૬. સોણાથેરીઅપદાનં

૨૨૦. ‘‘પદુમુત્તરો નામ જિનો, સબ્બધમ્માન પારગૂ;

ઇતો સતસહસ્સમ્હિ, કપ્પે ઉપ્પજ્જિ નાયકો.

૨૨૧. ‘‘તદા સેટ્ઠિકુલે જાતા, સુખિતા પૂજિતા પિયા;

ઉપેત્વા તં મુનિવરં, અસ્સોસિં મધુરં વચં.

૨૨૨. ‘‘આરદ્ધવીરિયાનગ્ગં, વણ્ણેસિ [વણ્ણેતિ (સ્યા.)] ભિક્ખુનિં જિનો;

તં સુત્વા મુદિતા હુત્વા, કારં કત્વાન સત્થુનો.

૨૨૩. ‘‘અભિવાદિય સમ્બુદ્ધં, ઠાનં તં પત્થયિં તદા;

અનુમોદિ મહાવીરો, ‘સિજ્ઝતં પણિધી તવ.

૨૨૪. ‘‘‘સતસહસ્સિતો કપ્પે, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૨૨૫. ‘‘‘તસ્સ ધમ્મેસુ દાયાદા, ઓરસા ધમ્મનિમ્મિતા;

સોણાતિ નામ નામેન, હેસ્સતિ સત્થુ સાવિકા’.

૨૨૬. ‘‘તં સુત્વા મુદિતા હુત્વા, યાવજીવં તદા જિનં;

મેત્તચિત્તા પરિચરિં, પચ્ચયેહિ વિનાયકં.

૨૨૭. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૨૨૮. ‘‘પચ્છિમે ચ ભવે દાનિ, જાતા સેટ્ઠિકુલે અહં;

સાવત્થિયં પુરવરે, ઇદ્ધે ફીતે મહદ્ધને.

૨૨૯. ‘‘યદા ચ યોબ્બનપ્પત્તા, ગન્ત્વા પતિકુલં અહં;

દસ પુત્તાનિ અજનિં, સુરૂપાનિ વિસેસતો.

૨૩૦. ‘‘સુખેધિતા ચ તે સબ્બે, જનનેત્તમનોહરા;

અમિત્તાનમ્પિ રુચિતા, મમ પગેવ તે પિયા.

૨૩૧. ‘‘તતો મય્હં અકામાય, દસપુત્તપુરક્ખતો;

પબ્બજિત્થ સ મે ભત્તા, દેવદેવસ્સ સાસને.

૨૩૨. ‘‘તદેકિકા વિચિન્તેસિં, જીવિતેનાલમત્થુ મે;

ચત્તાય પતિપુત્તેહિ, વુડ્ઢાય ચ વરાકિયા.

૨૩૩. ‘‘અહમ્પિ તત્થ ગચ્છિસ્સં, સમ્પત્તો યત્થ મે પતિ;

એવાહં ચિન્તયિત્વાન, પબ્બજિં અનગારિયં.

૨૩૪. ‘‘તતો ચ મં ભિક્ખુનિયો, એકં ભિક્ખુનુપસ્સયે;

વિહાય ગચ્છુમોવાદં, તાપેહિ ઉદકં ઇતિ.

૨૩૫. ‘‘તદા ઉદકમાહિત્વા, ઓકિરિત્વાન કુમ્ભિયા;

ચુલ્લે ઠપેત્વા આસીના, તતો ચિત્તં સમાદહિં.

૨૩૬. ‘‘ખન્ધે અનિચ્ચતો દિસ્વા, દુક્ખતો ચ અનત્તતો;

ખેપેત્વા આસવે સબ્બે, અરહત્તમપાપુણિં.

૨૩૭. ‘‘તદાગન્ત્વા ભિક્ખુનિયો, ઉણ્હોદકમપુચ્છિસું;

તેજોધાતુમધિટ્ઠાય, ખિપ્પં સન્તાપયિં જલં.

૨૩૮. ‘‘વિમ્હિતા તા જિનવરં, એતમત્થમસાવયું;

તં સુત્વા મુદિતો નાથો, ઇમં ગાથં અભાસથ.

૨૩૯. ‘‘‘યો ચ વસ્સસતં જીવે, કુસીતો હીનવીરિયો;

એકાહં જીવિતં સેય્યો, વીરિયમારભતો દળ્હં’.

૨૪૦. ‘‘આરાધિતો મહાવીરો, મયા સુપ્પટિપત્તિયા;

આરદ્ધવીરિયાનગ્ગં, મમાહ સ મહામુનિ.

૨૪૧. ‘‘કિલેસા ઝાપિતા મય્હં…પે… વિહરામિ અનાસવા.

૨૪૨. ‘‘સ્વાગતં વત મે આસિ…પે… કતં બુદ્ધસ્સ સાસનં.

૨૪૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં સોણા ભિક્ખુની ઇમા ગાથાયો અભાસિત્થાતિ.

સોણાથેરિયાપદાનં છટ્ઠં.