૩. બોજ્ઝઙ્ગકથા

૧૭. સાવત્થિનિદાનં. ‘‘સત્તિમે, ભિક્ખવે [સં. નિ. ૫.૨૦૦], બોજ્ઝઙ્ગા. કતમે સત્ત? સતિસમ્બોજ્ઝઙ્ગો, ધમ્મવિચયસમ્બોજ્ઝઙ્ગો, વીરિયસમ્બોજ્ઝઙ્ગો, પીતિસમ્બોજ્ઝઙ્ગો, પસ્સદ્ધિસમ્બોજ્ઝઙ્ગો, સમાધિસમ્બોજ્ઝઙ્ગો, ઉપેક્ખાસમ્બોજ્ઝઙ્ગો – ઇમે ખો, ભિક્ખવે, સત્ત બોજ્ઝઙ્ગા’’.

બોજ્ઝઙ્ગાતિ કેનટ્ઠેન બોજ્ઝઙ્ગા? બોધાય સંવત્તન્તીતિ – બોજ્ઝઙ્ગા. બુજ્ઝન્તીતિ – બોજ્ઝઙ્ગા. અનુબુજ્ઝન્તીતિ – બોજ્ઝઙ્ગા. પટિબુજ્ઝન્તીતિ – બોજ્ઝઙ્ગા. સમ્બુજ્ઝન્તીતિ – બોજ્ઝઙ્ગા.

બુજ્ઝનટ્ઠેન બોજ્ઝઙ્ગા, અનુબુજ્ઝનટ્ઠેન બોજ્ઝઙ્ગા, પટિબુજ્ઝનટ્ઠેન બોજ્ઝઙ્ગા, સમ્બુજ્ઝનટ્ઠેન બોજ્ઝઙ્ગા.

બોધેન્તીતિ – બોજ્ઝઙ્ગા. અનુબોધેન્તીતિ – બોજ્ઝઙ્ગા. પટિબોધેન્તીતિ – બોજ્ઝઙ્ગા. સમ્બોધેન્તીતિ – બોજ્ઝઙ્ગા.

બોધનટ્ઠેન બોજ્ઝઙ્ગા, અનુબોધનટ્ઠેન બોજ્ઝઙ્ગા, પટિબોધનટ્ઠેન બોજ્ઝઙ્ગા, સમ્બોધનટ્ઠેન બોજ્ઝઙ્ગા.

બોધિપક્ખિયટ્ઠેન બોજ્ઝઙ્ગા, અનુબોધિપક્ખિયટ્ઠેન બોજ્ઝઙ્ગા, પટિબોધિપક્ખિયટ્ઠેન બોજ્ઝઙ્ગા, સમ્બોધિપક્ખિયટ્ઠેન બોજ્ઝઙ્ગા.

બુદ્ધિલભનટ્ઠેન બોજ્ઝઙ્ગા, બુદ્ધિપટિલભનટ્ઠેન બોજ્ઝઙ્ગા, બુદ્ધિરોપનટ્ઠેન બોજ્ઝઙ્ગા, બુદ્ધિઅભિરોપનટ્ઠેન બોજ્ઝઙ્ગા, બુદ્ધિપાપનટ્ઠેન બોજ્ઝઙ્ગા, બુદ્ધિસમ્પાપનટ્ઠેન બોજ્ઝઙ્ગા.

મૂલમૂલકાદિદસકં

૧૮. મૂલટ્ઠેન બોજ્ઝઙ્ગા, મૂલચરિયટ્ઠેન બોજ્ઝઙ્ગા, મૂલપરિગ્ગહટ્ઠેન બોજ્ઝઙ્ગા, મૂલપરિવારટ્ઠેન બોજ્ઝઙ્ગા, મૂલપરિપૂરણટ્ઠેન [મૂલપરિપૂરટ્ઠેન (સ્યા. ક.) એવમુપરિપિ] બોજ્ઝઙ્ગા, મૂલપરિપાકટ્ઠેન બોજ્ઝઙ્ગા, મૂલપટિસમ્ભિદટ્ઠેન બોજ્ઝઙ્ગા, મૂલપટિસમ્ભિદાપાપનટ્ઠેન બોજ્ઝઙ્ગા, મૂલપટિસમ્ભિદાય વસીભાવટ્ઠેન બોજ્ઝઙ્ગા, મૂલપટિસમ્ભિદાય વસીભાવપ્પત્તાનમ્પિ બોજ્ઝઙ્ગા.

