૧૩. ઉદયમાણવપુચ્છા

૧૧૧૧. ‘‘ઝાયિં વિરજમાસીનં, (ઇચ્ચાયસ્મા ઉદયો) કતકિચ્ચં અનાસવં;

પારગું સબ્બધમ્માનં, અત્થિ પઞ્હેન આગમં;

અઞ્ઞાવિમોક્ખં પબ્રૂહિ, અવિજ્જાય પભેદનં’’.

૧૧૧૨. ‘‘પહાનં કામચ્છન્દાનં, (ઉદયાતિ ભગવા) દોમનસ્સાન ચૂભયં;

થિનસ્સ ચ પનૂદનં, કુક્કુચ્ચાનં નિવારણં.

૧૧૧૩. ‘‘ઉપેક્ખાસતિસંસુદ્ધં, ધમ્મતક્કપુરેજવં;

અઞ્ઞાવિમોક્ખં પબ્રૂમિ, અવિજ્જાય પભેદનં’’.

૧૧૧૪. ‘‘કિંસુ સંયોજનો લોકો, કિંસુ તસ્સ વિચારણં;

કિસ્સસ્સ વિપ્પહાનેન, નિબ્બાનં ઇતિ વુચ્ચતિ’’.

૧૧૧૫. ‘‘નન્દિસંયોજનો લોકો, વિતક્કસ્સ વિચારણં;

તણ્હાય વિપ્પહાનેન, નિબ્બાનં ઇતિ વુચ્ચતિ’’.

૧૧૧૬. ‘‘કથં સતસ્સ ચરતો, વિઞ્ઞાણં ઉપરુજ્ઝતિ;

ભગવન્તં પુટ્ઠુમાગમ્મ, તં સુણોમ વચો તવ’’.

૧૧૧૭. ‘‘અજ્ઝત્તઞ્ચ બહિદ્ધા ચ, વેદનં નાભિનન્દતો;

એવં સતસ્સ ચરતો, વિઞ્ઞાણં ઉપરુજ્ઝતી’’તિ.

ઉદયમાણવપુચ્છા તેરસમા નિટ્ઠિતા.