૧. ઉરગવગ્ગો

૧. ખેત્તૂપમપેતવત્થુ

૧. ‘‘ખેત્તૂપમા અરહન્તો, દાયકા કસ્સકૂપમા;

બીજૂપમં દેય્યધમ્મં, એત્તો નિબ્બત્તતે ફલં.

૨. ‘‘એતં બીજં કસિ ખેત્તં, પેતાનં દાયકસ્સ ચ;

તં પેતા પરિભુઞ્જન્તિ, દાતા પુઞ્ઞેન વડ્ઢતિ.

૩. ‘‘ઇધેવ કુસલં કત્વા, પેતે ચ પટિપૂજિય;

સગ્ગઞ્ચ કમતિ [ગમતિ (ક.)] ટ્ઠાનં, કમ્મં કત્વાન ભદ્દક’’ન્તિ.

ખેત્તૂપમપેતવત્થુ પઠમં.

૨. સૂકરમુખપેતવત્થુ

૪. ‘‘કાયો તે સબ્બસોવણ્ણો, સબ્બા ઓભાસતે દિસા;

મુખં તે સૂકરસ્સેવ, કિં કમ્મમકરી પુરે’’ [મકરા પુરે (ક.)].

૫. ‘‘કાયેન સઞ્ઞતો આસિં, વાચાયાસિમસઞ્ઞતો;

તેન મેતાદિસો વણ્ણો, યથા પસ્સસિ નારદ.

૬. ‘‘તં ત્યાહં [તાહં (ક.)] નારદ બ્રૂમિ, સામં દિટ્ઠમિદં તયા;

માકાસિ મુખસા પાપં, મા ખો સૂકરમુખો અહૂ’’તિ.

સૂકરમુખપેતવત્થુ દુતિયં.

૩. પૂતિમુખપેતવત્થુ

૭. ‘‘દિબ્બં સુભં ધારેસિ વણ્ણધાતું, વેહાયસં તિટ્ઠસિ અન્તલિક્ખે;

મુખઞ્ચ તે કિમયો પૂતિગન્ધં, ખાદન્તિ કિં કમ્મમકાસિ પુબ્બે’’.

૮. ‘‘સમણો અહં પાપોતિદુટ્ઠવાચો [પાપો દુટ્ઠવાચો (સી.), પાપો દુક્ખવાચો (સ્યા. પી.)], તપસ્સિરૂપો મુખસા અસઞ્ઞતો;

લદ્ધા ચ મે તપસા વણ્ણધાતુ, મુખઞ્ચ મે પેસુણિયેન પૂતિ.

૯. ‘‘તયિદં તયા નારદ સામં દિટ્ઠં,

અનુકમ્પકા યે કુસલા વદેય્યું;

‘મા પેસુણં મા ચ મુસા અભાણિ,

યક્ખો તુવં હોહિસિ કામકામી’’’તિ.

પૂતિમુખપેતવત્થુ તતિયં.

૪. પિટ્ઠધીતલિકપેતવત્થુ

૧૦. ‘‘યં કિઞ્ચારમ્મણં કત્વા, દજ્જા દાનં અમચ્છરી;

પુબ્બપેતે ચ આરબ્ભ, અથ વા વત્થુદેવતા.

૧૧. ‘‘ચત્તારો ચ મહારાજે, લોકપાલે યસસ્સિને [યસસ્સિનો (સી. સ્યા.)];

કુવેરં ધતરટ્ઠઞ્ચ, વિરૂપક્ખં વિરૂળ્હકં;

તે ચેવ પૂજિતા હોન્તિ, દાયકા ચ અનિપ્ફલા.

૧૨. ‘‘ન હિ રુણ્ણં વા સોકો વા, યા ચઞ્ઞા પરિદેવના;

ન તં પેતસ્સ અત્થાય, એવં તિટ્ઠન્તિ ઞાતયો.

૧૩. ‘‘અયઞ્ચ ખો દક્ખિણા દિન્ના, સઙ્ઘમ્હિ સુપ્પતિટ્ઠિતા;

દીઘરત્તં હિતાયસ્સ, ઠાનસો ઉપકપ્પતી’’તિ.

પિટ્ઠધીતલિકપેતવત્થુ ચતુત્થં.

૫. તિરોકુટ્ટપેતવત્થુ

૧૪. [ખુ. પા. ૭.૧ ખુદ્દકપાઠે] ‘‘તિરોકુટ્ટેસુ [તિરોકુડ્ડેસુ (સી. સ્યા. પી.)] તિટ્ઠન્તિ, સન્ધિસિઙ્ઘાટકેસુ ચ;

દ્વારબાહાસુ તિટ્ઠન્તિ, આગન્ત્વાન સકં ઘરં.

