૧૦. યસોધરાપમુખઅટ્ઠારસભિક્ખુનીસહસ્સઅપદાનં

૪૨૬. ‘‘અટ્ઠારસસહસ્સાનિ, ભિક્ખુની સક્યસમ્ભવા;

યસોધરાપમુખાનિ, સમ્બુદ્ધં ઉપસઙ્કમું.

૪૨૭. ‘‘અટ્ઠારસસહસ્સાનિ, સબ્બા હોન્તિ મહિદ્ધિકા;

વન્દન્તી મુનિનો પાદે, આરોચેન્તિ યથાબલં.

૪૨૮. ‘‘‘જાતિ ખીણા જરા બ્યાધિ, મરણઞ્ચ મહામુનિ;

અનાસવં પદં સન્તં, અમતં યામ નાયક.

૪૨૯. ‘‘‘ખલિતઞ્ચે પુરે અત્થિ, સબ્બાસમ્પિ મહામુનિ;

અપરાધમજાનન્તી, ખમ અમ્હં વિનાયક.

૪૩૦. ‘‘‘ઇદ્ધિઞ્ચાપિ નિદસ્સેથ, મમ સાસનકારિકા;

પરિસાનઞ્ચ સબ્બાસં, કઙ્ખં છિન્દથ યાવતા.

૪૩૧. ‘‘‘યસોધરા મહાવીર, મનાપા પિયદસ્સના;

સબ્બા તુય્હં મહાવીર, અગારસ્મિં પજાપતિ.

૪૩૨. ‘‘‘થીનં સતસહસ્સાનં, નવુતીનં છદુત્તરિ;

અગારે તે મયં વીર, પામોક્ખા સબ્બા ઇસ્સરા.

૪૩૩. ‘‘‘રૂપાચારગુણૂપેતા, યોબ્બનટ્ઠા પિયંવદા;

સબ્બા નો અપચાયન્તિ, દેવતા વિય માનુસા.

૪૩૪. ‘‘‘અટ્ઠારસસહસ્સાનિ, સબ્બા સાકિયસમ્ભવા;

યસોધરાસહસ્સાનિ, પામોક્ખા ઇસ્સરા તદા.

૪૩૫. ‘‘‘કામધાતુમતિક્કમ્મ, સણ્ઠિતા રૂપધાતુયા;

રૂપેન સદિસા નત્થિ, સહસ્સાનં મહામુનિ.

૪૩૬. ‘‘‘સમ્બુદ્ધં અભિવાદેત્વા, ઇદ્ધિં દસ્સંસુ સત્થુનો;

નેકા નાનાવિધાકારા, મહાઇદ્ધીપિ દસ્સયું.

૪૩૭. ‘‘‘ચક્કવાળસમં કાયં, સીસં ઉત્તરતો કુરુ;

ઉભો પક્ખા દુવે દીપા, જમ્બુદીપં સરીરતો.

૪૩૮. ‘‘‘દક્ખિણઞ્ચ સરં પિઞ્છં, નાનાસાખા તુ પત્તકા;

ચન્દઞ્ચ સૂરિયઞ્ચક્ખિ, મેરુપબ્બતતો સિખં.

૪૩૯. ‘‘‘ચક્કવાળગિરિં તુણ્ડં, જમ્બુરુક્ખં સમૂલકં;

બીજમાના ઉપાગન્ત્વા, વન્દન્તી લોકનાયકં.

૪૪૦. ‘‘‘હત્થિવણ્ણં તથેવસ્સં, પબ્બતં જલધિં તથા;

ચન્દઞ્ચ સૂરિયં મેરું, સક્કવણ્ણઞ્ચ દસ્સયું.

૪૪૧. ‘‘‘યસોધરા મયં વીર, પાદે વન્દામ ચક્ખુમ;

તવ ચિરપભાવેન, નિપ્ફન્ના નરનાયક.

૪૪૨. ‘‘‘ઇદ્ધીસુ ચ વસી હોમ, દિબ્બાય સોતધાતુયા;

ચેતોપરિયઞાણસ્સ, વસી હોમ મહામુને.

૪૪૩. ‘‘‘પુબ્બેનિવાસં જાનામ, દિબ્બચક્ખુ વિસોધિતં;

સબ્બાસવપરિક્ખીણા, નત્થિ દાનિ પુનબ્ભવો.

૪૪૪. ‘‘‘અત્થધમ્મનિરુત્તીસુ, પટિભાને તથેવ ચ;

ઞાણં અમ્હં મહાવીર, ઉપ્પન્નં તવ સન્તિકે.

૪૪૫. ‘‘‘પુબ્બાનં લોકનાથાનં, સઙ્ગમં નો નિદસ્સિતં;

અધિકારા બહૂ અમ્હં, તુય્હત્થાય મહામુને.

