૨. એકૂપોસથિકવગ્ગો

૧. એકૂપોસથિકાથેરીઅપદાનં

૧. ‘‘નગરે બન્ધુમતિયા, બન્ધુમા નામ ખત્તિયો;

દિવસે પુણ્ણમાય સો, ઉપવસિ ઉપોસથં.

૨. ‘‘અહં તેન સમયેન, કુમ્ભદાસી અહં તહિં;

દિસ્વા સરાજકં સેનં, એવાહં ચિન્તયિં તદા.

૩. ‘રાજાપિ રજ્જં છડ્ડેત્વા, ઉપવસિ ઉપોસથં;

સફલં નૂન તં કમ્મં, જનકાયો પમોદિતો’.

૪. ‘‘યોનિસો પચ્ચવેક્ખિત્વા, દુગ્ગચ્ચઞ્ચ [દુગ્ગતિઞ્ચ (સ્યા.)] દલિદ્દતં [દળિદ્દતં (સી.)];

માનસં સમ્પહંસિત્વા, ઉપવસિં ઉપોસથં.

૫. ‘‘અહં ઉપોસથં કત્વા, સમ્માસમ્બુદ્ધસાસને;

તેન કમ્મેન સુકતેન, તાવતિંસમગચ્છહં.

૬. ‘‘તત્થ મે સુકતં બ્યમ્હં, ઉબ્ભયોજનમુગ્ગતં [ઉદ્ધં યોજનમુગ્ગતં (સી. સ્યા. પી.)];

કૂટાગારવરૂપેતં, મહાસનસુભૂસિતં.

૭. ‘‘અચ્છરા સતસહસ્સા, ઉપતિટ્ઠન્તિ મં સદા;

અઞ્ઞે દેવે અતિક્કમ્મ, અતિરોચામિ સબ્બદા.

૮. ‘‘ચતુસટ્ઠિ દેવરાજૂનં, મહેસિત્તમકારયિં;

તેસટ્ઠિ ચક્કવત્તીનં, મહેસિત્તમકારયિં.

૯. ‘‘સુવણ્ણવણ્ણા હુત્વાન, ભવેસુ સંસરામહં;

સબ્બત્થ પવરા હોમિ, ઉપોસથસ્સિદં ફલં.

૧૦. ‘‘હત્થિયાનં અસ્સયાનં, રથયાનઞ્ચ સીવિકં [કેવલં (સી. સ્યા. પી.)];

લભામિ સબ્બમેવેતં, ઉપોસથસ્સિદં ફલં.

૧૧. ‘‘સોણ્ણમયં રૂપિમયં, અથોપિ ફલિકામયં;

લોહિતઙ્ગમયઞ્ચેવ, સબ્બં પટિલભામહં.

૧૨. ‘‘કોસેય્યકમ્બલિયાનિ, ખોમકપ્પાસિકાનિ ચ;

મહગ્ઘાનિ ચ વત્થાનિ, સબ્બં પટિલભામહં.

૧૩. ‘‘અન્નં પાનં ખાદનીયં, વત્થસેનાસનાનિ ચ;

સબ્બમેતં પટિલભે, ઉપોસથસ્સિદં ફલં.

૧૪. ‘‘વરગન્ધઞ્ચ માલઞ્ચ, ચુણ્ણકઞ્ચ વિલેપનં;

સબ્બમેતં પટિલભે, ઉપોસથસ્સિદં ફલં.

૧૫. ‘‘કૂટાગારઞ્ચ પાસાદં, મણ્ડપં હમ્મિયં ગુહં;

સબ્બમેતં પટિલભે, ઉપોસથસ્સિદં ફલં.

૧૬. ‘‘જાતિયા સત્તવસ્સાહં, પબ્બજિં અનગારિયં;

અડ્ઢમાસે અસમ્પત્તે, અરહત્તમપાપુણિં.

૧૭. ‘‘કિલેસા ઝાપિતા મય્હં, ભવા સબ્બે સમૂહતા;

સબ્બાસવપરિક્ખીણા, નત્થિ દાનિ પુનબ્ભવો.

૧૮. ‘‘એકનવુતિતો કપ્પે, યં કમ્મમકરિં તદા;

દુગ્ગતિં નાભિજાનામિ, ઉપોસથસ્સિદં ફલં.

