૧૦. કપ્પમાણવપુચ્છા

૧૦૯૮. ‘‘મજ્ઝે સરસ્મિં તિટ્ઠતં, (ઇચ્ચાયસ્મા કપ્પો)

ઓઘે જાતે મહબ્ભયે;

જરામચ્ચુપરેતાનં, દીપં પબ્રૂહિ મારિસ;

ત્વઞ્ચ મે દીપમક્ખાહિ, યથાયિદં નાપરં સિયા’’.

૧૦૯૯. ‘‘મજ્ઝે સરસ્મિં તિટ્ઠતં, (કપ્પાતિ ભગવા)

ઓઘે જાતે મહબ્ભયે;

જરામચ્ચુપરેતાનં, દીપં પબ્રૂમિ કપ્પ તે.

૧૧૦૦. ‘‘અકિઞ્ચનં અનાદાનં, એતં દીપં અનાપરં;

નિબ્બાનં ઇતિ [નિબ્બાનમીતિ (સી.)] નં બ્રૂમિ, જરામચ્ચુપરિક્ખયં.

૧૧૦૧. ‘‘એતદઞ્ઞાય યે સતા, દિટ્ઠધમ્માભિનિબ્બુતા;

ન તે મારવસાનુગા, ન તે મારસ્સ પદ્ધગૂ’’તિ [પટ્ઠગૂતિ (સ્યા. ક.)].

કપ્પમાણવપુચ્છા દસમા નિટ્ઠિતા.