૪૪૬. ‘‘‘યં અમ્હં પૂરિતં કમ્મં, કુસલં સરસે મુને;

તુય્હત્થાય મહાવીર, પુઞ્ઞાનુપચિતાનિ નો.

૪૪૭. ‘‘‘અભબ્બટ્ઠાને વજ્જેત્વા, વારયિમ્હ અનાચરં;

તુય્હત્થાય મહાવીર, ચત્તાનિ જીવિતાનિ નો [સઞ્ચત્તં જીવિતમ્પિ નો (સ્યા.)].

૪૪૮. ‘‘‘નેકકોટિસહસ્સાનિ, ભરિયત્થાયદાસિ નો;

ન તત્થ વિમના હોમ, તુય્હત્થાય મહામુને.

૪૪૯. ‘‘‘નેકકોટિસહસ્સાનિ, ઉપકારાયદાસિ નો;

ન તત્થ વિમના હોમ, તુય્હત્થાય મહામુને.

૪૫૦. ‘‘‘નેકકોટિસહસ્સાનિ, ભોજનત્થાયદાસિ નો;

ન તત્થ વિમના હોમ, તુય્હત્થાય મહામુને.

૪૫૧. ‘‘‘નેકકોટિસહસ્સાનિ, જીવિતાનિ ચજિમ્હસે [ચજિમ્હ નો (પી. ક.)];

ભયમોક્ખં કરિસ્સામ, જીવિતાનિ ચજિમ્હસે.

૪૫૨. ‘‘‘અઙ્ગગતે અલઙ્કારે, વત્થે નાનાવિધે બહૂ;

ઇત્થિભણ્ડે ન ગૂહામ, તુય્હત્થાય મહામુને.

૪૫૩. ‘‘‘ધનધઞ્ઞપરિચ્ચાગં, ગામાનિ નિગમાનિ ચ;

ખેત્તં પુત્તા ચ ધીતા ચ, પરિચ્ચત્તા મહામુને.

૪૫૪. ‘‘‘હત્થી અસ્સા ગવા ચાપિ, દાસિયો પરિચારિકા;

તુય્હત્થાય મહાવીર, પરિચ્ચત્તં અસઙ્ખિયં.

૪૫૫. ‘‘‘યં અમ્હે પટિમન્તેસિ, દાનં દસ્સામ યાચકે;

વિમનં નો ન પસ્સામ, દદતો દાનમુત્તમં.

૪૫૬. ‘‘‘નાનાવિધં બહું દુક્ખં, સંસારે ચ બહુબ્બિધે;

તુય્હત્થાય મહાવીર, અનુભુત્તં અસઙ્ખિયં.

૪૫૭. ‘‘‘સુખપ્પત્તાનુમોદામ, ન ચ દુક્ખેસુ દુમ્મના;

સબ્બત્થ તુલિતા હોમ, તુય્હત્થાય મહામુને.

૪૫૮. ‘‘‘અનુમગ્ગેન સમ્બુદ્ધો, યં ધમ્મં અભિનીહરિ;

અનુભોત્વા સુખં દુક્ખં, પત્તો બોધિં મહામુને.

૪૫૯. ‘‘‘બ્રહ્મદેવઞ્ચ સમ્બુદ્ધં, ગોતમં લોકનાયકં;

અઞ્ઞેસં લોકનાથાનં, સઙ્ગમં તેહિ નો બહૂ.

૪૬૦. ‘‘‘અધિકારં બહું અમ્હે, તુય્હત્થાય મહામુને;

ગવેસતો બુદ્ધધમ્મે, મયં તે પરિચારિકા.

૪૬૧. ‘‘‘કપ્પે ચ સતસહસ્સે, ચતુરો ચ અસઙ્ખિયે;

દીપઙ્કરો મહાવીરો, ઉપ્પજ્જિ લોકનાયકો.

૪૬૨. ‘‘‘પચ્ચન્તદેસવિસયે, નિમન્તેત્વા તથાગતં;

તસ્સ આગમનં મગ્ગં, સોધેન્તિ તુટ્ઠમાનસા.

૪૬૩. ‘‘‘તેન કાલેન સો આસિ, સુમેધો નામ બ્રાહ્મણો;

મગ્ગઞ્ચ પટિયાદેસિ, આયતો સબ્બદસ્સિનો.

૪૬૪. ‘‘‘તેન કાલેન અહુમ્હ, સબ્બા બ્રાહ્મણસમ્ભવા;

થલૂદજાનિ પુપ્ફાનિ, આહરિમ્હ સમાગમં.

૪૬૫. ‘‘‘તસ્મિં સો સમયે બુદ્ધો, દીપઙ્કરો મહાયસો;

વિયાકાસિ મહાવીરો, ઇસિમુગ્ગતમાનસં.

૪૬૬. ‘‘‘ચલતી રવતી પુથવી, સઙ્કમ્પતિ સદેવકે;

તસ્સ કમ્મં પકિત્તેન્તે, ઇસિમુગ્ગતમાનસં.

