૯. હેમવતસુત્તં

૧૫૩. ‘‘અજ્જ પન્નરસો ઉપોસથો, (ઇતિ સાતાગિરો યક્ખો)

દિબ્બા [દિબ્યા (સી. સ્યા. કં. પી.)] રત્તિ ઉપટ્ઠિતા;

અનોમનામં સત્થારં, હન્દ પસ્સામ ગોતમં’’.

૧૫૪. ‘‘કચ્ચિ મનો સુપણિહિતો, (ઇતિ હેમવતો યક્ખો)

સબ્બભૂતેસુ તાદિનો;

કચ્ચિ ઇટ્ઠે અનિટ્ઠે ચ, સઙ્કપ્પસ્સ વસીકતા’’.

૧૫૫. ‘‘મનો ચસ્સ સુપણિહિતો, (ઇતિ સાતાગિરો યક્ખો)

સબ્બભૂતેસુ તાદિનો;

અથો ઇટ્ઠે અનિટ્ઠે ચ, સઙ્કપ્પસ્સ વસીકતા’’.

૧૫૬. ‘‘કચ્ચિ અદિન્નં નાદિયતિ, (ઇતિ હેમવતો યક્ખો)

કચ્ચિ પાણેસુ સઞ્ઞતો;

કચ્ચિ આરા પમાદમ્હા, કચ્ચિ ઝાનં ન રિઞ્ચતિ’’.

૧૫૭. ‘‘ન સો અદિન્નં આદિયતિ, (ઇતિ સાતાગિરો યક્ખો)

અથો પાણેસુ સઞ્ઞતો;

અથો આરા પમાદમ્હા, બુદ્ધો ઝાનં ન રિઞ્ચતિ’’.

૧૫૮. ‘‘કચ્ચિ મુસા ન ભણતિ, (ઇતિ હેમવતો યક્ખો)

કચ્ચિ ન ખીણબ્યપ્પથો;

કચ્ચિ વેભૂતિયં નાહ, કચ્ચિ સમ્ફં ન ભાસતિ’’.

૧૫૯. ‘‘મુસા ચ સો ન ભણતિ, (ઇતિ સાતાગિરો યક્ખો)

અથો ન ખીણબ્યપ્પથો;

અથો વેભૂતિયં નાહ, મન્તા અત્થં ચ [અત્થં સો (સી. પી. ક.)] ભાસતિ’’.

૧૬૦. ‘‘કચ્ચિ ન રજ્જતિ કામેસુ, (ઇતિ હેમવતો યક્ખો)

કચ્ચિ ચિત્તં અનાવિલં;

કચ્ચિ મોહં અતિક્કન્તો, કચ્ચિ ધમ્મેસુ ચક્ખુમા’’.

૧૬૧. ‘‘ન સો રજ્જતિ કામેસુ, (ઇતિ સાતાગિરો યક્ખો)

અથો ચિત્તં અનાવિલં;

સબ્બમોહં અતિક્કન્તો, બુદ્ધો ધમ્મેસુ ચક્ખુમા’’.

૧૬૨. ‘‘કચ્ચિ વિજ્જાય સમ્પન્નો, (ઇતિ હેમવતો યક્ખો )

કચ્ચિ સંસુદ્ધચારણો;

કચ્ચિસ્સ આસવા ખીણા, કચ્ચિ નત્થિ પુનબ્ભવો’’.

૧૬૩. ‘‘વિજ્જાય ચેવ સમ્પન્નો, (ઇતિ સાતાગિરો યક્ખો)

અથો સંસુદ્ધચારણો;

સબ્બસ્સ આસવા ખીણા, નત્થિ તસ્સ પુનબ્ભવો’’.

૧૬૪. ‘‘સમ્પન્નં મુનિનો ચિત્તં, કમ્મુના બ્યપ્પથેન ચ;

વિજ્જાચરણસમ્પન્નં, ધમ્મતો નં પસંસતિ’’.

૧૬૫. ‘‘સમ્પન્નં મુનિનો ચિત્તં, કમ્મુના બ્યપ્પથેન ચ;

વિજ્જાચરણસમ્પન્નં, ધમ્મતો અનુમોદસિ’’.

૧૬૬. ‘‘સમ્પન્નં મુનિનો ચિત્તં, કમ્મુના બ્યપ્પથેન ચ;

વિજ્જાચરણસમ્પન્નં, હન્દ પસ્સામ ગોતમં.

