૪. સકુલાથેરીઅપદાનં

૧૩૧. ‘‘પદુમુત્તરો નામ જિનો, સબ્બધમ્માન પારગૂ;

ઇતો સતસહસ્સમ્હિ, કપ્પે ઉપ્પજ્જિ નાયકો.

૧૩૨. ‘‘હિતાય સબ્બસત્તાનં, સુખાય વદતં વરો;

અત્થાય પુરિસાજઞ્ઞો, પટિપન્નો સદેવકે.

૧૩૩. ‘‘યસગ્ગપત્તો સિરિમા, કિત્તિવણ્ણગતો જિનો;

પૂજિતો સબ્બલોકસ્સ, દિસાસબ્બાસુ વિસ્સુતો.

૧૩૪. ‘‘ઉત્તિણ્ણવિચિકિચ્છો સો, વીતિવત્તકથંકથો;

સમ્પુણ્ણમનસઙ્કપ્પો, પત્તો સમ્બોધિમુત્તમં.

૧૩૫. ‘‘અનુપ્પન્નસ્સ મગ્ગસ્સ, ઉપ્પાદેતા નરુત્તમો;

અનક્ખાતઞ્ચ અક્ખાસિ, અસઞ્જાતઞ્ચ સઞ્જની.

૧૩૬. ‘‘મગ્ગઞ્ઞૂ ચ મગ્ગવિદૂ, મગ્ગક્ખાયી નરાસભો;

મગ્ગસ્સ કુસલો સત્થા, સારથીનં વરુત્તમો.

૧૩૭. ‘‘મહાકારુણિકો સત્થા, ધમ્મં દેસેસિ નાયકો;

નિમુગ્ગે કામપઙ્કમ્હિ, સમુદ્ધરતિ પાણિને.

૧૩૮. ‘‘તદાહં હંસવતિયં, જાતા ખત્તિયનન્દના;

સુરૂપા સધના ચાપિ, દયિતા ચ સિરીમતી.

૧૩૯. ‘‘આનન્દસ્સ મહારઞ્ઞો, ધીતા પરમસોભણા;

વેમાતા [વેમાતુ (સી.)] ભગિની ચાપિ, પદુમુત્તરનામિનો.

૧૪૦. ‘‘રાજકઞ્ઞાહિ સહિતા, સબ્બાભરણભૂસિતા;

ઉપાગમ્મ મહાવીરં, અસ્સોસિં ધમ્મદેસનં.

૧૪૧. ‘‘તદા હિ સો લોકગરુ, ભિક્ખુનિં દિબ્બચક્ખુકં;

કિત્તયં પરિસામજ્ઝે [ચતુપરિસાય મજ્ઝે (સ્યા.)], અગ્ગટ્ઠાને ઠપેસિ તં.

૧૪૨. ‘‘સુણિત્વા તમહં હટ્ઠા, દાનં દત્વાન સત્થુનો;

પૂજિત્વાન ચ સમ્બુદ્ધં, દિબ્બચક્ખું અપત્થયિં.

૧૪૩. ‘‘તતો અવોચ મં સત્થા, ‘નન્દે લચ્છસિ પત્થિતં;

પદીપધમ્મદાનાનં, ફલમેતં સુનિચ્છિતં.

૧૪૪. ‘‘‘સતસહસ્સિતો કપ્પે, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૧૪૫. ‘‘‘તસ્સ ધમ્મેસુ દાયાદા, ઓરસા ધમ્મનિમ્મિતા;

સકુલા નામ નામેન [સકુલાતિ ચ નામેન (સ્યા.)], હેસ્સતિ સત્થુ સાવિકા’.

૧૪૬. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૧૪૭. ‘‘ઇમમ્હિ ભદ્દકે કપ્પે, બ્રહ્મબન્ધુ મહાયસો;

કસ્સપો નામ ગોત્તેન, ઉપ્પજ્જિ વદતં વરો.

૧૪૮. ‘‘પરિબ્બાજકિની આસિં, તદાહં એકચારિની;

ભિક્ખાય વિચરિત્વાન, અલભિં તેલમત્તકં.

૧૪૯. ‘‘તેન દીપં પદીપેત્વા, ઉપટ્ઠિં સબ્બસંવરિં;

ચેતિયં દ્વિપદગ્ગસ્સ [દિપદગ્ગસ્સ (સી. સ્યા. પી.)], વિપ્પસન્નેન ચેતસા.

૧૫૦. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૧૫૧. ‘‘યત્થ યત્થૂપપજ્જામિ, તસ્સ કમ્મસ્સ વાહસા;

પજ્જલન્તિ [સઞ્જલન્તિ (સ્યા. ક.), સંચરન્તિ (પી.)] મહાદીપા, તત્થ તત્થ ગતાય મે.

૧૫૨. ‘‘તિરોકુટ્ટં તિરોસેલં, સમતિગ્ગય્હ પબ્બતં;

પસ્સામહં યદિચ્છામિ, દીપદાનસ્સિદં ફલં.

૧૫૩. ‘‘વિસુદ્ધનયના હોમિ, યસસા ચ જલામહં;

સદ્ધાપઞ્ઞાવતી ચેવ, દીપદાનસ્સિદં ફલં.

૧૫૪. ‘‘પચ્છિમે ચ ભવે દાનિ, જાતા વિપ્પકુલે અહં;

પહૂતધનધઞ્ઞમ્હિ, મુદિતે રાજપૂજિતે.

૧૫૫. ‘‘અહં સબ્બઙ્ગસમ્પન્ના, સબ્બાભરણભૂસિતા;

પુરપ્પવેસે સુગતં, વાતપાને ઠિતા અહં.

૧૫૬. ‘‘દિસ્વા જલન્તં યસસા, દેવમનુસ્સસક્કતં;

અનુબ્યઞ્જનસમ્પન્નં, લક્ખણેહિ વિભૂસિતં.

૧૫૭. ‘‘ઉદગ્ગચિત્તા સુમના, પબ્બજ્જં સમરોચયિં;

ન ચિરેનેવ કાલેન, અરહત્તમપાપુણિં.

૧૫૮. ‘‘ઇદ્ધીસુ ચ વસી હોમિ, દિબ્બાય સોતધાતુયા;

પરચિત્તાનિ જાનામિ, સત્થુસાસનકારિકા.

૧૫૯. ‘‘પુબ્બેનિવાસં જાનામિ, દિબ્બચક્ખુ વિસોધિતં;

ખેપેત્વા આસવે સબ્બે, વિસુદ્ધાસિં સુનિમ્મલા.

૧૬૦. ‘‘પરિચિણ્ણો મયા સત્થા, કતં બુદ્ધસ્સ સાસનં;

ઓહિતો ગરુકો ભારો, ભવનેત્તિ સમૂહતા.

૧૬૧. ‘‘યસ્સત્થાય પબ્બજિતા, અગારસ્માનગારિયં;

સો મે અત્થો અનુપ્પત્તો, સબ્બસંયોજનક્ખયો.

૧૬૨. ‘‘તતો મહાકારુણિકો, એતદગ્ગે ઠપેસિ મં;

દિબ્બચક્ખુકાનં અગ્ગા, સકુલાતિ નરુત્તમો.

૧૬૩. ‘‘કિલેસા ઝાપિતા મય્હં…પે… વિહરામિ અનાસવા.

૧૬૪. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૬૫. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં સકુલા ભિક્ખુની ઇમા ગાથાયો અભાસિત્થાતિ.

સકુલાથેરિયાપદાનં ચતુત્થં.