૫. નન્દાથેરીઅપદાનં

૧૬૬. ‘‘પદુમુત્તરો નામ જિનો, સબ્બધમ્માન પારગૂ;

ઇતો સતસહસ્સમ્હિ, કપ્પે ઉપ્પજ્જિ નાયકો.

૧૬૭. ‘‘ઓવાદકો વિઞ્ઞાપકો, તારકો સબ્બપાણિનં;

દેસનાકુસલો બુદ્ધો, તારેસિ જનતં બહું.

૧૬૮. ‘‘અનુકમ્પકો કારુણિકો, હિતેસી સબ્બપાણિનં;

સમ્પત્તે તિત્થિયે સબ્બે, પઞ્ચસીલે પતિટ્ઠપિ.

૧૬૯. ‘‘એવં નિરાકુલં આસિ, સુઞ્ઞતં તિત્થિયેહિ ચ;

વિચિત્તં અરહન્તેહિ, વસીભૂતેહિ તાદિભિ.

૧૭૦. ‘‘રતનાનટ્ઠપઞ્ઞાસં, ઉગ્ગતોવ મહામુનિ;

કઞ્ચનગ્ઘિયસઙ્કાસો, બાત્તિંસવરલક્ખણો.

૧૭૧. ‘‘વસ્સસતસહસ્સાનિ, આયુ વિજ્જતિ તાવદે;

તાવતા તિટ્ઠમાનો સો, તારેસિ જનતં બહું.

૧૭૨. ‘‘તદાહં હંસવતિયં, જાતા સેટ્ઠિકુલે અહું;

નાનારતનપજ્જોતે, મહાસુખસમપ્પિતા.

૧૭૩. ‘‘ઉપેત્વા તં મહાવીરં, અસ્સોસિં ધમ્મદેસનં;

અમતં પરમસ્સાદં, પરમત્થનિવેદકં.

૧૭૪. ‘‘તદા નિમન્તયિત્વાન, સસઙ્ઘં લોકનાયકં;

દત્વા તસ્સ મહાદાનં, પસન્ના સેહિ પાણિભિ.

૧૭૫. ‘‘ઝાયિનીનં ભિક્ખુનીનં, અગ્ગટ્ઠાનમપત્થયિં;

નિપચ્ચ સિરસા ધીરં, સસઙ્ઘં લોકનાયકં.

૧૭૬. ‘‘તદા અદન્તદમકો, તિલોકસરણો પભૂ;

બ્યાકાસિ નરસારથિ, ‘લચ્છસે તં સુપત્થિતં.

૧૭૭. ‘‘‘સતસહસ્સિતો કપ્પે, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૧૭૮. ‘‘‘તસ્સ ધમ્મેસુ દાયાદા, ઓરસા ધમ્મનિમ્મિતા;

નન્દાતિ નામ નામેન, હેસ્સતિ સત્થુ સાવિકા’.

૧૭૯. ‘‘તં સુત્વા મુદિતા હુત્વા, યાવજીવં તદા જિનં;

મેત્તચિત્તા પરિચરિં, પચ્ચયેહિ વિનાયકં.

૧૮૦. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૧૮૧. ‘‘તતો ચુતા યામમગં, તતોહં તુસિતં ગતા [અગં (સી. પી. ક.)];

તતો ચ નિમ્માનરતિં, વસવત્તિપુરં તતો [ગતા (સ્યા.)].

૧૮૨. ‘‘યત્થ યત્થૂપપજ્જામિ, તસ્સ કમ્મસ્સ વાહસા;

તત્થ તત્થેવ રાજૂનં, મહેસિત્તમકારયિં.

૧૮૩. ‘‘તતો ચુતા મનુસ્સત્તે, રાજાનં ચક્કવત્તિનં;

મણ્ડલીનઞ્ચ રાજૂનં, મહેસિત્તમકારયિં.

૧૮૪. ‘‘સમ્પત્તિં અનુભોત્વાન, દેવેસુ મનુજેસુ ચ;

સબ્બત્થ સુખિતા હુત્વા, નેકકપ્પેસુ સંસરિં.

૧૮૫. ‘‘પચ્છિમે ભવે સમ્પત્તે, સુરમ્મે [પુરસ્મિં (સ્યા.)] કપિલવ્હયે;

રઞ્ઞો સુદ્ધોદનસ્સાહં, ધીતા આસિં અનિન્દિતા.

