૮. હેમકમાણવપુચ્છા

૧૦૯૦. ‘‘યે મે પુબ્બે વિયાકંસુ, (ઇચ્ચાયસ્મા હેમકો)

હુરં ગોતમસાસના;

ઇચ્ચાસિ ઇતિ ભવિસ્સતિ, સબ્બં તં ઇતિહીતિહં;

સબ્બં તં તક્કવડ્ઢનં, નાહં તત્થ અભિરમિં.

૧૦૯૧. ‘‘ત્વઞ્ચ મે ધમ્મમક્ખાહિ, તણ્હાનિગ્ઘાતનં મુનિ;

યં વિદિત્વા સતો ચરં, તરે લોકે વિસત્તિકં’’.

૧૦૯૨. ‘‘ઇધ દિટ્ઠસુતમુતવિઞ્ઞાતેસુ, પિયરૂપેસુ હેમક;

છન્દરાગવિનોદનં, નિબ્બાનપદમચ્ચુતં.

૧૦૯૩. ‘‘એતદઞ્ઞાય યે સતા, દિટ્ઠધમ્માભિનિબ્બુતા;

ઉપસન્તા ચ તે સદા, તિણ્ણા લોકે વિસત્તિક’’ન્તિ.

હેમકમાણવપુચ્છા અટ્ઠમા નિટ્ઠિતા.