હેતુટ્ઠેન બોજ્ઝઙ્ગા, હેતુચરિયટ્ઠેન બોજ્ઝઙ્ગા, હેતુપરિગ્ગહટ્ઠેન બોજ્ઝઙ્ગા, હેતુપરિવારટ્ઠેન બોજ્ઝઙ્ગા, હેતુપરિપૂરણટ્ઠેન બોજ્ઝઙ્ગા, હેતુપરિપાકટ્ઠેન બોજ્ઝઙ્ગા, હેતુપટિસમ્ભિદટ્ઠેન બોજ્ઝઙ્ગા, હેતુપટિસમ્ભિદાપાપનટ્ઠેન બોજ્ઝઙ્ગા, હેતુપટિસમ્ભિદાય વસીભાવટ્ઠેન બોજ્ઝઙ્ગા, હેતુપટિસમ્ભિદાય વસીભાવપ્પત્તાનમ્પિ બોજ્ઝઙ્ગા.

પચ્ચયટ્ઠેન બોજ્ઝઙ્ગા, પચ્ચયચરિયટ્ઠેન બોજ્ઝઙ્ગા, પચ્ચયપરિગ્ગહટ્ઠેન બોજ્ઝઙ્ગા, પચ્ચયપરિવારટ્ઠેન બોજ્ઝઙ્ગા, પચ્ચયપરિપૂરણટ્ઠેન બોજ્ઝઙ્ગા, પચ્ચયપરિપાકટ્ઠેન બોજ્ઝઙ્ગા, પચ્ચયપટિસમ્ભિદટ્ઠેન બોજ્ઝઙ્ગા, પચ્ચયપટિસમ્ભિદાપાપનટ્ઠેન બોજ્ઝઙ્ગા, પચ્ચયપટિસમ્ભિદાય વસીભાવટ્ઠેન બોજ્ઝઙ્ગા, પચ્ચયપટિસમ્ભિદાય વસીભાવપ્પત્તાનમ્પિ બોજ્ઝઙ્ગા.

વિસુદ્ધટ્ઠેન બોજ્ઝઙ્ગા, વિસુદ્ધિચરિયટ્ઠેન બોજ્ઝઙ્ગા, વિસુદ્ધિપરિગ્ગહટ્ઠેન બોજ્ઝઙ્ગા, વિસુદ્ધિપરિવારટ્ઠેન બોજ્ઝઙ્ગા, વિસુદ્ધિપરિપૂરણટ્ઠેન બોજ્ઝઙ્ગા, વિસુદ્ધિપરિપાકટ્ઠેન બોજ્ઝઙ્ગા, વિસુદ્ધિપટિસમ્ભિદટ્ઠેન બોજ્ઝઙ્ગા, વિસુદ્ધિપટિસમ્ભિદાપાપનટ્ઠેન બોજ્ઝઙ્ગા, વિસુદ્ધિપટિસમ્ભિદાય વસીભાવટ્ઠેન બોજ્ઝઙ્ગા, વિસુદ્ધિપટિસમ્ભિદાય વસીભાવપ્પત્તાનમ્પિ બોજ્ઝઙ્ગા.

અનવજ્જટ્ઠેન બોજ્ઝઙ્ગા, અનવજ્જચરિયટ્ઠેન બોજ્ઝઙ્ગા, અનવજ્જપરિગ્ગહટ્ઠેન બોજ્ઝઙ્ગા, અનવજ્જપરિવારટ્ઠેન બોજ્ઝઙ્ગા, અનવજ્જપરિપૂરણટ્ઠેન બોજ્ઝઙ્ગા, અનવજ્જપરિપાકટ્ઠેન બોજ્ઝઙ્ગા, અનવજ્જપટિસમ્ભિદટ્ઠેન બોજ્ઝઙ્ગા, અનવજ્જપટિસમ્ભિદાપાપનટ્ઠેન બોજ્ઝઙ્ગા, અનવજ્જપટિસમ્ભિદાય વસીભાવટ્ઠેન બોજ્ઝઙ્ગા, અનવજ્જપટિસમ્ભિદાય વસીભાવપ્પત્તાનમ્પિ બોજ્ઝઙ્ગા.

