૧૧. વિજયસુત્તં

૧૯૫. ચરં વા યદિ વા તિટ્ઠં, નિસિન્નો ઉદ વા સયં;

સમિઞ્જેતિ પસારેતિ, એસા કાયસ્સ ઇઞ્જના.

૧૯૬. અટ્ઠિનહારુસંયુત્તો, તચમંસાવલેપનો;

છવિયા કાયો પટિચ્છન્નો, યથાભૂતં ન દિસ્સતિ.

૧૯૭. અન્તપૂરો ઉદરપૂરો, યકનપેળસ્સ [યકપેળસ્સ (સી. સ્યા.)] વત્થિનો;

હદયસ્સ પપ્ફાસસ્સ, વક્કસ્સ પિહકસ્સ ચ.

૧૯૮. સિઙ્ઘાણિકાય ખેળસ્સ, સેદસ્સ ચ મેદસ્સ ચ;

લોહિતસ્સ લસિકાય, પિત્તસ્સ ચ વસાય ચ.

૧૯૯. અથસ્સ નવહિ સોતેહિ, અસુચી સવતિ સબ્બદા;

અક્ખિમ્હા અક્ખિગૂથકો, કણ્ણમ્હા કણ્ણગૂથકો.

૨૦૦. સિઙ્ઘાણિકા ચ નાસતો, મુખેન વમતેકદા;

પિત્તં સેમ્હઞ્ચ વમતિ, કાયમ્હા સેદજલ્લિકા.

૨૦૧. અથસ્સ સુસિરં સીસં, મત્થલુઙ્ગસ્સ પૂરિતં;

સુભતો નં મઞ્ઞતિ, બાલો અવિજ્જાય પુરક્ખતો.

૨૦૨. યદા ચ સો મતો સેતિ, ઉદ્ધુમાતો વિનીલકો;

અપવિદ્ધો સુસાનસ્મિં, અનપેક્ખા હોન્તિ ઞાતયો.

૨૦૩. ખાદન્તિ નં સુવાના [સુપાણા (પી.)] ચ, સિઙ્ગાલા [સિગાલા (સી. સ્યા. કં. પી.)] વકા કિમી;

કાકા ગિજ્ઝા ચ ખાદન્તિ, યે ચઞ્ઞે સન્તિ પાણિનો.

૨૦૪. સુત્વાન બુદ્ધવચનં, ભિક્ખુ પઞ્ઞાણવા ઇધ;

સો ખો નં પરિજાનાતિ, યથાભૂતઞ્હિ પસ્સતિ.

૨૦૫. યથા ઇદં તથા એતં, યથા એતં તથા ઇદં;

અજ્ઝત્તઞ્ચ બહિદ્ધા ચ, કાયે છન્દં વિરાજયે.

૨૦૬. છન્દરાગવિરત્તો સો, ભિક્ખુ પઞ્ઞાણવા ઇધ;

અજ્ઝગા અમતં સન્તિં, નિબ્બાનં પદમચ્ચુતં.

૨૦૭. દ્વિપાદકોયં [દિપાદકોયં (સી. સ્યા. કં. પી.)] અસુચિ, દુગ્ગન્ધો પરિહારતિ [પરિહીરતિ (સી. સ્યા. કં. પી.)];

નાનાકુણપપરિપૂરો, વિસ્સવન્તો તતો તતો.

૨૦૮. એતાદિસેન કાયેન, યો મઞ્ઞે ઉણ્ણમેતવે [ઉન્નમેતવે (?)];

પરં વા અવજાનેય્ય, કિમઞ્ઞત્ર અદસ્સનાતિ.

વિજયસુત્તં એકાદસમં નિટ્ઠિતં.