૮. ગોણપેતવત્થુ

૪૬. ‘‘કિં નુ ઉમ્મત્તરૂપોવ, લાયિત્વા હરિતં તિણં;

ખાદ ખાદાતિ લપસિ, ગતસત્તં જરગ્ગવં.

૪૭. ‘‘ન હિ અન્નેન પાનેન, મતો ગોણો સમુટ્ઠહે;

ત્વંસિ બાલો ચ [બાલોવ (ક.)] દુમ્મેધો, યથા તઞ્ઞોવ દુમ્મતી’’તિ.

૪૮. ‘‘ઇમે પાદા ઇદં સીસં, અયં કાયો સવાલધિ;

નેત્તા તથેવ તિટ્ઠન્તિ, અયં ગોણો સમુટ્ઠહે.

૪૯. ‘‘નાય્યકસ્સ હત્થપાદા, કાયો સીસઞ્ચ દિસ્સતિ;

રુદં મત્તિકથૂપસ્મિં, નનુ ત્વઞ્ઞેવ દુમ્મતી’’તિ.

૫૦. ‘‘આદિત્તં વત મં સન્તં, ઘતસિત્તંવ પાવકં;

વારિના વિય ઓસિઞ્ચં, સબ્બં નિબ્બાપયે દરં.

૫૧. ‘‘અબ્બહી [અબ્બૂળ્હં (બહૂસુ)] વત મે સલ્લં, સોકં હદયનિસ્સિતં;

યો મે સોકપરેતસ્સ, પિતુસોકં અપાનુદિ.

૫૨. ‘‘સ્વાહં અબ્બૂળ્હસલ્લોસ્મિ, સીતિભૂતોસ્મિ નિબ્બુતો;

ન સોચામિ ન રોદામિ, તવ સુત્વાન માણવ’.

૫૩. એવં કરોન્તિ સપ્પઞ્ઞા, યે હોન્તિ અનુકમ્પકા;

વિનિવત્તયન્તિ સોકમ્હા, સુજાતો પિતરં યથાતિ.

ગોણપેતવત્થુ અટ્ઠમં.