૭. ભદ્દકાપિલાનીથેરીઅપદાનં

૨૪૪. ‘‘પદુમુત્તરો નામ જિનો, સબ્બધમ્માન પારગૂ [સબ્બધમ્મેસુ ચક્ખુમા (સી. પી.)];

ઇતો સતસહસ્સમ્હિ, કપ્પે ઉપ્પજ્જિ નાયકો.

૨૪૫. ‘‘તદાહુ હંસવતિયં, વિદેહો નામ નામતો [નામકો (સ્યા. પી.)];

સેટ્ઠી પહૂતરતનો, તસ્સ જાયા અહોસહં.

૨૪૬. ‘‘કદાચિ સો નરાદિચ્ચં, ઉપેચ્ચ સપરિજ્જનો;

ધમ્મમસ્સોસિ બુદ્ધસ્સ, સબ્બદુક્ખભયપ્પહં [દુક્ખક્ખયાવહં (સ્યા.)].

૨૪૭. ‘‘સાવકં ધુતવાદાનં, અગ્ગં કિત્તેસિ નાયકો;

સુત્વા સત્તાહિકં દાનં, દત્વા બુદ્ધસ્સ તાદિનો.

૨૪૮. ‘‘નિપચ્ચ સિરસા પાદે, તં ઠાનમભિપત્થયિં;

સ હાસયન્તો પરિસં, તદા હિ નરપુઙ્ગવો.

૨૪૯. ‘‘સેટ્ઠિનો અનુકમ્પાય, ઇમા ગાથા અભાસથ;

‘લચ્છસે પત્થિતં ઠાનં, નિબ્બુતો હોહિ પુત્તક.

૨૫૦. ‘‘‘સતસહસ્સિતો કપ્પે, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૨૫૧. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

કસ્સપો નામ ગોત્તેન, હેસ્સતિ સત્થુ સાવકો’.

૨૫૨. ‘‘તં સુત્વા મુદિતો હુત્વા, યાવજીવં તદા જિનં;

મેત્તચિત્તો પરિચરિ, પચ્ચયેહિ વિનાયકં.

૨૫૩. ‘‘સાસનં જોતયિત્વાન, સો મદ્દિત્વા કુતિત્થિયે;

વેનેય્યં વિનયિત્વા ચ, નિબ્બુતો સો સસાવકો.

૨૫૪. ‘‘નિબ્બુતે તમ્હિ લોકગ્ગે, પૂજનત્થાય સત્થુનો;

ઞાતિમિત્તે સમાનેત્વા, સહ તેહિ અકારયિ.

૨૫૫. ‘‘સત્તયોજનિકં થૂપં, ઉબ્બિદ્ધં રતનામયં;

જલન્તં સતરંસિંવ, સાલરાજંવ ફુલ્લિતં.

૨૫૬. ‘‘સત્તસતસહસ્સાનિ, પાતિયો [ચાતિયો (સ્યા.)] તત્થ કારયિ;

નળગ્ગી વિય જોતન્તી [જોતન્તે (સ્યા. પી.)], રતનેહેવ સત્તહિ.

૨૫૭. ‘‘ગન્ધતેલેન પૂરેત્વા, દીપાનુજ્જલયી તહિં;

પૂજનત્થાય [પૂજત્થાય (સી. ક.)] મહેસિસ્સ, સબ્બભૂતાનુકમ્પિનો.

૨૫૮. ‘‘સત્તસતસહસ્સાનિ, પુણ્ણકુમ્ભાનિ કારયિ;

રતનેહેવ પુણ્ણાનિ, પૂજનત્થાય મહેસિનો.

૨૫૯. ‘‘મજ્ઝે અટ્ઠટ્ઠકુમ્ભીનં, ઉસ્સિતા કઞ્ચનગ્ઘિયો;

અતિરોચન્તિ વણ્ણેન, સરદેવ દિવાકરો.

૨૬૦. ‘‘ચતુદ્વારેસુ સોભન્તિ, તોરણા રતનામયા;

ઉસ્સિતા ફલકા રમ્મા, સોભન્તિ રતનામયા.

૨૬૧. ‘‘વિરોચન્તિ પરિક્ખિત્તા [પરિક્ખાયો (સ્યા.)], અવટંસા સુનિમ્મિતા;

ઉસ્સિતાનિ પટાકાનિ, રતનાનિ વિરોચરે.

