૪. નન્દાપેતિવત્થુ

૧૬૮. ‘‘કાળી દુબ્બણ્ણરૂપાસિ, ફરુસા ભીરુદસ્સના;

પિઙ્ગલાસિ કળારાસિ, ન તં મઞ્ઞામિ માનુસિ’’ન્તિ.

૧૬૯. ‘‘અહં નન્દા નન્દિસેન, ભરિયા તે પુરે અહું;

પાપકમ્મં કરિત્વાન, પેતલોકં ઇતો ગતા’’તિ.

૧૭૦. ‘‘કિં નુ કાયેન વાચાય, મનસા દુક્કટં કતં;

કિસ્સ કમ્મવિપાકેન, પેતલોકં ઇતો ગતા’’તિ.

૧૭૧. ‘‘ચણ્ડી ચ ફરુસા ચાસિં [ચણ્ડી ફરુસવાચા ચ (સી.)], તયિ ચાપિ અગારવા;

તાહં દુરુત્તં વત્વાન, પેતલોકં ઇતો ગતા’’તિ.

૧૭૨. ‘‘હન્દુત્તરીયં દદામિ તે, ઇમં [ઇદં (સી. અટ્ઠ.)] દુસ્સં નિવાસય;

ઇમં દુસ્સં નિવાસેત્વા, એહિ નેસ્સામિ તં ઘરં.

૧૭૩. ‘‘વત્થઞ્ચ અન્નપાનઞ્ચ, લચ્છસિ ત્વં ઘરં ગતા;

પુત્તે ચ તે પસ્સિસ્સસિ, સુણિસાયો ચ દક્ખસી’’તિ.

૧૭૪. ‘‘હત્થેન હત્થે તે દિન્નં, ન મય્હં ઉપકપ્પતિ;

ભિક્ખૂ ચ સીલસમ્પન્ને, વીતરાગે બહુસ્સુતે.

૧૭૫. ‘‘તપ્પેહિ અન્નપાનેન, મમ દક્ખિણમાદિસ;

તદાહં સુખિતા હેસ્સં, સબ્બકામસમિદ્ધિની’’તિ.

૧૭૬. સાધૂતિ સો પટિસ્સુત્વા, દાનં વિપુલમાકિરિ;

અન્નં પાનં ખાદનીયં, વત્થસેનાસનાનિ ચ;

છત્તં ગન્ધઞ્ચ માલઞ્ચ, વિવિધા ચ ઉપાહના.

૧૭૭. ભિક્ખૂ ચ સીલસમ્પન્ને, વીતરાગે બહુસ્સુતે;

તપ્પેત્વા અન્નપાનેન, તસ્સા દક્ખિણમાદિસી.

૧૭૮. સમનન્તરાનુદ્દિટ્ઠે, વિપાકો ઉદપજ્જથ;

ભોજનચ્છાદનપાનીયં, દક્ખિણાય ઇદં ફલં.

૧૭૯. તતો સુદ્ધા સુચિવસના, કાસિકુત્તમધારિની;

વિચિત્તવત્થાભરણા, સામિકં ઉપસઙ્કમિ.

૧૮૦. ‘‘અભિક્કન્તેન વણ્ણેન, યા ત્વં તિટ્ઠસિ દેવતે;

ઓભાસેન્તી દિસા સબ્બા, ઓસધી વિય તારકા.

૧૮૧. ‘‘કેન તેતાદિસો વણ્ણો, કેન તે ઇધ મિજ્ઝતિ;

ઉપ્પજ્જન્તિ ચ તે ભોગા, યે કેચિ મનસો પિયા.

૧૮૨. ‘‘પુચ્છામિ તં દેવિ મહાનુભાવે, મનુસ્સભૂતા કિમકાસિ પુઞ્ઞં;

કેનાસિ એવં જલિતાનુભાવા, વણ્ણો ચ તે સબ્બદિસા પભાસતી’’તિ.

૧૮૩. ‘‘અહં નન્દા નન્દિસેન, ભરિયા તે પુરે અહું;

પાપકમ્મં કરિત્વાન, પેતલોકં ઇતો ગતા.

૧૮૪. ‘‘તવ દિન્નેન દાનેન, મોદામિ અકુતોભયા;

ચિરં જીવ ગહપતિ, સહ સબ્બેહિ ઞાતિભિ;

અસોકં વિરજં ખેમં, આવાસં વસવત્તિનં.

૧૮૫. ‘‘ઇધ ધમ્મં ચરિત્વાન, દાનં દત્વા ગહપતિ;

વિનેય્ય મચ્છેરમલં સમૂલં, અનિન્દિતો સગ્ગમુપેહિ ઠાન’’ન્તિ.

નન્દાપેતિવત્થુ ચતુત્થં.