૧૦. પટાચારાથેરીઅપદાનં

૪૬૮. ‘‘પદુમુત્તરો નામ જિનો, સબ્બધમ્માન પારગૂ;

ઇતો સતસહસ્સમ્હિ, કપ્પે ઉપ્પજ્જિ નાયકો.

૪૬૯. ‘‘તદાહં હંસવતિયં, જાતા સેટ્ઠિકુલે અહું;

નાનારતનપજ્જોતે, મહાસુખસમપ્પિતા.

૪૭૦. ‘‘ઉપેત્વા તં મહાવીરં, અસ્સોસિં ધમ્મદેસનં;

તતો જાતપસાદાહં, ઉપેસિં સરણં જિનં.

૪૭૧. ‘‘તતો વિનયધારીનં, અગ્ગં વણ્ણેસિ નાયકો;

ભિક્ખુનિં લજ્જિનિં તાદિં, કપ્પાકપ્પવિસારદં.

૪૭૨. ‘‘તદા મુદિતચિત્તાહં, તં ઠાનમભિકઙ્ખિની;

નિમન્તેત્વા દસબલં, સસઙ્ઘં લોકનાયકં.

૪૭૩. ‘‘ભોજયિત્વાન સત્તાહં, દદિત્વાવ તિચીવરં [દદિત્વા પત્તચીવરં (સ્યા.)];

નિપચ્ચ સિરસા પાદે, ઇદં વચનમબ્રવિં.

૪૭૪. ‘‘‘યા તયા વણ્ણિતા વીર, ઇતો અટ્ઠમકે મુનિ;

તાદિસાહં ભવિસ્સામિ, યદિ સિજ્ઝતિ નાયક’.

૪૭૫. ‘‘તદા અવોચ મં સત્થા, ‘ભદ્દે મા ભાયિ અસ્સસ;

અનાગતમ્હિ અદ્ધાને, લચ્છસે તં મનોરથં.

૪૭૬. ‘‘‘સતસહસ્સિતો કપ્પે, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૪૭૭. ‘‘‘તસ્સ ધમ્મેસુ દાયાદા, ઓરસા ધમ્મનિમ્મિતા;

પટાચારાતિ નામેન, હેસ્સતિ સત્થુ સાવિકા’.

૪૭૮. ‘‘તદાહં મુદિતા [પમુદી (ક.)] હુત્વા, યાવજીવં તદા જિનં;

મેત્તચિત્તા પરિચરિં, સસઙ્ઘં લોકનાયકં.

૪૭૯. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૪૮૦. ‘‘ઇમમ્હિ ભદ્દકે કપ્પે, બ્રહ્મબન્ધુ મહાયસો;

કસ્સપો નામ ગોત્તેન, ઉપ્પજ્જિ વદતં વરો.

૪૮૧. ‘‘ઉપટ્ઠાકો મહેસિસ્સ, તદા આસિ નરિસ્સરો;

કાસિરાજા કિકી નામ, બારાણસિપુરુત્તમે.

૪૮૨. ‘‘તસ્સાસિં તતિયા ધીતા, ભિક્ખુની ઇતિ વિસ્સુતા;

ધમ્મં સુત્વા જિનગ્ગસ્સ, પબ્બજ્જં સમરોચયિં.

૪૮૩. ‘‘અનુજાનિ ન નો તાતો, અગારેવ તદા મયં;

વીસવસ્સસહસ્સાનિ, વિચરિમ્હ અતન્દિતા.

૪૮૪. ‘‘કોમારિબ્રહ્મચરિયં, રાજકઞ્ઞા સુખેધિતા;

બુદ્ધોપટ્ઠાનનિરતા, મુદિતા સત્તધીતરો.

૪૮૫. ‘‘સમણી સમણગુત્તા ચ, ભિક્ખુની ભિક્ખુદાયિકા;

ધમ્મા ચેવ સુધમ્મા ચ, સત્તમી સઙ્ઘદાયિકા.

૪૮૬. ‘‘અહં ઉપ્પલવણ્ણા ચ, ખેમા ભદ્દા ચ ભિક્ખુની;

કિસાગોતમી ધમ્મદિન્ના, વિસાખા હોતિ સત્તમી.

૪૮૭. ‘‘તેહિ કમ્મેહિ સુકતેહિ, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૪૮૮. ‘‘પચ્છિમે ચ ભવે દાનિ, જાતા સેટ્ઠિકુલે અહં;

સાવત્થિયં પુરવરે, ઇદ્ધે ફીતે મહદ્ધને.

૪૮૯. ‘‘યદા ચ યોબ્બનૂપેતા, વિતક્કવસગા અહં;

નરં જારપતિં દિસ્વા, તેન સદ્ધિં અગચ્છહં.

૪૯૦. ‘‘એકપુત્તપસૂતાહં, દુતિયો કુચ્છિયા મમં;

તદાહં માતાપિતરો, ઓક્ખામીતિ [ઇક્ખામીતિ (સ્યા.), દક્ખામીતિ (સી.)] સુનિચ્છિતા.