૨૬૨. ‘‘સુરત્તં સુકતં ચિત્તં, ચેતિયં રતનામયં;

અતિરોચતિ વણ્ણેન, સસઞ્ઝોવ [સસજ્ઝાવ (સ્યા. ક.), સસઞ્જાવ (પી.)] દિવાકરો.

૨૬૩. ‘‘થૂપસ્સ વેદિયો તિસ્સો, હરિતાલેન પૂરયિ;

એકં મનોસિલાયેકં, અઞ્જનેન ચ એકિકં.

૨૬૪. ‘‘પૂજં એતાદિસં રમ્મં, કારેત્વા વરવાદિનો;

અદાસિ દાનં સઙ્ઘસ્સ, યાવજીવં યથાબલં.

૨૬૫. ‘‘સહાવ સેટ્ઠિના તેન, તાનિ પુઞ્ઞાનિ સબ્બસો;

યાવજીવં કરિત્વાન, સહાવ સુગતિં ગતા.

૨૬૬. ‘‘સમ્પત્તિયોનુભોત્વાન, દેવત્તે અથ માનુસે;

છાયા વિય સરીરેન, સહ તેનેવ સંસરિં.

૨૬૭. ‘‘એકનવુતિતો કપ્પે, વિપસ્સી નામ નાયકો;

ઉપ્પજ્જિ ચારુદસ્સનો, સબ્બધમ્મવિપસ્સકો.

૨૬૮. ‘‘તદાયં બન્ધુમતિયં, બ્રાહ્મણો સાધુસમ્મતો;

અડ્ઢો સન્તો ગુણેનાપિ [સત્થાગમેનાસિ (સી.)], ધનેન ચ સુદુગ્ગતો.

૨૬૯. ‘‘તદાપિ તસ્સાહં આસિં, બ્રાહ્મણી સમચેતસા;

કદાચિ સો દિજવરો, સઙ્ગમેસિ મહામુનિં.

૨૭૦. ‘‘નિસિન્નં જનકાયમ્હિ, દેસેન્તં અમતં પદં;

સુત્વા ધમ્મં પમુદિતો, અદાસિ એકસાટકં.

૨૭૧. ‘‘ઘરમેકેન વત્થેન, ગન્ત્વાનેતં સ મબ્રવિ [મમબ્રવિ (સી. સ્યા. પી.)];

‘અનુમોદ મહાપુઞ્ઞં [મહાપઞ્ઞે (સી.), મહાપુઞ્ઞે (સ્યા. ક.)], દિન્નં બુદ્ધસ્સ સાટકં’.

૨૭૨. ‘‘તદાહં અઞ્જલિં કત્વા, અનુમોદિં સુપીણિતા [સુવિદિતા (સ્યા.), સુપીતિયા (ક.)];

‘સુદિન્નો સાટકો સામિ, બુદ્ધસેટ્ઠસ્સ તાદિનો’.

૨૭૩. ‘‘સુખિતો સજ્જિતો હુત્વા, સંસરન્તો ભવાભવે;

બારાણસિપુરે રમ્મે, રાજા આસિ મહીપતિ.

૨૭૪. ‘‘તદા તસ્સ મહેસીહં, ઇત્થિગુમ્બસ્સ ઉત્તમા;

તસ્સાતિ દયિતા [તસ્સાવિ દુતિયિકા (સ્યા.)] આસિં, પુબ્બસ્નેહેન ભત્તુનો [ચુત્તરિ (સ્યા. પી. ક.)].

૨૭૫. ‘‘પિણ્ડાય વિચરન્તે તે [સો (સી. સ્યા. પી.)], અટ્ઠ પચ્ચેકનાયકે;

દિસ્વા પમુદિતો હુત્વા, દત્વા પિણ્ડં મહારહં.

૨૭૬. ‘‘પુનો નિમન્તયિત્વાન, કત્વા રતનમણ્ડપં;

કમ્મારેહિ કતં પત્તં [કતં છત્તં (સી.), કતમટ્ઠં (સ્યા.)], સોવણ્ણં વત તત્તકં.

૨૭૭. ‘‘સમાનેત્વાન તે સબ્બે, તેસં દાનમદાસિ સો;

સોણ્ણાસને પવિટ્ઠાનં, પસન્નો સેહિ પાણિભિ.