૧૮૬. ‘‘સિરિયા [સિરિંવ (સી.), રંસિરિવ (સ્યા.)] રૂપિનિં દિસ્વા, નન્દિતં આસિ તં કુલં;

તેન નન્દાતિ મે નામં, સુન્દરં પવરં અહુ.

૧૮૭. ‘‘યુવતીનઞ્ચ સબ્બાસં, કલ્યાણીતિ ચ વિસ્સુતા;

તસ્મિમ્પિ નગરે રમ્મે, ઠપેત્વા તં યસોધરં.

૧૮૮. ‘‘જેટ્ઠો ભાતા તિલોકગ્ગો, પચ્છિમો [મજ્ઝિમો (પી.)] અરહા તથા;

એકાકિની ગહટ્ઠાહં, માતરા પરિચોદિતા.

૧૮૯. ‘‘‘સાકિયમ્હિ કુલે જાતા, પુત્તે બુદ્ધાનુજા તુવં;

નન્દેનપિ વિના ભૂતા, અગારે કિં નુ અચ્છસિ.

૧૯૦. ‘‘‘જરાવસાનં યોબ્બઞ્ઞં, રૂપં અસુચિસમ્મતં;

રોગન્તમપિચારોગ્યં, જીવિતં મરણન્તિકં.

૧૯૧. ‘‘‘ઇદમ્પિ તે સુભં રૂપં, સસીકન્તં મનોહરં;

ભૂસનાનં અલઙ્કારં, સિરિસઙ્ઘાટસન્નિભં.

૧૯૨. ‘‘‘પુઞ્જિતં લોકસારંવ, નયનાનં રસાયનં;

પુઞ્ઞાનં કિત્તિજનનં, ઉક્કાકકુલનન્દનં.

૧૯૩. ‘‘‘ન ચિરેનેવ કાલેન, જરા સમધિસેસ્સતિ [સમભિભોસ્સતિ (સી. સ્યા.), સમધિહેસ્સતિ (પી.)];

વિહાય ગેહં કારુઞ્ઞે [કારુઞ્ઞે (સી. પી.), પારય્હિં (સ્યા.)], ચર ધમ્મમનિન્દિતે’.

૧૯૪. ‘‘સુત્વાહં માતુ વચનં, પબ્બજિં અનગારિયં;

દેહેન ન તુ ચિત્તેન, રૂપયોબ્બનલાળિતા.

૧૯૫. ‘‘મહતા ચ પયત્તેન, ઝાનજ્ઝેન પરં મમ;

કાતુઞ્ચ વદતે માતા, ન ચાહં તત્થ ઉસ્સુકા.

૧૯૬. ‘‘તતો મહાકારુણિકો, દિસ્વા મં કામલાલસં [કમલાનનં (સ્યા.)];

નિબ્બિન્દનત્થં રૂપસ્મિં, મમ ચક્ખુપથે જિનો.

૧૯૭. ‘‘સકેન આનુભાવેન, ઇત્થિં માપેસિ સોભિનિં;

દસ્સનીયં સુરુચિરં, મમતોપિ સુરૂપિનિં.

૧૯૮. ‘‘તમહં વિમ્હિતા દિસ્વા, અતિવિમ્હિતદેહિનિં;

ચિન્તયિં સફલં મેતિ, નેત્તલાભઞ્ચ માનુસં.

૧૯૯. ‘‘તમહં એહિ સુભગે, યેનત્થો તં વદેહિ મે;

કુલં તે નામગોત્તઞ્ચ, વદ મે યદિ તે પિયં.

૨૦૦. ‘ન વઞ્ચકાલો સુભગે [પઞ્હકાલો સુભણે (સી. સ્યા. પી.)], ઉચ્છઙ્ગે મં નિવાસય;

સીદન્તીવ મમઙ્ગાનિ, પસુપ્પય મુહુત્તકં’.

૨૦૧. ‘‘તતો સીસં મમઙ્કે સા, કત્વા સયિ સુલોચના;

તસ્સા નલાટે પતિતા, લુદ્ધા [લૂતા (સ્યા.)] પરમદારુણા.