૪૯૧. ‘‘નારોચેસિં પતિં મય્હં, તદા તમ્હિ પવાસિતે;

એકિકા નિગ્ગતા ગેહા, ગન્તું સાવત્થિમુત્તમં.

૪૯૨. ‘‘તતો મે સામિ આગન્ત્વા, સમ્ભાવેસિ પથે મમં;

તદા મે કમ્મજા વાતા, ઉપ્પન્ના અતિદારુણા.

૪૯૩. ‘‘ઉટ્ઠિતો ચ મહામેઘો, પસૂતિસમયે મમ;

દબ્બત્થાય તદા ગન્ત્વા, સામિ સપ્પેન મારિતો.

૪૯૪. ‘‘તદા વિજાતદુક્ખેન, અનાથા કપણા અહં;

કુન્નદિં પૂરિતં દિસ્વા, ગચ્છન્તી સકુલાલયં.

૪૯૫. ‘‘બાલં આદાય અતરિં, પારકૂલે ચ એકકં;

સાયેત્વા [પાયેત્વા (સ્યા.), પાતેત્વા (ક.)] બાલકં પુત્તં, ઇતરં તરણાયહં.

૪૯૬. ‘‘નિવત્તા ઉક્કુસો હાસિ, તરુણં વિલપન્તકં;

ઇતરઞ્ચ વહી સોતો, સાહં સોકસમપ્પિતા.

૪૯૭. ‘‘સાવત્થિનગરં ગન્ત્વા, અસ્સોસિં સજને મતે;

તદા અવોચં સોકટ્ટા, મહાસોકસમપ્પિતા.

૪૯૮. ‘‘ઉભો પુત્તા કાલઙ્કતા, પન્થે મય્હં પતી મતો;

માતા પિતા ચ ભાતા ચ, એકચિતમ્હિ ડય્હરે.

૪૯૯. ‘‘તદા કિસા ચ પણ્ડુ ચ, અનાથા દીનમાનસા;

ઇતો તતો ભમન્તીહં [ગચ્છન્તીહં (સ્યા.), ગમેન્તીહં (ક.)], અદ્દસં નરસારથિં.

૫૦૦. ‘‘તતો અવોચ મં સત્થા, ‘પુત્તે મા સોચિ અસ્સસ;

અત્તાનં તે ગવેસસ્સુ, કિં નિરત્થં વિહઞ્ઞસિ.

૫૦૧. ‘‘‘ન સન્તિ પુત્તા તાણાય, ન ઞાતી નપિ બન્ધવા;

અન્તકેનાધિપન્નસ્સ, નત્થિ ઞાતીસુ તાણતા’.

૫૦૨. ‘‘તં સુત્વા મુનિનો વાક્યં, પઠમં ફલમજ્ઝગં;

પબ્બજિત્વાન નચિરં, અરહત્તમપાપુણિં.

૫૦૩. ‘‘ઇદ્ધીસુ ચ વસી હોમિ, દિબ્બાય સોતધાતુયા;

પરચિત્તાનિ જાનામિ, સત્થુસાસનકારિકા.

૫૦૪. ‘‘પુબ્બેનિવાસં જાનામિ, દિબ્બચક્ખુ વિસોધિતં;

ખેપેત્વા આસવે સબ્બે, વિસુદ્ધાસિં સુનિમ્મલા.

૫૦૫. ‘‘તતોહં વિનયં સબ્બં, સન્તિકે સબ્બદસ્સિનો;

ઉગ્ગહિં સબ્બવિત્થારં, બ્યાહરિઞ્ચ યથાતથં.

૫૦૬. ‘‘જિનો તસ્મિં ગુણે તુટ્ઠો, એતદગ્ગે ઠપેસિ મં;

અગ્ગા વિનયધારીનં, પટાચારાવ એકિકા.

૫૦૭. ‘‘પરિચિણ્ણો મયા સત્થા, કતં બુદ્ધસ્સ સાસનં;

ઓહિતો ગરુકો ભારો, ભવનેત્તિ સમૂહતા.

૫૦૮. ‘‘યસ્સત્થાય પબ્બજિતા, અગારસ્માનગારિયં;

સો મે અત્થો અનુપ્પત્તો, સબ્બસંયોજનક્ખયો.

૫૦૯. ‘‘કિલેસા ઝાપિતા મય્હં…પે… વિહરામિ અનાસવા.

૫૧૦. ‘‘સ્વાગતં વત મે આસિ…પે… કતં બુદ્ધસ્સ સાસનં.

૫૧૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં પટાચારા ભિક્ખુની ઇમા ગાથાયો અભાસિત્થાતિ.

પટાચારાથેરિયાપદાનં દસમં.

એકૂપોસથિકવગ્ગો દુતિયો.