૨૭૮. ‘‘તમ્પિ દાનં સહાદાસિં, કાસિરાજેનહં તદા;

પુનાહં બારાણસિયં, જાતા કાસિકગામકે.

૨૭૯. ‘‘કુટુમ્બિકકુલે ફીતે, સુખિતો સો સભાતુકો;

જેટ્ઠસ્સ ભાતુનો જાયા, અહોસિં સુપતિબ્બતા.

૨૮૦. ‘‘પચ્ચેકબુદ્ધં દિસ્વાન, કનિયસ્સ મમ ભત્તુનો [ભત્તુકનિયસો (સ્યા.)];

ભાગન્નં તસ્સ દત્વાન, આગતે તમ્હિ પાવદિં.

૨૮૧. ‘‘નાભિનન્દિત્થ સો દાનં, તતો તસ્સ અદાસહં;

ઉખા [બુદ્ધા (સ્યા.)] આનિય તં અન્નં, પુનો તસ્સેવ સો અદા.

૨૮૨. ‘‘તદન્નં છડ્ડયિત્વાન, દુટ્ઠા બુદ્ધસ્સહં તદા;

પત્તં કલલપુણ્ણં તં, અદાસિં તસ્સ તાદિનો.

૨૮૩. ‘‘દાને ચ ગહણે ચેવ, અપચે પદુસેપિ ચ;

સમચિત્તમુખં દિસ્વા, તદાહં સંવિજિં ભુસં.

૨૮૪. ‘‘પુનો પત્તં ગહેત્વાન, સોધયિત્વા સુગન્ધિના;

પસન્નચિત્તા પૂરેત્વા, સઘતં સક્કરં અદં.

૨૮૫. ‘‘યત્થ યત્થૂપપજ્જામિ, સુરૂપા હોમિ દાનતો;

બુદ્ધસ્સ અપકારેન, દુગ્ગન્ધા વદનેન ચ.

૨૮૬. ‘‘પુન કસ્સપવીરસ્સ, નિધાયન્તમ્હિ ચેતિયે;

સોવણ્ણં ઇટ્ઠકં વરં, અદાસિં મુદિતા અહં.

૨૮૭. ‘‘ચતુજ્જાતેન ગન્ધેન, નિચયિત્વા તમિટ્ઠકં;

મુત્તા દુગ્ગન્ધદોસમ્હા, સબ્બઙ્ગસુસમાગતા.

૨૮૮. ‘‘સત્તપાતિસહસ્સાનિ, રતનેહેવ સત્તહિ;

કારેત્વા ઘતપૂરાનિ, વટ્ટીનિ [વટ્ટીયો (સી.)] ચ સહસ્સસો.

૨૮૯. ‘‘પક્ખિપિત્વા પદીપેત્વા, ઠપયિં સત્તપન્તિયો;

પૂજનત્થં લોકનાથસ્સ, વિપ્પસન્નેન ચેતસા.

૨૯૦. ‘‘તદાપિ તમ્હિ પુઞ્ઞમ્હિ, ભાગિનીયિ વિસેસતો;

પુન કાસીસુ સઞ્જાતો, સુમિત્તા ઇતિ વિસ્સુતો.

૨૯૧. ‘‘તસ્સાહં ભરિયા આસિં, સુખિતા સજ્જિતા પિયા;

તદા પચ્ચેકમુનિનો, અદાસિં ઘનવેઠનં.

૨૯૨. ‘‘તસ્સાપિ ભાગિની આસિં, મોદિત્વા દાનમુત્તમં;

પુનાપિ કાસિરટ્ઠમ્હિ, જાતો કોલિયજાતિયા.

૨૯૩. ‘‘તદા કોલિયપુત્તાનં, સતેહિ સહ પઞ્ચહિ;

પઞ્ચપચ્ચેકબુદ્ધાનં, સતાનિ સમુપટ્ઠહિ.

૨૯૪. ‘‘તેમાસં તપ્પયિત્વાન [વાસયિત્વાન (સ્યા. પી.)], અદાસિ ચ તિચીવરે [તિચીવરં (સ્યા.)];

જાયા તસ્સ તદા આસિં, પુઞ્ઞકમ્મપથાનુગા.