૧૬૭. ‘‘એણિજઙ્ઘં કિસં વીરં [ધીરં (સ્યા.)], અપ્પાહારં અલોલુપં;

મુનિં વનસ્મિં ઝાયન્તં, એહિ પસ્સામ ગોતમં.

૧૬૮. ‘‘સીહંવેકચરં નાગં, કામેસુ અનપેક્ખિનં;

ઉપસઙ્કમ્મ પુચ્છામ, મચ્ચુપાસપ્પમોચનં.

૧૬૯. ‘‘અક્ખાતારં પવત્તારં, સબ્બધમ્માન પારગું;

બુદ્ધં વેરભયાતીતં, મયં પુચ્છામ ગોતમં’’.

૧૭૦. ‘‘કિસ્મિં લોકો સમુપ્પન્નો, (ઇતિ હેમવતો યક્ખો)

કિસ્મિં કુબ્બતિ સન્થવં [સન્ધવં (ક.)];

કિસ્સ લોકો ઉપાદાય, કિસ્મિં લોકો વિહઞ્ઞતિ’’.

૧૭૧. ‘‘છસુ [છસ્સુ (સી. પી.)] લોકો સમુપ્પન્નો, (હેમવતાતિ ભગવા)

છસુ કુબ્બતિ સન્થવં;

છન્નમેવ ઉપાદાય, છસુ લોકો વિહઞ્ઞતિ’’.

૧૭૨. ‘‘કતમં તં ઉપાદાનં, યત્થ લોકો વિહઞ્ઞતિ;

નિય્યાનં પુચ્છિતો બ્રૂહિ, કથં દુક્ખા પમુચ્ચતિ’’ [પમુઞ્ચતિ (સ્યા.)].

૧૭૩. ‘‘પઞ્ચ કામગુણા લોકે, મનોછટ્ઠા પવેદિતા;

એત્થ છન્દં વિરાજેત્વા, એવં દુક્ખા પમુચ્ચતિ.

૧૭૪. ‘‘એતં લોકસ્સ નિય્યાનં, અક્ખાતં વો યથાતથં;

એતં વો અહમક્ખામિ, એવં દુક્ખા પમુચ્ચતિ’’.

૧૭૫. ‘‘કો સૂધ તરતિ ઓઘં, કોધ તરતિ અણ્ણવં;

અપ્પતિટ્ઠે અનાલમ્બે, કો ગમ્ભીરે ન સીદતિ’’.

૧૭૬. ‘‘સબ્બદા સીલસમ્પન્નો, પઞ્ઞવા સુસમાહિતો;

અજ્ઝત્તચિન્તી [અજ્ઝત્તસઞ્ઞી (સ્યા. કં. ક.)] સતિમા, ઓઘં તરતિ દુત્તરં.

૧૭૭. ‘‘વિરતો કામસઞ્ઞાય, સબ્બસંયોજનાતિગો;

નન્દીભવપરિક્ખીણો, સો ગમ્ભીરે ન સીદતિ’’.

૧૭૮. ‘‘ગબ્ભીરપઞ્ઞં નિપુણત્થદસ્સિં, અકિઞ્ચનં કામભવે અસત્તં;

તં પસ્સથ સબ્બધિ વિપ્પમુત્તં, દિબ્બે પથે કમમાનં મહેસિં.

૧૭૯. ‘‘અનોમનામં નિપુણત્થદસ્સિં, પઞ્ઞાદદં કામાલયે અસત્તં;

તં પસ્સથ સબ્બવિદું સુમેધં, અરિયે પથે કમમાનં મહેસિં.

૧૮૦. ‘‘સુદિટ્ઠં વત નો અજ્જ, સુપ્પભાતં સુહુટ્ઠિતં;

યં અદ્દસામ સમ્બુદ્ધં, ઓઘતિણ્ણમનાસવં.

૧૮૧. ‘‘ઇમે દસસતા યક્ખા, ઇદ્ધિમન્તો યસસ્સિનો;

સબ્બે તં સરણં યન્તિ, ત્વં નો સત્થા અનુત્તરો.

૧૮૨. ‘‘તે મયં વિચરિસ્સામ, ગામા ગામં નગા નગં;

નમસ્સમાના સમ્બુદ્ધં, ધમ્મસ્સ ચ સુધમ્મત’’ન્તિ.

હેમવતસુત્તં નવમં નિટ્ઠિતં.