નેક્ખમ્મટ્ઠેન બોજ્ઝઙ્ગા, નેક્ખમ્મચરિયટ્ઠેન બોજ્ઝઙ્ગા, નેક્ખમ્મપરિગ્ગહટ્ઠેન બોજ્ઝઙ્ગા, નેક્ખમ્મપરિવારટ્ઠેન બોજ્ઝઙ્ગા, નેક્ખમ્મપરિપૂરણટ્ઠેન બોજ્ઝઙ્ગા, નેક્ખમ્મપરિપાકટ્ઠેન બોજ્ઝઙ્ગા, નેક્ખમ્મપટિસમ્ભિદટ્ઠેન બોજ્ઝઙ્ગા, નેક્ખમ્મપટિસમ્ભિદાપાપનટ્ઠેન બોજ્ઝઙ્ગા, નેક્ખમ્મપટિસમ્ભિદાય વસીભાવટ્ઠેન બોજ્ઝઙ્ગા, નેક્ખમ્મપટિસમ્ભિદાય વસીભાવપ્પત્તાનમ્પિ બોજ્ઝઙ્ગા.

વિમુત્તટ્ઠેન બોજ્ઝઙ્ગા, વિમુત્તિચરિયટ્ઠેન બોજ્ઝઙ્ગા, વિમુત્તિપરિગ્ગહટ્ઠેન બોજ્ઝઙ્ગા, વિમુત્તિપરિવારટ્ઠેન બોજ્ઝઙ્ગા, વિમુત્તિપરિપૂરણટ્ઠેન બોજ્ઝઙ્ગા, વિમુત્તિપરિપાકટ્ઠેન બોજ્ઝઙ્ગા, વિમુત્તિપટિસમ્ભિદટ્ઠેન બોજ્ઝઙ્ગા, વિમુત્તિપટિસમ્ભિદાપાપનટ્ઠેન બોજ્ઝઙ્ગા, વિમુત્તિપટિસમ્ભિદાય વસીભાવટ્ઠેન બોજ્ઝઙ્ગા, વિમુત્તિપટિસમ્ભિદાય વસીભાવપ્પત્તાનમ્પિ બોજ્ઝઙ્ગા.

અનાસવટ્ઠેન બોજ્ઝઙ્ગા, અનાસવચરિયટ્ઠેન બોજ્ઝઙ્ગા, અનાસવપરિગ્ગહટ્ઠેન બોજ્ઝઙ્ગા, અનાસવપરિવારટ્ઠેન બોજ્ઝઙ્ગા, અનાસવપરિપૂરણટ્ઠેન બોજ્ઝઙ્ગા, અનાસવપરિપાકટ્ઠેન બોજ્ઝઙ્ગા, અનાસવપટિસમ્ભિદટ્ઠેન બોજ્ઝઙ્ગા, અનાસવપટિસમ્ભિદાપાપનટ્ઠેન બોજ્ઝઙ્ગા, અનાસવપટિસમ્ભિદાય વસીભાવટ્ઠેન બોજ્ઝઙ્ગા, અનાસવપટિસમ્ભિદાય વસીભાવપ્પત્તાનમ્પિ બોજ્ઝઙ્ગા.

વિવેકટ્ઠેન બોજ્ઝઙ્ગા, વિવેકચરિયટ્ઠેન બોજ્ઝઙ્ગા, વિવેકપરિગ્ગહટ્ઠેન બોજ્ઝઙ્ગા, વિવેકપરિવારટ્ઠેન બોજ્ઝઙ્ગા, વિવેકપરિપૂરણટ્ઠેન બોજ્ઝઙ્ગા, વિવેકપરિપાકટ્ઠેન બોજ્ઝઙ્ગા, વિવેકપટિસમ્ભિદટ્ઠેન બોજ્ઝઙ્ગા, વિવેકપટિસમ્ભિદાપાપનટ્ઠેન બોજ્ઝઙ્ગા, વિવેકપટિસમ્ભિદાય વસીભાવટ્ઠેન બોજ્ઝઙ્ગા, વિવેકપટિસમ્ભિદાય વસીભાવપ્પત્તાનમ્પિ બોજ્ઝઙ્ગા.

