપનં માલં, દીપઞ્ચ રતનામયં;

યંકિઞ્ચિ પત્થિતં સબ્બં, પરિચ્ચત્તં મહામુનિ.

૪૧૭. ‘‘અઞ્ઞં વાપિ કતં કમ્મં, પરિભોગઞ્ચ માનુસં;

દીઘરત્તઞ્હિ નો સબ્બં, પરિચ્ચત્તં મહામુનિ.

૪૧૮. ‘‘અનેકજાતિસંસારં, બહું પુઞ્ઞમ્પિ નો કતં;

ઇસ્સરમનુભોત્વાન, સંસરિત્વા ભવાભવે.

૪૧૯. ‘‘પચ્છિમે ભવે સમ્પત્તે, સક્યપુત્તનિવેસને;

નાનાકુલૂપપન્નાયો, અચ્છરા કામવણ્ણિની.

૪૨૦. ‘‘લાભગ્ગેન યસં પત્તા, પૂજિતા સબ્બસક્કતા;

લાભિયો અન્નપાનાનં, સદા સમ્માનિતા મયં.

૪૨૧. ‘‘અગારં પજહિત્વાન, પબ્બજિમ્હનગારિયં;

અડ્ઢમાસે અસમ્પત્તે, સબ્બા પત્તામ્હ નિબ્બુતિં.

૪૨૨. ‘‘લાભિયો અન્નપાનાનં, વત્થસેનાસનાનિ ચ;

ઉપેન્તિ પચ્ચયા સબ્બે, સદા સક્કતપૂજિતા.

૪૨૩. ‘‘કિલેસા ઝાપિતા અમ્હં…પે… વિહરામ અનાસવા.

૪૨૪. ‘‘સ્વાગતં વત નો આસિ…પે… કતં બુદ્ધસ્સ સાસનં.

૪૨૫. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં યસોધરાપમુખાનિ દસભિક્ખુનીસહસ્સાનિ ભગવતો સમ્મુખા ઇમા ગાથાયો અભાસિત્થાતિ.

યસોધરાપમુખદસભિક્ખુનીસહસ્સાપદાનં નવમં.