૭. રાજપુત્તપેતવત્થુ

૭૫૩. પુબ્બે કતાનં કમ્માનં, વિપાકો મથયે મનં;

રૂપે સદ્દે રસે ગન્ધે, ફોટ્ઠબ્બે ચ મનોરમે.

૭૫૪. નચ્ચં ગીતં રતિં ખિડ્ડં, અનુભુત્વા અનપ્પકં;

ઉય્યાને પરિચરિત્વા, પવિસન્તો ગિરિબ્બજં.

૭૫૫. ઇસિં સુનેત્ત [સુનિત (ક.)] મદ્દક્ખિ, અત્તદન્તં સમાહિતં;

અપ્પિચ્છં હિરિસમ્પન્નં, ઉઞ્છે પત્તગતે રતં.

૭૫૬. હત્થિક્ખન્ધતો ઓરુય્હ, લદ્ધા ભન્તેતિ ચાબ્રવિ;

તસ્સ પત્તં ગહેત્વાન, ઉચ્ચં પગ્ગય્હ ખત્તિયો.

૭૫૭. થણ્ડિલે પત્તં ભિન્દિત્વા, હસમાનો અપક્કમિ;

‘‘રઞ્ઞો કિતવસ્સાહં પુત્તો, કિં મં ભિક્ખુ કરિસ્સસિ’’.

૭૫૮. તસ્સ કમ્મસ્સ ફરુસસ્સ, વિપાકો કટુકો અહુ;

યં રાજપુત્તો વેદેસિ, નિરયમ્હિ સમપ્પિતો.

૭૫૯. છળેવ ચતુરાસીતિ, વસ્સાનિ નવુતાનિ ચ;

ભુસં દુક્ખં નિગચ્છિત્થો, નિરયે કતકિબ્બિસો.

૭૬૦. ઉત્તાનોપિ ચ પચ્ચિત્થ, નિકુજ્જો વામદક્ખિણો;

ઉદ્ધંપાદો ઠિતો ચેવ, ચિરં બાલો અપચ્ચથ.

૭૬૧. બહૂનિ વસ્સસહસ્સાનિ, પૂગાનિ નહુતાનિ ચ;

ભુસં દુક્ખં નિગચ્છિત્થો, નિરયે કતકિબ્બિસો.

૭૬૨. એતાદિસં ખો કટુકં, અપ્પદુટ્ઠપ્પદોસિનં;

પચ્ચન્તિ પાપકમ્મન્તા, ઇસિમાસજ્જ સુબ્બતં.

૭૬૩. સો તત્થ બહુવસ્સાનિ, વેદયિત્વા બહું દુખં;

ખુપ્પિપાસહતો નામ [ખુપ્પિપાસાહતો નામ (સી. પી)], પેતો આસિ તતો ચુતો.

૭૬૪. એતમાદીનવં ઞત્વા [દિસ્વા (સી.)], ઇસ્સરમદસમ્ભવં;

પહાય ઇસ્સરમદં, નિવાતમનુવત્તયે.

૭૬૫. દિટ્ઠેવ ધમ્મે પાસંસો, યો બુદ્ધેસુ સગારવો;

કાયસ્સ ભેદા સપ્પઞ્ઞો, સગ્ગં સો ઉપપજ્જતીતિ.

રાજપુત્તપેતવત્થુ સત્તમં.