૪૬૭. ‘‘‘દેવકઞ્ઞા મનુસ્સા ચ, મયઞ્ચાપિ સદેવકા;

નાનાપૂજનીયં ભણ્ડં, પૂજયિત્વાન પત્થયું.

૪૬૮. ‘‘‘તેસં બુદ્ધો વિયાકાસિ, જોતિદીપ સનામકો;

અજ્જ યે પત્થિતા અત્થિ, તે ભવિસ્સન્તિ સમ્મુખા.

૪૬૯. ‘‘‘અપરિમેય્યે ઇતો કપ્પે, યં નો બુદ્ધો વિયાકરિ;

તં વાચમનુમોદેન્તા, એવંકારી અહુમ્હ નો.

૪૭૦. ‘‘‘તસ્સ કમ્મસ્સ સુકતસ્સ, તસ્સ ચિત્તં પસાદયું;

દેવમાનુસિકં યોનિં, અનુભોત્વા અસઙ્ખિયં.

૪૭૧. ‘‘‘સુખદુક્ખેનુભોત્વાન, દેવેસુ માનુસેસુ ચ;

પચ્છિમે ભવે સમ્પત્તે, જાતામ્હ સાકિયે કુલે.

૪૭૨. ‘‘‘રૂપવતી ભોગવતી, યસસીલવતી તતો;

સબ્બઙ્ગસમ્પદા હોમ, કુલેસુ અભિસક્કતા.

૪૭૩. ‘‘‘લાભં સિલોકં સક્કારં, લોકધમ્મસમાગમં;

ચિત્તઞ્ચ દુક્ખિતં નત્થિ, વસામ અકુતોભયા.

૪૭૪. ‘‘‘વુત્તઞ્હેતં ભગવતા, રઞ્ઞો અન્તેપુરે તદા;

ખત્તિયાનં પુરે વીર [તાસં (સ્યા.)], ઉપકારઞ્ચ નિદ્દિસિ.

૪૭૫. ‘‘‘ઉપકારા ચ યા નારી, યા ચ નારી સુખે દુખે;

અત્થક્ખાયી ચ યા નારી, યા ચ નારીનુકમ્પિકા.

૪૭૬. ‘‘‘ધમ્મં ચરે સુચરિતં, ન નં દુચ્ચરિતં ચરે;

ધમ્મચારી સુખં સેતિ, અસ્મિં લોકે પરમ્હિ ચ.

૪૭૭. ‘‘‘અગારં વિજહિત્વાન, પબ્બજિમ્હનગારિયં;

અડ્ઢમાસે અસમ્પત્તે, ચતુસચ્ચં ફુસિમ્હ નો.

૪૭૮. ‘‘‘ચીવરં પિણ્ડપાતઞ્ચ, પચ્ચયં સયનાસનં;

ઉપનેન્તિ બહૂ અમ્હે, સાગરસ્સેવ ઊમિયો.

૪૭૯. ‘‘‘કિલેસા ઝાપિતા અમ્હં [મય્હં (સ્યા.), અમ્હાકં (ક.)], ભવા સબ્બે સમૂહતા;

નાગીવ બન્ધનં છેત્વા, વિહરામ અનાસવા.

૪૮૦. ‘‘‘સ્વાગતં વત નો આસિ, મમ બુદ્ધસ્સ સન્તિકે;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૪૮૧. ‘‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’.

૪૮૨. ‘‘એવં બહુવિધં દુક્ખં, સમ્પત્તી ચ બહુબ્બિધા;

વિસુદ્ધભાવં સમ્પત્તા, લભામ સબ્બસમ્પદા.

૪૮૩. ‘‘યા દદન્તિ સકત્તાનં, પુઞ્ઞત્થાય મહેસિનો;

સહાયસમ્પદા હોન્તિ, નિબ્બાનપદમસઙ્ખતં.

૪૮૪. ‘‘પરિક્ખીણં અતીતઞ્ચ, પચ્ચુપ્પન્નં અનાગતં;

સબ્બકમ્મમ્પિ નો ખીણં, પાદે વન્દામ ચક્ખુમ.

૪૮૫. ‘‘નિબ્બાનાય વદન્તીનં, કિં વો વક્ખામ ઉત્તરિ;

સન્તસઙ્ખતદોસઞ્હિ, પપ્પોથ [સન્તસઙ્ખતદોસો યો, પજ્જોતં (સ્યા. પી. ક.)] અમતં પદં’’.

ઇત્થં સુદં યસોધરાપમુખાનિ અટ્ઠારસભિક્ખુનીસહસ્સાનિ ભગવતો સમ્મુખા ઇમા ગાથાયો અભાસિત્થાતિ.

યસોધરાપમુખઅટ્ઠારસભિક્ખુનીસહસ્સાપદાનં દસમં.

કુણ્ડલકેસીવગ્ગો તતિયો.