૧૫. ‘‘પહૂતે અન્નપાનમ્હિ, ખજ્જભોજ્જે ઉપટ્ઠિતે;

ન તેસં કોચિ સરતિ, સત્તાનં કમ્મપચ્ચયા.

૧૬. ‘‘એવં દદન્તિ ઞાતીનં, યે હોન્તિ અનુકમ્પકા;

સુચિં પણીતં કાલેન, કપ્પિયં પાનભોજનં;

‘ઇદં વો ઞાતીનં હોતુ, સુખિતા હોન્તુ ઞાતયો’.

૧૭. ‘‘તે ચ તત્થ સમાગન્ત્વા, ઞાતિપેતા સમાગતા;

પહૂતે અન્નપાનમ્હિ, સક્કચ્ચં અનુમોદરે.

૧૮. ‘‘‘ચિરં જીવન્તુ નો ઞાતી, યેસં હેતુ લભામસે;

અમ્હાકઞ્ચ કતા પૂજા, દાયકા ચ અનિપ્ફલા’.

૧૯. ‘‘‘ન હિ તત્થ કસિ અત્થિ, ગોરક્ખેત્થ ન વિજ્જતિ;

વણિજ્જા તાદિસી નત્થિ, હિરઞ્ઞેન કયાકયં [કયોક્કયં (સી. ક.) કયોકયં (ખુ. પા. ૭.૬)];

ઇતો દિન્નેન યાપેન્તિ, પેતા કાલગતા [કાલકતા (સી. સ્યા. પી.)] તહિં’.

૨૦. ‘‘‘ઉન્નમે ઉદકં વુટ્ઠં, યથા નિન્નં પવત્તતિ;

એવમેવ ઇતો દિન્નં, પેતાનં ઉપકપ્પતિ’.

૨૧. ‘‘‘યથા વારિવહા પૂરા, પરિપૂરેન્તિ સાગરં;

એવમેવ ઇતો દિન્નં, પેતાનં ઉપકપ્પતિ’.

૨૨. ‘‘‘અદાસિ મે અકાસિ મે, ઞાતિ મિત્તા [ઞાતિ મિત્તો (?)] સખા ચ મે;

પેતાનં દક્ખિણં દજ્જા, પુબ્બે કતમનુસ્સરં’.

૨૩. ‘‘‘ન હિ રુણ્ણં વા સોકો વા, યા ચઞ્ઞા પરિદેવના;

ન તં પેતાનમત્થાય, એવં તિટ્ઠન્તિ ઞાતયો’.

૨૪. ‘‘‘અયઞ્ચ ખો દક્ખિણા દિન્ના, સઙ્ઘમ્હિ સુપ્પતિટ્ઠિતા;

દીઘરત્તં હિતાયસ્સ, ઠાનસો ઉપકપ્પતિ’.

૨૫. ‘‘સો ઞાતિધમ્મો ચ અયં નિદસ્સિતો, પેતાન પૂજા ચ કતા ઉળારા;

બલઞ્ચ ભિક્ખૂનમનુપ્પદિન્નં, તુમ્હેહિ પુઞ્ઞં પસુતં અનપ્પક’’ન્તિ.

તિરોકુટ્ટપેતવત્થુ પઞ્ચમં.

૬. પઞ્ચપુત્તખાદપેતિવત્થુ

૨૬. ‘‘નગ્ગા દુબ્બણ્ણરૂપાસિ, દુગ્ગન્ધા પૂતિ વાયસિ;

મક્ખિકાહિ પરિકિણ્ણા [મક્ખિકાપરિકિણ્ણા ચ (સી.)], કા નુ ત્વં ઇધ તિટ્ઠસી’’તિ.

૨૭. ‘‘અહં ભદન્તે [ભદ્દન્તે (ક.)] પેતીમ્હિ, દુગ્ગતા યમલોકિકા;

પાપકમ્મં કરિત્વાન, પેતલોકં ઇતો ગતા.

૨૮. ‘‘કાલેન પઞ્ચ પુત્તાનિ, સાયં પઞ્ચ પુનાપરે;

વિજાયિત્વાન ખાદામિ, તેપિ ના હોન્તિ મે અલં.

૨૯. ‘‘પરિડય્હતિ ધૂમાયતિ, ખુદાય [ખુદ્દાય (ક.)] હદયં મમ;

પાનીયં ન લભે પાતું, પસ્સ મં બ્યસનં ગત’’ન્તિ.

