૧૦. પુરાભેદસુત્તં

૮૫૪. ‘‘કથંદસ્સી કથંસીલો, ઉપસન્તોતિ વુચ્ચતિ;

તં મે ગોતમ પબ્રૂહિ, પુચ્છિતો ઉત્તમં નરં’’.

૮૫૫. ‘‘વીતતણ્હો પુરા ભેદા, (ઇતિ ભગવા) પુબ્બમન્તમનિસ્સિતો;

વેમજ્ઝે નુપસઙ્ખેય્યો, તસ્સ નત્થિ પુરક્ખતં.

૮૫૬. ‘‘અક્કોધનો અસન્તાસી, અવિકત્થી અકુક્કુચો;

મન્તભાણી [મન્તાભાણી (સ્યા. પી.)] અનુદ્ધતો, સ વે વાચાયતો મુનિ.

૮૫૭. ‘‘નિરાસત્તિ અનાગતે, અતીતં નાનુસોચતિ;

વિવેકદસ્સી ફસ્સેસુ, દિટ્ઠીસુ ચ ન નીયતિ [નિય્યતિ (બહૂસુ)].

૮૫૮. ‘‘પતિલીનો અકુહકો, અપિહાલુ અમચ્છરી;

અપ્પગબ્ભો અજેગુચ્છો, પેસુણેય્યે ચ નો યુતો.

૮૫૯. ‘‘સાતિયેસુ અનસ્સાવી, અતિમાને ચ નો યુતો;

સણ્હો ચ પટિભાનવા [પટિભાણવા (સ્યા. પી.)], ન સદ્ધો ન વિરજ્જતિ.

૮૬૦. ‘‘લાભકમ્યા ન સિક્ખતિ, અલાભે ચ ન કુપ્પતિ;

અવિરુદ્ધો ચ તણ્હાય, રસેસુ નાનુગિજ્ઝતિ.

૮૬૧. ‘‘ઉપેક્ખકો સદા સતો, ન લોકે મઞ્ઞતે સમં;

ન વિસેસી ન નીચેય્યો, તસ્સ નો સન્તિ ઉસ્સદા.

૮૬૨. ‘‘યસ્સ નિસ્સયના [નિસ્સયતા (સી. સ્યા. પી.)] નત્થિ, ઞત્વા ધમ્મં અનિસ્સિતો;

ભવાય વિભવાય વા, તણ્હા યસ્સ ન વિજ્જતિ.

૮૬૩. ‘‘તં બ્રૂમિ ઉપસન્તોતિ, કામેસુ અનપેક્ખિનં;

ગન્થા તસ્સ ન વિજ્જન્તિ, અતરી સો વિસત્તિકં.

૮૬૪. ‘‘ન તસ્સ પુત્તા પસવો, ખેત્તં વત્થુઞ્ચ વિજ્જતિ;

અત્તા વાપિ નિરત્તા વા [અત્તં વાપિ નિરત્તં વા (બહૂસુ)], ન તસ્મિં ઉપલબ્ભતિ.

૮૬૫. ‘‘યેન નં વજ્જું પુથુજ્જના, અથો સમણબ્રાહ્મણા;

તં તસ્સ અપુરક્ખતં, તસ્મા વાદેસુ નેજતિ.

૮૬૬. ‘‘વીતગેધો અમચ્છરી, ન ઉસ્સેસુ વદતે મુનિ;

ન સમેસુ ન ઓમેસુ, કપ્પં નેતિ અકપ્પિયો.

૮૬૭. ‘‘યસ્સ લોકે સકં નત્થિ, અસતા ચ ન સોચતિ;

ધમ્મેસુ ચ ન ગચ્છતિ, સ વે સન્તોતિ વુચ્ચતી’’તિ.

પુરાભેદસુત્તં દસમં નિટ્ઠિતં.