૯. કિંસીલસુત્તં

૩૨૬. ‘‘કિંસીલો કિંસમાચારો, કાનિ કમ્માનિ બ્રૂહયં;

નરો સમ્મા નિવિટ્ઠસ્સ, ઉત્તમત્થઞ્ચ પાપુણે’’.

૩૨૭. ‘‘વુડ્ઢાપચાયી અનુસૂયકો સિયા, કાલઞ્ઞૂ [કાલઞ્ઞુ (સી. સ્યા.)] ચસ્સ ગરૂનં [ગરૂનં (સી.)] દસ્સનાય;

ધમ્મિં કથં એરયિતં ખણઞ્ઞૂ, સુણેય્ય સક્કચ્ચ સુભાસિતાનિ.

૩૨૮. ‘‘કાલેન ગચ્છે ગરૂનં સકાસં, થમ્ભં નિરંકત્વા [નિરાકત્વા (?) નિ + આ + કર + ત્વા] નિવાતવુત્તિ;

અત્થં ધમ્મં સંયમં બ્રહ્મચરિયં, અનુસ્સરે ચેવ સમાચરે ચ.

૩૨૯. ‘‘ધમ્મારામો ધમ્મરતો, ધમ્મે ઠિતો ધમ્મવિનિચ્છયઞ્ઞૂ;

નેવાચરે ધમ્મસન્દોસવાદં, તચ્છેહિ નીયેથ સુભાસિતેહિ.

૩૩૦. ‘‘હસ્સં જપ્પં પરિદેવં પદોસં, માયાકતં કુહનં ગિદ્ધિ માનં;

સારમ્ભં કક્કસં કસાવઞ્ચ મુચ્છં [સારમ્ભ કક્કસ્સ કસાવ મુચ્છં (સ્યા. પી.)], હિત્વા ચરે વીતમદો ઠિતત્તો.

૩૩૧. ‘‘વિઞ્ઞાતસારાનિ સુભાસિતાનિ, સુતઞ્ચ વિઞ્ઞાતસમાધિસારં;

ન તસ્સ પઞ્ઞા ચ સુતઞ્ચ વડ્ઢતિ, યો સાહસો હોતિ નરો પમત્તો.

૩૩૨. ‘‘ધમ્મે ચ યે અરિયપવેદિતે રતા,

અનુત્તરા તે વચસા મનસા કમ્મુના ચ;

તે સન્તિસોરચ્ચસમાધિસણ્ઠિતા,

સુતસ્સ પઞ્ઞાય ચ સારમજ્ઝગૂ’’તિ.

કિંસીલસુત્તં નવમં નિટ્ઠિતં.