વોસગ્ગટ્ઠેન બોજ્ઝઙ્ગા, વોસગ્ગચરિયટ્ઠેન બોજ્ઝઙ્ગા, વોસગ્ગપરિગ્ગહટ્ઠેન બોજ્ઝઙ્ગા, વોસગ્ગપરિવારટ્ઠેન બોજ્ઝઙ્ગા, વોસગ્ગપરિપૂરણટ્ઠેન બોજ્ઝઙ્ગા, વોસગ્ગપરિપાકટ્ઠેન બોજ્ઝઙ્ગા, વોસગ્ગપટિસમ્ભિદટ્ઠેન બોજ્ઝઙ્ગા, વોસગ્ગપટિસમ્ભિદાપાપનટ્ઠેન બોજ્ઝઙ્ગા, વોસગ્ગપટિસમ્ભિદાય વસીભાવટ્ઠેન બોજ્ઝઙ્ગા, વોસગ્ગપટિસમ્ભિદાય વસીભાવપ્પત્તાનમ્પિ બોજ્ઝઙ્ગા.

૧૯. મૂલટ્ઠં બુજ્ઝન્તીતિ – બોજ્ઝઙ્ગા. હેતુટ્ઠં બુજ્ઝન્તીતિ – બોજ્ઝઙ્ગા. પચ્ચયટ્ઠં બુજ્ઝન્તીતિ – બોજ્ઝઙ્ગા. વિસુદ્ધટ્ઠં બુજ્ઝન્તીતિ – બોજ્ઝઙ્ગા. અનવજ્જટ્ઠં બુજ્ઝન્તીતિ – બોજ્ઝઙ્ગા. નેક્ખમ્મટ્ઠં બુજ્ઝન્તીતિ – બોજ્ઝઙ્ગા. વિમુત્તટ્ઠં બુજ્ઝન્તીતિ – બોજ્ઝઙ્ગા. અનાસવટ્ઠં બુજ્ઝન્તીતિ – બોજ્ઝઙ્ગા. વિવેકટ્ઠં બુજ્ઝન્તીતિ – બોજ્ઝઙ્ગા. વોસગ્ગટ્ઠં બુજ્ઝન્તીતિ – બોજ્ઝઙ્ગા.

મૂલચરિયટ્ઠં બુજ્ઝન્તીતિ – બોજ્ઝઙ્ગા. હેતુચરિયટ્ઠં બુજ્ઝન્તીતિ – બોજ્ઝઙ્ગા. પચ્ચયચરિયટ્ઠં બુજ્ઝન્તીતિ – બોજ્ઝઙ્ગા. વિસુદ્ધિચરિયટ્ઠં બુજ્ઝન્તીતિ – બોજ્ઝઙ્ગા. અનવજ્જચરિયટ્ઠં બુજ્ઝન્તીતિ – બોજ્ઝઙ્ગા. નેક્ખમ્મચરિયટ્ઠં બુજ્ઝન્તીતિ – બોજ્ઝઙ્ગા. વિમુત્તિચરિયટ્ઠં બુજ્ઝન્તીતિ – બોજ્ઝઙ્ગા. અનાસવચરિયટ્ઠં બુજ્ઝન્તીતિ – બોજ્ઝઙ્ગા. વિવેકચરિયટ્ઠં બુજ્ઝન્તીતિ – બોજ્ઝઙ્ગા. વોસગ્ગચરિયટ્ઠં બુજ્ઝન્તીતિ – બોજ્ઝઙ્ગા.