૨૦૨. ‘‘સહ તસ્સા નિપાતેન, પિળકા ઉપપજ્જથ;

પગ્ઘરિંસુ પભિન્ના ચ, કુણપા પુબ્બલોહિતા.

૨૦૩. ‘‘પભિન્નં વદનઞ્ચાપિ, કુણપં પૂતિગન્ધનં;

ઉદ્ધુમાતં વિનિલઞ્ચ, પુબ્બઞ્ચાપિ સરીરકં.

૨૦૪. ‘‘સા પવેદિતસબ્બઙ્ગી, નિસ્સસન્તી મુહું મુહું;

વેદયન્તી સકં દુક્ખં, કરુણં પરિદેવયિ.

૨૦૫. ‘‘‘દુક્ખેન દુક્ખિતા હોમિ, ફુસયન્તિ ચ વેદના;

મહાદુક્ખે નિમુગ્ગમ્હિ, સરણં હોહિ મે સખી’.

૨૦૬. ‘‘‘કુહિં વદનસોભં તે, કુહિં તે તુઙ્ગનાસિકા;

તમ્બબિમ્બવરોટ્ઠં તે, વદનં તે કુહિં ગતં.

૨૦૭. ‘‘‘કુહિં સસીનિભં વણ્ણં, કમ્બુગીવા કુહિં ગતા;

દોળાલોલાવ [દામામાલઞ્ચ (સ્યા.), દોલોલુલ્લાવ (ક.)] તે કણ્ણા, વેવણ્ણં સમુપાગતા.

૨૦૮. ‘‘‘મકુળખારકાકારા [મકુલમ્બુરૂહાકારા (સી.), મકુળપદુમાકારા (સ્યા.)], કલિકાવ [કલસાવ (સી. સ્યા. પી.)] પયોધરા;

પભિન્ના પૂતિકુણપા, દુટ્ઠગન્ધિત્તમાગતા.

૨૦૯. ‘‘‘વેદિમજ્ઝાવ સુસ્સોણી [તનુમજ્ઝા પુથુસ્સોણી (સી. સ્યા.), વેદિમજ્ઝા પુથુસ્સોણી (પી.)], સૂનાવ નીતકિબ્બિસા;

જાતા અમેજ્ઝભરિતા, અહો રૂપમસસ્સતં.

૨૧૦. ‘‘‘સબ્બં સરીરસઞ્જાતં, પૂતિગન્ધં ભયાનકં;

સુસાનમિવ બીભચ્છં, રમન્તે યત્થ બાલિસા’.

૨૧૧. ‘‘તદા મહાકારુણિકો, ભાતા મે લોકનાયકો;

દિસ્વા સંવિગ્ગચિત્તં મં, ઇમા ગાથા અભાસથ.

૨૧૨. ‘‘‘આતુરં કુણપં પૂતિં, પસ્સ નન્દે સમુસ્સયં;

અસુભાય ચિત્તં ભાવેહિ, એકગ્ગં સુસમાહિતં.

૨૧૩. ‘‘‘યથા ઇદં તથા એતં, યથા એતં તથા ઇદં;

દુગ્ગન્ધં પૂતિકં વાતિ, બાલાનં અભિનન્દિતં.

૨૧૪. ‘‘‘એવમેતં અવેક્ખન્તી, રત્તિન્દિવમતન્દિતા;

તતો સકાય પઞ્ઞાય, અભિનિબ્બિજ્ઝ દક્ખસિ’.

૨૧૫. ‘‘તતોહં અતિસંવિગ્ગા, સુત્વા ગાથા સુભાસિતા;

તત્રટ્ઠિતાવહં સન્તી, અરહત્તમપાપુણિં.

૨૧૬. ‘‘યત્થ યત્થ નિસિન્નાહં, સદા ઝાનપરાયના;

જિનો તસ્મિં ગુણે તુટ્ઠો, એતદગ્ગે ઠપેસિ મં.

૨૧૭. ‘‘કિલેસા ઝાપિતા મય્હં…પે… વિહરામિ અનાસવા.

૨૧૮. ‘‘સ્વાગતં વત મે આસિ…પે… કતં બુદ્ધસ્સ સાસનં.

૨૧૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં નન્દા ભિક્ખુની જનપદકલ્યાણી ઇમા ગાથાયો અભાસિત્થાતિ.

નન્દાથેરિયાપદાનં પઞ્ચમં.