૮. ગૂથખાદકપેતવત્થુ

૭૬૬. ‘‘ગૂથકૂપતો ઉગ્ગન્ત્વા, કો નુ દીનો પતિટ્ઠસિ [દીનો હિ તિટ્ઠસિ (સી.)];

નિસ્સંસયં પાપકમ્મન્તો, કિં નુ સદ્દહસે તુવ’’ન્તિ.

૭૬૭. ‘‘અહં ભદન્તે પેતોમ્હિ, દુગ્ગતો યમલોકિકો;

પાપકમ્મં કરિત્વાન, પેતલોકં ઇતો ગતો’’.

૭૬૮. ‘‘કિં નુ કાયેન વાચાય, મનસા દુક્કટં કતં;

કિસ્સ કમ્મવિપાકેન, ઇદં દુક્ખં નિગચ્છસી’’તિ.

૭૬૯. ‘‘અહુ આવાસિકો મય્હં, ઇસ્સુકી કુલમચ્છરી;

અજ્ઝોસિતો મય્હં ઘરે, કદરિયો પરિભાસકો.

૭૭૦. ‘‘તસ્સાહં વચનં સુત્વા, ભિક્ખવો પરિભાસિસં;

તસ્સ કમ્મવિપાકેન, પેતલોકં ઇતો ગતો’’તિ.

૭૭૧. ‘‘અમિત્તો મિત્તવણ્ણેન, યો તે આસિ કુલૂપકો;

કાયસ્સ ભેદા દુપ્પઞ્ઞો, કિં નુ પેચ્ચ ગતિં ગતો’’તિ.

૭૭૨. ‘‘તસ્સેવાહં પાપકમ્મસ્સ, સીસે તિટ્ઠામિ મત્થકે;

સો ચ પરવિસયં પત્તો, મમેવ પરિચારકો.

૭૭૩. ‘‘યં ભદન્તે હદન્તઞ્ઞે, એતં મે હોતિ ભોજનં;

અહઞ્ચ ખો યં હદામિ, એતં સો ઉપજીવતી’’તિ.

ગૂથખાદકપેતવત્થુ અટ્ઠમં.