મૂલપરિગ્ગહટ્ઠં બુજ્ઝન્તીતિ – બોજ્ઝઙ્ગા…પે… વોસગ્ગપરિગ્ગહટ્ઠં બુજ્ઝન્તીતિ – બોજ્ઝઙ્ગા. મૂલપરિવારટ્ઠં બુજ્ઝન્તીતિ – બોજ્ઝઙ્ગા…પે… વોસગ્ગપરિવારટ્ઠં બુજ્ઝન્તીતિ – બોજ્ઝઙ્ગા. મૂલપરિપૂરણટ્ઠં બુજ્ઝન્તીતિ – બોજ્ઝઙ્ગા…પે… વોસગ્ગપરિપૂરટ્ઠં બુજ્ઝન્તીતિ – બોજ્ઝઙ્ગા. મૂલપરિપાકટ્ઠં બુજ્ઝન્તીતિ – બોજ્ઝઙ્ગા…પે… વોસગ્ગપરિપાકટ્ઠં બુજ્ઝન્તીતિ – બોજ્ઝઙ્ગા. મૂલપટિસમ્ભિદટ્ઠં બુજ્ઝન્તીતિ – બોજ્ઝઙ્ગા…પે… વોસગ્ગપટિસમ્ભિદટ્ઠં બુજ્ઝન્તીતિ – બોજ્ઝઙ્ગા. મૂલપટિસમ્ભિદાપાપનટ્ઠં બુજ્ઝન્તીતિ – બોજ્ઝઙ્ગા…પે… વોસગ્ગપટિસમ્ભિદાપાપનટ્ઠં બુજ્ઝન્તીતિ – બોજ્ઝઙ્ગા. મૂલપટિસમ્ભિદાય વસીભાવટ્ઠં બુજ્ઝન્તીતિ – બોજ્ઝઙ્ગા…પે… વોસગ્ગપટિસમ્ભિદાય વસીભાવટ્ઠં બુજ્ઝન્તીતિ – બોજ્ઝઙ્ગા…પે….

પરિગ્ગહટ્ઠં બુજ્ઝન્તીતિ – બોજ્ઝઙ્ગા. પરિવારટ્ઠં બુજ્ઝન્તીતિ – બોજ્ઝઙ્ગા. પરિપૂરણટ્ઠં બુજ્ઝન્તીતિ – બોજ્ઝઙ્ગા. એકગ્ગટ્ઠં બુજ્ઝન્તીતિ – બોજ્ઝઙ્ગા. અવિક્ખેપટ્ઠં બુજ્ઝન્તીતિ – બોજ્ઝઙ્ગા. પગ્ગહટ્ઠં બુજ્ઝન્તીતિ – બોજ્ઝઙ્ગા. અવિસારટ્ઠં બુજ્ઝન્તીતિ – બોજ્ઝઙ્ગા. અનાવિલટ્ઠં બુજ્ઝન્તીતિ – બોજ્ઝઙ્ગા. અનિઞ્જનટ્ઠં બુજ્ઝન્તીતિ – બોજ્ઝઙ્ગા. એકત્તુપટ્ઠાનવસેન ચિત્તસ્સ ઠિતટ્ઠં બુજ્ઝન્તીતિ – બોજ્ઝઙ્ગા. આરમ્મણટ્ઠં બુજ્ઝન્તીતિ – બોજ્ઝઙ્ગા. ગોચરટ્ઠં બુજ્ઝન્તીતિ – બોજ્ઝઙ્ગા. પહાનટ્ઠં બુજ્ઝન્તીતિ – બોજ્ઝઙ્ગા. પરિચ્ચાગટ્ઠં બુજ્ઝન્તીતિ – બોજ્ઝઙ્ગા. વુટ્ઠાનટ્ઠં બુજ્ઝન્તીતિ – બોજ્ઝઙ્ગા. વિવટ્ટનટ્ઠં બુજ્ઝન્તીતિ – બોજ્ઝઙ્ગા. સન્તટ્ઠં બુજ્ઝન્તીતિ – બોજ્ઝઙ્ગા. પણીતટ્ઠં બુજ્ઝન્તીતિ – બોજ્ઝઙ્ગા. વિમુત્તટ્ઠં બુજ્ઝન્તીતિ – બોજ્ઝઙ્ગા. અનાસવટ્ઠં બુજ્ઝન્તીતિ – બોજ્ઝઙ્ગા. તરણટ્ઠં બુજ્ઝન્તીતિ – બોજ્ઝઙ્ગા. અનિમિત્તટ્ઠં બુજ્ઝન્તીતિ – બોજ્ઝઙ્ગા. અપ્પણિહિતટ્ઠં બુજ્ઝન્તીતિ – બોજ્ઝઙ્ગા. સુઞ્ઞતટ્ઠં બુજ્ઝન્તીતિ – બોજ્ઝઙ્ગા. એકરસટ્ઠં બુજ્ઝન્તીતિ – બોજ્ઝઙ્ગા. અનતિવત્તનટ્ઠં બુજ્ઝન્તીતિ – બોજ્ઝઙ્ગા. યુગનદ્ધટ્ઠં બુજ્ઝન્તીતિ – બોજ્ઝઙ્ગા. નિય્યાનટ્ઠં બુજ્ઝન્તીતિ – બોજ્ઝઙ્ગા. હેતુટ્ઠં બુજ્ઝન્તીતિ – બોજ્ઝઙ્ગા. દસ્સનટ્ઠં બુજ્ઝન્તીતિ – બોજ્ઝઙ્ગા. આધિપતેય્યટ્ઠં બુજ્ઝન્તીતિ – બોજ્ઝઙ્ગા.

