૬. નળમાલિકાથેરીઅપદાનં

૮૬. ‘‘ચન્દભાગાનદીતીરે, અહોસિં કિન્નરી તદા;

અદ્દસં વિરજં બુદ્ધં, સયમ્ભું અપરાજિતં.

૮૭. ‘‘પસન્નચિત્તા સુમના, વેદજાતા કતઞ્જલી;

નળમાલં ગહેત્વાન, સયમ્ભું અભિપૂજયિં.

૮૮. ‘‘તેન કમ્મેન સુકતેન, ચેતનાપણિધીહિ ચ;

જહિત્વા કિન્નરીદેહં [માનસં દેહં (સી. પી. ક.) સુમેધાવગ્ગેપિ], તાવતિંસમગચ્છહં.

૮૯. ‘‘છત્તિંસદેવરાજૂનં, મહેસિત્તમકારયિં;

મનસા પત્થિતં મય્હં, નિબ્બત્તતિ યથિચ્છિતં.

૯૦. ‘‘દસન્નં ચક્કવત્તીનં, મહેસિત્તમકારયિં;

ઓચિતત્તાવ [સુચિતત્તાવ (પી.)] હુત્વાન, સંસરામિ ભવેસ્વહં.

૯૧. ‘‘કુસલં વિજ્જતે મય્હં, પબ્બજિં અનગારિયં;

પૂજારહા અહં અજ્જ, સક્યપુત્તસ્સ સાસને.

૯૨. ‘‘વિસુદ્ધમનસા અજ્જ, અપેતમનપાપિકા;

સબ્બાસવપરિક્ખીણા, નત્થિ દાનિ પુનબ્ભવો.

૯૩. ‘‘ચતુન્નવુતિતો કપ્પે, યં બુદ્ધમભિપૂજયિં;

દુગ્ગતિં નાભિજાનામિ, નળમાલાયિદં ફલં.

૯૪. ‘‘કિલેસા ઝાપિતા મય્હં…પે… વિહરામિ અનાસવા.

૯૫. ‘‘સ્વાગતં વત મે આસિ…પે… કતં બુદ્ધસ્સ સાસનં.

૯૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં નળમાલિકા ભિક્ખુની ઇમા ગાથાયો અભાસિત્થાતિ.

નળમાલિકાથેરિયાપદાનં છટ્ઠં.