૩૦. ‘‘કિં નુ કાયેન વાચાય, મનસા દુક્કટં કતં;

કિસ્સ કમ્મવિપાકેન, પુત્તમંસાનિ ખાદસી’’તિ.

૩૧. ‘‘સપતી [સપત્તી (સી.)] મે ગબ્ભિની આસિ, તસ્સા પાપં અચેતયિં;

સાહં પદુટ્ઠમનસા, અકરિં ગબ્ભપાતનં.

૩૨. ‘‘તસ્સા દ્વેમાસિકો ગબ્ભો, લોહિતઞ્ઞેવ પગ્ઘરિ;

તદસ્સા માતા કુપિતા, મય્હં ઞાતી સમાનયિ;

સપથઞ્ચ મં કારેસિ, પરિભાસાપયી ચ મં.

૩૩. ‘‘સાહં ઘોરઞ્ચ સપથં, મુસાવાદં અભાસિસં;

પુત્તમંસાનિ ખાદામિ, સચે તં પકતં મયા.

૩૪. ‘‘તસ્સ કમ્મસ્સ વિપાકેન [વિપાકં (સ્યા. ક.)], મુસાવાદસ્સ ચૂભયં;

પુત્તમંસાનિ ખાદામિ, પુબ્બલોહિતમક્ખિતા’’તિ.

પઞ્ચપુત્તખાદપેતિવત્થુ [પઞ્ચપુત્તખાદપેતવત્થુ (સી. સ્યા. પી.) એવમુપરિપિ] છટ્ઠં.

૭. સત્તપુત્તખાદપેતિવત્થુ

૩૫. ‘‘નગ્ગા દુબ્બણ્ણરૂપાસિ, દુગ્ગન્ધા પૂતિ વાયસિ;

મક્ખિકાહિ પરિકિણ્ણા, કા નુ ત્વં ઇધ તિટ્ઠસી’’તિ.

૩૬. ‘‘અહં ભદન્તે પેતીમ્હિ, દુગ્ગતા યમલોકિકા;

પાપકમ્મં કરિત્વાન, પેતલોકં ઇતો ગતા.

૩૭. ‘‘કાલેન સત્ત પુત્તાનિ, સાયં સત્ત પુનાપરે;

વિજાયિત્વાન ખાદામિ, તેપિ ના હોન્તિ મે અલં.

૩૮. ‘‘પરિડય્હતિ ધૂમાયતિ, ખુદાય હદયં મમ;

નિબ્બુતિં નાધિગચ્છામિ, અગ્ગિદડ્ઢાવ આતપે’’તિ.

૩૯. ‘‘કિં નુ કાયેન વાચાય, મનસા દુક્કટં કતં;

કિસ્સ કમ્મવિપાકેન, પુત્તમંસાનિ ખાદસી’’તિ.

૪૦. ‘‘અહૂ મય્હં દુવે પુત્તા, ઉભો સમ્પત્તયોબ્બના;

સાહં પુત્તબલૂપેતા, સામિકં અતિમઞ્ઞિસં.

૪૧. ‘‘તતો મે સામિકો કુદ્ધો, સપત્તિં મય્હમાનયિ;

સા ચ ગબ્ભં અલભિત્થ, તસ્સા પાપં અચેતયિં.

૪૨. ‘‘સાહં પદુટ્ઠમનસા, અકરિં ગબ્ભપાતનં;

તસ્સા તેમાસિકો ગબ્ભો, પુબ્બલોહિતકો [પુબ્બલોહિતકો (ક.)] પતિ.

૪૩. ‘‘તદસ્સા માતા કુપિતા, મય્હં ઞાતી સમાનયિ;

સપથઞ્ચ મં કારેસિ, પરિભાસાપયી ચ મં.

૪૪. ‘‘સાહં ઘોરઞ્ચ સપથં, મુસાવાદં અભાસિસં;

‘પુત્તમંસાનિ ખાદામિ, સચે તં પકતં મયા’.

૪૫. ‘‘તસ્સ કમ્મસ્સ વિપાકેન, મુસાવાદસ્સ ચૂભયં;

પુત્તમંસાનિ ખાદામિ, પુબ્બલોહિતમક્ખિતા’’તિ.

સત્તપુત્તખાદપેતિવત્થુ સત્તમં.

૮. ગોણપેતવત્થુ

૪૬. ‘‘કિં નુ ઉમ્મત્તરૂપોવ, લાયિત્વા હરિતં તિણં;

ખાદ ખાદાતિ લપસિ, ગતસત્તં જરગ્ગવં.