૧૯. ‘‘કિલેસા ઝાપિતા મય્હં…પે… વિહરામિ અનાસવા.

૨૦. ‘‘સ્વાગતં વત મે આસિ…પે… કતં બુદ્ધસ્સ સાસનં.

૨૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં એકૂપોસથિકા ભિક્ખુની ઇમા ગાથાયો અભાસિત્થાતિ.

એકૂપોસથિકાથેરિયાપદાનં પઠમં.

૨. સળલપુપ્ફિકાથેરીઅપદાનં

૨૨. ‘‘ચન્દભાગાનદીતીરે, અહોસિં કિન્નરી તદા;

અદ્દસાહં દેવદેવં, ચઙ્કમન્તં નરાસભં.

૨૩. ‘‘ઓચિનિત્વાન સળલં, બુદ્ધસેટ્ઠસ્સદાસહં;

ઉપસિઙ્ઘિ મહાવીરો, સળલં દેવગન્ધિકં.

૨૪. ‘‘પટિગ્ગહેત્વા સમ્બુદ્ધો, વિપસ્સી લોકનાયકો;

ઉપસિઙ્ઘિ મહાવીરો, પેક્ખમાનાય મે તદા.

૨૫. ‘‘અઞ્જલિં પગ્ગહેત્વાન, વન્દિત્વા દ્વિપદુત્તમં [દિપદુત્તમં (સી. સ્યા. પી.)];

સકં ચિત્તં પસાદેત્વા, તતો પબ્બતમારુહિં.

૨૬. ‘‘એકનવુતિતો કપ્પે, યં પુપ્ફમદદિં તદા;

દુગ્ગતિં નાભિજાનામિ, બુદ્ધપૂજાયિદં ફલં.

૨૭. ‘‘કિલેસા ઝાપિતા મય્હં…પે… વિહરામિ અનાસવા.

૨૮. ‘‘સ્વાગતં વત મે આસિ…પે… કતં બુદ્ધસ્સ સાસનં.

૨૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં સળલપુપ્ફિકા ભિક્ખુની ઇમા ગાથાયો અભાસિત્થાતિ.

સળલપુપ્ફિકાથેરિયાપદાનં દુતિયં.

૩. મોદકદાયિકાથેરીઅપદાનં

૩૦. ‘‘નગરે બન્ધુમતિયા, કુમ્ભદાસી અહોસહં;

મમ ભાગં ગહેત્વાન, ગચ્છં ઉદકહારિકા [ઉદકહારિકં (સી.), ઉદકહારિકે (સ્યા.)].

૩૧. ‘‘પન્થમ્હિ સમણં દિસ્વા, સન્તચિત્તં સમાહતં;

પસન્નચિત્તા સુમના, મોદકે તીણિદાસહં.

૩૨. ‘‘તેન કમ્મેન સુકતેન, ચેતનાપણિધીહિ ચ;

એકનવુતિકપ્પાનિ [એકૂનતિંસકપ્પાનિ (સ્યા.)], વિનિપાતં નગચ્છહં.

૩૩. ‘‘સમ્પત્તિ તં [સમ્પત્તિઞ્ચ (સ્યા.), સમ્પત્તિકં (ક.)] કરિત્વાન, સબ્બં અનુભવિં અહં;

મોદકે તીણિ દત્વાન, પત્તાહં અચલં પદં.

૩૪. ‘‘કિલેસા ઝાપિતા મય્હં…પે… વિહરામિ અનાસવા.

૩૫. ‘‘સ્વાગતં વત મે આસિ…પે… કતં બુદ્ધસ્સ સાસનં.

૩૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં મોદકદાયિકા ભિક્ખુની ઇમા ગાથાયો અભાસિત્થાતિ.

મોદકદાયિકાથેરિયાપદાનં તતિયં.

૪. એકાસનદાયિકાથેરીઅપદાનં

૩૭. ‘‘નગરે હંસવતિયા, અહોસિં બાલિકા [માલિકા (સ્યા. પી.)] તદા;

માતા ચ મે પિતા ચેવ, કમ્મન્તં અગમંસુ તે.

૩૮. ‘‘મજ્ઝન્હિકમ્હિ સૂરિયે, અદ્દસં સમણં અહં;

વીથિયા અનુગચ્છન્તં, આસનં પઞ્ઞપેસહં.