૨૯૫. ‘‘તતો ચુતો અહુ રાજા, નન્દો નામ મહાયસો;

તસ્સાપિ મહેસી આસિં, સબ્બકામસમિદ્ધિની.

૨૯૬. ‘‘તદા રાજા ભવિત્વાન, બ્રહ્મદત્તો મહીપતિ;

પદુમવતીપુત્તાનં, પચ્ચેકમુનિનં તદા.

૨૯૭. ‘‘સતાનિ પઞ્ચનૂનાનિ, યાવજીવં ઉપટ્ઠહિં;

રાજુય્યાને નિવાસેત્વા, નિબ્બુતાનિ ચ પૂજયિં.

૨૯૮. ‘‘ચેતિયાનિ ચ કારેત્વા, પબ્બજિત્વા ઉભો મયં;

ભાવેત્વા અપ્પમઞ્ઞાયો, બ્રહ્મલોકં અગમ્હસે.

૨૯૯. ‘‘તતો ચુતો મહાતિત્થે, સુજાતો પિપ્ફલાયનો;

માતા સુમનદેવીતિ, કોસિગોત્તો દિજો પિતા.

૩૦૦. ‘‘અહં મદ્દે જનપદે, સાકલાય પુરુત્તમે;

કપ્પિલસ્સ દિજસ્સાસિં, ધીતા માતા સુચીમતિ.

૩૦૧. ‘‘ઘનકઞ્ચનબિમ્બેન, નિમ્મિનિત્વાન મં પિતા;

અદા કસ્સપધીરસ્સ, કામેહિ વજ્જિતસ્સમં.

૩૦૨. ‘‘કદાચિ સો કારુણિકો, ગન્ત્વા કમ્મન્તપેક્ખકો;

કાકાદિકેહિ ખજ્જન્તે, પાણે દિસ્વાન સંવિજિ.

૩૦૩. ‘‘ઘરેવાહં તિલે જાતે, દિસ્વાનાતપતાપને;

કિમિ કાકેહિ ખજ્જન્તે, સંવેગમલભિં તદા.

૩૦૪. ‘‘તદા સો પબ્બજી ધીરો, અહં તમનુપબ્બજિં;

પઞ્ચવસ્સાનિ નિવસિં, પરિબ્બાજવતે [પરિબ્બાજપથે (સ્યા. પી.)] અહં.

૩૦૫. ‘‘યદા પબ્બજિતા આસિ, ગોતમી જિનપોસિકા;

તદાહં તમુપગન્ત્વા, બુદ્ધેન અનુસાસિતા.

૩૦૬. ‘‘ન ચિરેનેવ કાલેન, અરહત્તમપાપુણિં;

અહો કલ્યાણમિત્તત્તં, કસ્સપસ્સ સિરીમતો.

૩૦૭. ‘‘સુતો બુદ્ધસ્સ દાયાદો, કસ્સપો સુસમાહિતો;

પુબ્બેનિવાસં યો વેદિ, સગ્ગાપાયઞ્ચ પસ્સતિ.

૩૦૮. ‘‘અથો જાતિક્ખયં પત્તો, અભિઞ્ઞાવોસિતો મુનિ;

એતાહિ તીહિ વિજ્જાહિ, તેવિજ્જો હોતિ બ્રાહ્મણો.

૩૦૯. ‘‘તથેવ ભદ્દકાપિલાની [ભદ્દાકાપિલાની (સી. પી.)], તેવિજ્જા મચ્ચુહાયિની;

ધારેતિ અન્તિમં દેહં, જિત્વા મારં સવાહનં.

૩૧૦. ‘‘દિસ્વા આદીનવં લોકે, ઉભો પબ્બજિતા મયં;

ત્યમ્હ ખીણાસવા દન્તા, સીતિભૂતામ્હ નિબ્બુતા.

૩૧૧. ‘‘કિલેસા ઝાપિતા મય્હં…પે… વિહરામિ અનાસવા.

૩૧૨. ‘‘સ્વાગતં વત મે આસિ…પે… કતં બુદ્ધસ્સ સાસનં.

૩૧૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં ભદ્દકાપિલાની ભિક્ખુની ઇમા ગાથાયો અભાસિત્થાતિ.

ભદ્દકાપિલાનીથેરિયાપદાનં સત્તમં.