૪૭. ‘‘ન હિ અન્નેન પાનેન, મતો ગોણો સમુટ્ઠહે;

ત્વંસિ બાલો ચ [બાલોવ (ક.)] દુમ્મેધો, યથા તઞ્ઞોવ દુમ્મતી’’તિ.

૪૮. ‘‘ઇમે પાદા ઇદં સીસં, અયં કાયો સવાલધિ;

નેત્તા તથેવ તિટ્ઠન્તિ, અયં ગોણો સમુટ્ઠહે.

૪૯. ‘‘નાય્યકસ્સ હત્થપાદા, કાયો સીસઞ્ચ દિસ્સતિ;

રુદં મત્તિકથૂપસ્મિં, નનુ ત્વઞ્ઞેવ દુમ્મતી’’તિ.

૫૦. ‘‘આદિત્તં વત મં સન્તં, ઘતસિત્તંવ પાવકં;

વારિના વિય ઓસિઞ્ચં, સબ્બં નિબ્બાપયે દરં.

૫૧. ‘‘અબ્બહી [અબ્બૂળ્હં (બહૂસુ)] વત મે સલ્લં, સોકં હદયનિસ્સિતં;

યો મે સોકપરેતસ્સ, પિતુસોકં અપાનુદિ.

૫૨. ‘‘સ્વાહં અબ્બૂળ્હસલ્લોસ્મિ, સીતિભૂતોસ્મિ નિબ્બુતો;

ન સોચામિ ન રોદામિ, તવ સુત્વાન માણવ’.

૫૩. એવં કરોન્તિ સપ્પઞ્ઞા, યે હોન્તિ અનુકમ્પકા;

વિનિવત્તયન્તિ સોકમ્હા, સુજાતો પિતરં યથાતિ.

ગોણપેતવત્થુ અટ્ઠમં.

૯. મહાપેસકારપેતિવત્થુ

૫૪. ‘‘ગૂથઞ્ચ મુત્તં રુહિરઞ્ચ પુબ્બં, પરિભુઞ્જતિ કિસ્સ અયં વિપાકો;

અયં નુ કિં કમ્મમકાસિ નારી, યા સબ્બદા લોહિતપુબ્બભક્ખા.

૫૫. ‘‘નવાનિ વત્થાનિ સુભાનિ ચેવ, મુદૂનિ સુદ્ધાનિ ચ લોમસાનિ;

દિન્નાનિ મિસ્સા કિતકા [કિટકા (ક.)] ભવન્તિ, અયં નુ કિં કમ્મમકાસિ નારી’’તિ.

૫૬. ‘‘ભરિયા મમેસા અહૂ ભદન્તે, અદાયિકા મચ્છરિની કદરિયા;

સા મં દદન્તં સમણબ્રાહ્મણાનં, અક્કોસતિ ચ પરિભાસતિ ચ.

૫૭. ‘‘‘ગૂથઞ્ચ મુત્તં રુહિરઞ્ચ પુબ્બં, પરિભુઞ્જ ત્વં અસુચિં સબ્બકાલં;

એતં તે પરલોકસ્મિં હોતુ, વત્થા ચ તે કિટકસમા ભવન્તુ’;

એતાદિસં દુચ્ચરિતં ચરિત્વા, ઇધાગતા ચિરરત્તાય ખાદતી’’તિ.

મહાપેસકારપેતિવત્થુ નવમં.

૧૦. ખલ્લાટિયપેતિવત્થુ

૫૮. ‘‘કા નુ અન્તોવિમાનસ્મિં, તિટ્ઠન્તી નૂપનિક્ખમિ;

ઉપનિક્ખમસ્સુ ભદ્દે, પસ્સામ તં બહિટ્ઠિત’’ન્તિ.

૫૯. ‘‘અટ્ટીયામિ હરાયામિ, નગ્ગા નિક્ખમિતું બહિ;

કેસેહમ્હિ પટિચ્છન્ના, પુઞ્ઞં મે અપ્પકં કત’’ન્તિ.

૬૦. ‘‘હન્દુત્તરીયં દદામિ તે, ઇદં દુસ્સં નિવાસય;

ઇદં દુસ્સં નિવાસેત્વા, એહિ નિક્ખમ સોભને;

ઉપનિક્ખમસ્સુ ભદ્દે, પસ્સામ તં બહિટ્ઠિત’’ન્તિ.

૬૧. ‘‘હત્થેન હત્થે તે દિન્નં, ન મય્હં ઉપકપ્પતિ;

એસેત્થુપાસકો સદ્ધો, સમ્માસમ્બુદ્ધસાવકો.