૬. સેરિણીપેતવત્થુ

૪૬૪. ‘‘નગ્ગા દુબ્બણ્ણરૂપાસિ, કિસા ધમનિસન્થતા;

ઉપ્ફાસુલિકે કિસિકે, કા નુ ત્વં ઇધ તિટ્ઠસી’’તિ.

૪૬૫. ‘‘અહં ભદન્તે પેતીમ્હિ, દુગ્ગતા યમલોકિકા;

પાપકમ્મં કરિત્વાન, પેતલોકં ઇતો ગતા’’તિ.

૪૬૬. ‘‘કિં નુ કાયેન વાચાય, મનસા કુક્કટં કતં;

કિસ્સ કમ્મવિપાકેન, પેતલોકં ઇતો ગતા’’તિ.

૪૬૭. ‘‘અનાવટેસુ તિત્થેસુ, વિચિનિં અડ્ઢમાસકં;

સન્તેસુ દેય્યધમ્મેસુ, દીપં નાકાસિમત્તનો.

૪૬૮. ‘‘નદિં ઉપેમિ તસિતા, રિત્તકા પરિવત્તતિ;

છાયં ઉપેમિ ઉણ્હેસુ, આતપો પરિવત્તતિ.

૪૬૯. ‘‘અગ્ગિવણ્ણો ચ મે વાતો, ડહન્તો ઉપવાયતિ;

એતઞ્ચ ભન્તે અરહામિ, અઞ્ઞઞ્ચ પાપકં તતો.

૪૭૦. ‘‘ગન્ત્વાન હત્થિનિં પુરં, વજ્જેસિ મય્હ માતરં;

‘ધીતા ચ તે મયા દિટ્ઠા, દુગ્ગતા યમલોકિકા;

પાપકમ્મં કરિત્વાન, પેતલોકં ઇતો ગતા’.

૪૭૧. ‘‘અત્થિ મે એત્થ નિક્ખિત્તં, અનક્ખાતઞ્ચ તં મયા;

ચત્તારિસતસહસ્સાનિ, પલ્લઙ્કસ્સ ચ હેટ્ઠતો.

૪૭૨. ‘‘તતો મે દાનં દદતુ, તસ્સા ચ હોતુ જીવિકા;

દાનં દત્વા ચ મે માતા, દક્ખિણં અનુદિચ્છતુ [અનુદિસ્સતુ (સી. પી.), અન્વાદિસ્સતુ (સ્યા.)];

તદાહં સુખિતા હેસ્સં, સબ્બકામસમિદ્ધિની’’તિ.

૪૭૩. ‘‘સાધૂ’’તિ સો પટિસ્સુત્વા, ગન્ત્વાન હત્થિનિં પુરં;

અવોચ તસ્સા માતરં –

‘ધીતા ચ તે મયા દિટ્ઠા, દુગ્ગતા યમલોકિકા;

પાપકમ્મં કરિત્વાન, પેતલોકં ઇતો ગતા’.

૪૭૪. ‘‘સા મં તત્થ સમાદપેસિ, ( ) [(ગન્ત્વાન હત્થિનિં પુરં) (સ્યા. ક.)] વજ્જેસિ મય્હ માતરં;

‘ધીતા ચ તે મયા દિટ્ઠા, દુગ્ગતા યમલોકિકા;

પાપકમ્મં કરિત્વાન, પેતલોકં ઇતો ગતા’.

૪૭૫. ‘‘અત્થિ ચ મે એત્થ નિક્ખિત્તં, અનક્ખાતઞ્ચ તં મયા;

ચત્તારિસતસહસ્સાનિ, પલ્લઙ્કસ્સ ચ હેટ્ઠતો.

૪૭૬. ‘‘તતો મે દાનં દદતુ, તસ્સા ચ હોતુ જીવિકા;

દાનં દત્વા ચ મે માતા, દક્ખિણં અનુદિચ્છતુ ( ) [(તતો તુવં દાનં દેહિ, તસ્સા દક્ખિણમાદિસી) (ક.)];

‘તદા સા સુખિતા હેસ્સં, સબ્બકામસમિદ્ધિની’’’તિ.

૪૭૭. તતો હિ સા દાનમદા, તસ્સા દક્ખિણમાદિસી;

પેતી ચ સુખિતા આસિ, તસ્સા ચાસિ સુજીવિકાતિ.

સેરિણીપેતવત્થુ છટ્ઠં.