૧. સુમેધાથેરીઅપદાનં

અથ થેરિકાપદાનાનિ સુણાથ –

૧. ‘‘ભગવતિ કોણાગમને, સઙ્ઘારામમ્હિ નવનિવેસનમ્હિ [નિવેસમ્હિ (સ્યા.)];

સખિયો તિસ્સો જનિયો, વિહારદાનં અદાસિમ્હ.

૨. ‘‘દસક્ખત્તું સતક્ખત્તું, દસસતક્ખત્તું સતાનઞ્ચ સતક્ખત્તું [સતાનિ ચ સત્તક્ખત્તું (સી. ક.)];

દેવેસુ ઉપપજ્જિમ્હ, કો વાદો માનુસે ભવે.

૩. ‘‘દેવે મહિદ્ધિકા અહુમ્હ, માનુસકમ્હિ કો વાદો;

સત્તરતનમહેસી [સત્તરતનસ્સ મહેસી (સી. પી.)], ઇત્થિરતનં અહં ભવિં.

૪. ‘‘ઇધ સઞ્ચિતકુસલા [તત્થ સઞ્ચિતં કુસલં (સ્યા.)], સુસમિદ્ધકુલપ્પજા;

ધનઞ્જાની ચ ખેમા ચ, અહમ્પિ ચ તયો જના.

૫. ‘‘આરામં સુકતં કત્વા, સબ્બાવયવમણ્ડિતં;

બુદ્ધપ્પમુખસઙ્ઘસ્સ, નિય્યાદેત્વા સમોદિતા.

૬. ‘‘યત્થ યત્થૂપપજ્જામિ, તસ્સ કમ્મસ્સ વાહસા;

દેવેસુ અગ્ગતં પત્તા, મનુસ્સેસુ તથેવ ચ.

૭. ‘‘ઇમસ્મિંયેવ કપ્પમ્હિ, બ્રહ્મબન્ધુ મહાયસો;

કસ્સપો નામ ગોત્તેન, ઉપ્પજ્જિ વદતં વરો.

૮. ‘‘ઉપટ્ઠાકો મહેસિસ્સ, તદા આસિ નરિસ્સરો;

કાસિરાજા કિકી નામ, બારાણસિપુરુત્તમે.

૯. ‘‘તસ્સાસું સત્ત ધીતરો, રાજકઞ્ઞા સુખેધિતા [સુખેથિતા (સ્યા.)];

બુદ્ધોપટ્ઠાનનિરતા, બ્રહ્મચરિયં ચરિંસુ તા.

૧૦. ‘‘તાસં સહાયિકા હુત્વા, સીલેસુ સુસમાહિતા;

દત્વા દાનાનિ સક્કચ્ચં, અગારેવ વતં [અગારેવ વત્તં (સ્યા.)] ચરિં.

૧૧. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસૂપગા અહં.

૧૨. ‘‘તતો ચુતા યામમગં [યામસગ્ગં (સ્યા.)], તતોહં તુસિતં ગતા;

તતો ચ નિમ્માનરતિં, વસવત્તિપુરં તતો.

૧૩. ‘‘યત્થ યત્થૂપપજ્જામિ, પુઞ્ઞકમ્મસમોહિતા;

તત્થ તત્થેવ રાજૂનં, મહેસિત્તમકારયિં.

૧૪. ‘‘તતો ચુતા મનુસ્સત્તે, રાજૂનં ચક્કવત્તિનં;

મણ્ડલીનઞ્ચ રાજૂનં, મહેસિત્તમકારયિં.

૧૫. ‘‘સમ્પત્તિમનુભોત્વાન, દેવેસુ માનુસેસુ ચ;

સબ્બત્થ સુખિતા હુત્વા, નેકજાતીસુ સંસરિં.

૧૬. ‘‘સો હેતુ ચ સો પભવો, તમ્મૂલં સાસને ખમં [તમ્મૂલં સા ચ સાસને ખન્તિ (સી. પી. ક.)];

પઠમં તં સમોધાનં, તં ધમ્મરતાય નિબ્બાનં [નિબ્બુતં (સ્યા.)].

૧૭. ‘‘કિલેસા ઝાપિતા મય્હં, ભવા સબ્બે સમૂહતા;

નાગીવ બન્ધનં છેત્વા, વિહરામિ અનાસવા.

૧૮. ‘‘સ્વાગતં વત મે આસિ, મમ બુદ્ધસ્સ [બુદ્ધસેટ્ઠસ્સ (સી. સ્યા. ક.)] સન્તિકે;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૧૯. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં સુમેધા ભિક્ખુની ઇમા ગાથાયો અભાસિત્થાતિ.

સુમેધાથેરિયાપદાનં પઠમં.