૩૯. ‘‘ગોનકાવિકતિકાહિ [ગોનકચિત્તકાદીહિ (સી.)], પઞ્ઞપેત્વા મમાસનં;

પસન્નચિત્તા સુમના, ઇદં વચનમબ્રવિં.

૪૦. ‘‘‘સન્તત્તા કુથિતા ભૂમિ, સૂરો મજ્ઝન્હિકે ઠિતો;

માલુતા ચ ન વાયન્તિ, કાલો ચેવેત્થ મેહિતિ [ચેત્થ ઉપટ્ઠિતો (સી.), ચેવત્થં એતિ તં (પી.)].

૪૧. ‘‘‘પઞ્ઞત્તમાસનમિદં, તવત્થાય મહામુનિ;

અનુકમ્પં ઉપાદાય, નિસીદ મમ આસને’.

૪૨. ‘‘નિસીદિ તત્થ સમણો, સુદન્તો સુદ્ધમાનસો;

તસ્સ પત્તં ગહેત્વાન, યથારન્ધં અદાસહં.

૪૩. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૪૪. ‘‘તત્થ મે સુકતં બ્યમ્હં, આસનેન સુનિમ્મિતં;

સટ્ઠિયોજનમુબ્બેધં, તિંસયોજનવિત્થતં.

૪૫. ‘‘સોણ્ણમયા મણિમયા, અથોપિ ફલિકામયા;

લોહિતઙ્ગમયા ચેવ, પલ્લઙ્કા વિવિધા મમ.

૪૬. ‘‘તૂલિકા વિકતિકાહિ, કટ્ટિસ્સચિત્તકાહિ ચ;

ઉદ્દએકન્તલોમી ચ, પલ્લઙ્કા મે સુસણ્ઠિતા [સુસન્થતા (સી.)].

૪૭. ‘‘યદા ઇચ્છામિ ગમનં, હાસખિડ્ડસમપ્પિતા;

સહ પલ્લઙ્કસેટ્ઠેન, ગચ્છામિ મમ પત્થિતં.

૪૮. ‘‘અસીતિ દેવરાજૂનં, મહેસિત્તમકારયિં;

સત્તતિ ચક્કવત્તીનં, મહેસિત્તમકારયિં.

૪૯. ‘‘ભવાભવે સંસરન્તી, મહાભોગં લભામહં;

ભોગે મે ઊનતા નત્થિ, એકાસનસ્સિદં ફલં [એકાસનફલં ઇદં (સબ્બત્થ) એવમુપરિપિ].

૫૦. ‘‘દુવે ભવે સંસરામિ, દેવત્તે અથ માનુસે;

અઞ્ઞે ભવે ન જાનામિ, એકાસનસ્સિદં ફલં.

૫૧. ‘‘દુવે કુલે પજાયામિ, ખત્તિયે ચાપિ બ્રાહ્મણે;

ઉચ્ચાકુલીના [ઉચ્ચાકુલિકા (સ્યા. પી. ક.)] સબ્બત્થ, એકાસનસ્સિદં ફલં.

૫૨. ‘‘દોમનસ્સં ન જાનામિ, ચિત્તસન્તાપનં મમ;

વેવણ્ણિયં ન જાનામિ, એકાસનસ્સિદં ફલં.

૫૩. ‘‘ધાતિયો મં ઉપટ્ઠન્તિ, ખુજ્જા ચેલાપિકા [ખેલાપિકા (સી.), ચેલાવિકા (પી.)] બહૂ;

અઙ્કેન અઙ્કં ગચ્છામિ, એકાસનસ્સિદં ફલં.

૫૪. ‘‘અઞ્ઞા ન્હાપેન્તિ ભોજેન્તિ, અઞ્ઞા રમેન્તિ મં સદા;

અઞ્ઞા ગન્ધં વિલિમ્પન્તિ, એકાસનસ્સિદં ફલં [અઞ્ઞા મમેવ ન્હાપેન્તિ, અઞ્ઞા ભોજેન્તિ ભોજનં; અઞ્ઞા મં અલઙ્કરોન્તિ, અઞ્ઞા રમેન્તિ મં સદ્ધા; (સ્યા.)].

