૪. મઙ્ગલસુત્તં

એવં મે સુતં – એકં સમયં ભગવા સાવત્થિયં વિહરતિ જેતવને અનાથપિણ્ડિકસ્સ આરામે. અથ ખો અઞ્ઞતરા દેવતા અભિક્કન્તાય રત્તિયા અભિક્કન્તવણ્ણા કેવલકપ્પં જેતવનં ઓભાસેત્વા યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં અટ્ઠાસિ. એકમન્તં ઠિતા ખો સા દેવતા ભગવન્તં ગાથાય અજ્ઝભાસિ –

૨૬૧. ‘‘બહૂ દેવા મનુસ્સા ચ, મઙ્ગલાનિ અચિન્તયું;

આકઙ્ખમાના સોત્થાનં, બ્રૂહિ મઙ્ગલમુત્તમં’’.

૨૬૨. ‘‘અસેવના ચ બાલાનં, પણ્ડિતાનઞ્ચ સેવના;

પૂજા ચ પૂજનેય્યાનં [પૂજનીયાનં (સી. સ્યા. કં. પી.)], એતં મઙ્ગલમુત્તમં.

૨૬૩. ‘‘પતિરૂપદેસવાસો ચ, પુબ્બે ચ કતપુઞ્ઞતા;

અત્તસમ્માપણિધિ [અત્તસમ્માપણીધી (કત્થચિ)] ચ, એતં મઙ્ગલમુત્તમં.

૨૬૪. ‘‘બાહુસચ્ચઞ્ચ સિપ્પઞ્ચ, વિનયો ચ સુસિક્ખિતો;

સુભાસિતા ચ યા વાચા, એતં મઙ્ગલમુત્તમં.

૨૬૫. ‘‘માતાપિતુ ઉપટ્ઠાનં, પુત્તદારસ્સ સઙ્ગહો;

અનાકુલા ચ કમ્મન્તા, એતં મઙ્ગલમુત્તમં.

૨૬૬. ‘‘દાનઞ્ચ ધમ્મચરિયા ચ, ઞાતકાનઞ્ચ સઙ્ગહો;

અનવજ્જાનિ કમ્માનિ, એતં મઙ્ગલમુત્તમં.

૨૬૭. ‘‘આરતી વિરતી પાપા, મજ્જપાના ચ સંયમો;

અપ્પમાદો ચ ધમ્મેસુ, એતં મઙ્ગલમુત્તમં.

૨૬૮. ‘‘ગારવો ચ નિવાતો ચ, સન્તુટ્ઠિ ચ કતઞ્ઞુતા;

કાલેન ધમ્મસ્સવનં [ધમ્મસવણં (કત્થચિ), ધમ્મસવનં (સી. ક.)], એતં મઙ્ગલમુત્તમં.

૨૬૯. ‘‘ખન્તી ચ સોવચસ્સતા, સમણાનઞ્ચ દસ્સનં;

કાલેન ધમ્મસાકચ્છા, એતં મઙ્ગલમુત્તમં.

૨૭૦. ‘‘તપો ચ બ્રહ્મચરિયઞ્ચ, અરિયસચ્ચાન દસ્સનં;

નિબ્બાનસચ્છિકિરિયા ચ, એતં મઙ્ગલમુત્તમં.

૨૭૧. ‘‘ફુટ્ઠસ્સ લોકધમ્મેહિ, ચિત્તં યસ્સ ન કમ્પતિ;

અસોકં વિરજં ખેમં, એતં મઙ્ગલમુત્તમં.

૨૭૨. ‘‘એતાદિસાનિ કત્વાન, સબ્બત્થમપરાજિતા;

સબ્બત્થ સોત્થિં ગચ્છન્તિ, તં તેસં મઙ્ગલમુત્તમ’’ન્તિ.

મઙ્ગલસુત્તં ચતુત્થં નિટ્ઠિતં.