૫૫. ‘‘મણ્ડપે રુક્ખમૂલે વા, સુઞ્ઞાગારે વસન્તિયા;

મમ સઙ્કપ્પમઞ્ઞાય, પલ્લઙ્કો ઉપતિટ્ઠતિ.

૫૬. ‘‘અયં પચ્છિમકો મય્હં, ચરિમો વત્તતે ભવો;

અજ્જાપિ રજ્જં છડ્ડેત્વા, પબ્બજિં અનગારિયં.

૫૭. ‘‘સતસહસ્સિતો કપ્પે, યં દાનમદદિં તદા;

દુગ્ગતિં નાભિજાનામિ, એકાસનસ્સિદં ફલં.

૫૮. ‘‘કિલેસા ઝાપિતા મય્હં…પે… વિહરામિ અનાસવા.

૫૯. ‘‘સ્વાગતં વત મે આસિ…પે… કતં બુદ્ધસ્સ સાસનં.

૬૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં એકાસનદાયિકા ભિક્ખુની ઇમા ગાથાયો અભાસિત્થાતિ.

એકાસનદાયિકાથેરિયાપદાનં ચતુત્થં.

૫. પઞ્ચદીપદાયિકાથેરીઅપદાનં

૬૧. ‘‘નગરે હંસવતિયા, ચારિકી [ચારિકા (સી. સ્યા.)] આસહં તદા;

આરામેન ચ આરામં [આરામેન વિહારેન (સ્યા. પી.)], ચરામિ કુસલત્થિકા.

૬૨. ‘‘કાળપક્ખમ્હિ દિવસે, અદ્દસં બોધિમુત્તમં;

તત્થ ચિત્તં પસાદેત્વા, બોધિમૂલે નિસીદહં.

૬૩. ‘‘ગરુચિત્તં ઉપટ્ઠેત્વા, સિરે કત્વાન અઞ્જલિં;

સોમનસ્સં પવેદેત્વા, એવં ચિન્તેસિ તાવદે.

૬૪. ‘‘‘યદિ બુદ્ધો અમિતગુણો, અસમપ્પટિપુગ્ગલો;

દસ્સેતુ પાટિહીરં મે, બોધિ ઓભાસતુ અયં’.

૬૫. ‘‘સહ આવજ્જિતે મય્હં, બોધિ પજ્જલિ તાવદે;

સબ્બસોણ્ણમયા આસિ, દિસા સબ્બા વિરોચતિ.

૬૬. ‘‘સત્તરત્તિન્દિવં તત્થ, બોધિમૂલે નિસીદહં;

સત્તમે દિવસે પત્તે, દીપપૂજં અકાસહં.

૬૭. ‘‘આસનં પરિવારેત્વા, પઞ્ચ દીપાનિ પજ્જલું;

યાવ ઉદેતિ સૂરિયો, દીપા મે પજ્જલું તદા.

૬૮. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૬૯. ‘‘તત્થ મે સુકતં બ્યમ્હં, પઞ્ચદીપાતિ વુચ્ચતિ;

સટ્ઠિયોજનમુબ્બેધં, તિંસયોજનવિત્થતં.

૭૦. ‘‘અસઙ્ખિયાનિ દીપાનિ, પરિવારે જલિંસુ મે;

યાવતા દેવભવનં, દીપાલોકેન જોતતિ.

૭૧. ‘‘પરમ્મુખા [પુબ્બમુખા (સ્યા.)] નિસીદિત્વા, યદિ ઇચ્છામિ પસ્સિતું;

ઉદ્ધં અધો ચ તિરિયં, સબ્બં પસ્સામિ ચક્ખુના.

૭૨. ‘‘યાવતા અભિકઙ્ખામિ, દટ્ઠું સુગતદુગ્ગતે [સુકતદુક્કટે (પી.)];

તત્થ આવરણં નત્થિ, રુક્ખેસુ પબ્બતેસુ વા.

૭૩. ‘‘અસીતિ દેવરાજૂનં, મહેસિત્તમકારયિં;

સતાનં ચક્કવત્તીનં, મહેસિત્તમકારયિં.

૭૪. ‘‘યં યં યોનુપપજ્જામિ, દેવત્તં અથ માનુસં;

દીપસતસહસ્સાનિ, પરિવારે જલન્તિ મે.