સમથસ્સ અવિક્ખેપટ્ઠં બુજ્ઝન્તીતિ – બોજ્ઝઙ્ગા. વિપસ્સનાય અનુપસ્સનટ્ઠં બુજ્ઝન્તીતિ – બોજ્ઝઙ્ગા. સમથવિપસ્સનાનં એકરસટ્ઠં બુજ્ઝન્તીતિ – બોજ્ઝઙ્ગા. યુગનદ્ધસ્સ અનતિવત્તનટ્ઠં બુજ્ઝન્તીતિ – બોજ્ઝઙ્ગા. સિક્ખાય સમાદાનટ્ઠં બુજ્ઝન્તીતિ – બોજ્ઝઙ્ગા. આરમ્મણસ્સ ગોચરટ્ઠં બુજ્ઝન્તીતિ – બોજ્ઝઙ્ગા. લીનસ્સ ચિત્તસ્સ પગ્ગહટ્ઠં બુજ્ઝન્તીતિ – બોજ્ઝઙ્ગા. ઉદ્ધતસ્સ ચિત્તસ્સ નિગ્ગહટ્ઠં બુજ્ઝન્તીતિ – બોજ્ઝઙ્ગા. ઉભોવિસુદ્ધાનં અજ્ઝુપેક્ખનટ્ઠં બુજ્ઝન્તીતિ – બોજ્ઝઙ્ગા. વિસેસાધિગમટ્ઠં બુજ્ઝન્તીતિ – બોજ્ઝઙ્ગા. ઉત્તરિ પટિવેધટ્ઠં બુજ્ઝન્તીતિ – બોજ્ઝઙ્ગા. સચ્ચાભિસમયટ્ઠં બુજ્ઝન્તીતિ – બોજ્ઝઙ્ગા. નિરોધે પતિટ્ઠાપકટ્ઠં બુજ્ઝન્તીતિ – બોજ્ઝઙ્ગા.

સદ્ધિન્દ્રિયસ્સ અધિમોક્ખટ્ઠં બુજ્ઝન્તીતિ – બોજ્ઝઙ્ગા…પે… પઞ્ઞિન્દ્રિયસ્સ દસ્સનટ્ઠં બુજ્ઝન્તીતિ – બોજ્ઝઙ્ગા. સદ્ધાબલસ્સ અસ્સદ્ધિયે અકમ્પિયટ્ઠં બુજ્ઝન્તીતિ – બોજ્ઝઙ્ગા…પે… પઞ્ઞાબલસ્સ અવિજ્જાય અકમ્પિયટ્ઠં બુજ્ઝન્તીતિ – બોજ્ઝઙ્ગા. સતિસમ્બોજ્ઝઙ્ગસ્સ ઉપટ્ઠાનટ્ઠં બુજ્ઝન્તીતિ – બોજ્ઝઙ્ગા…પે… ઉપેક્ખાસમ્બોજ્ઝઙ્ગસ્સ પટિસઙ્ખાનટ્ઠં બુજ્ઝન્તીતિ – બોજ્ઝઙ્ગા. સમ્માદિટ્ઠિયા દસ્સનટ્ઠં બુજ્ઝન્તીતિ – બોજ્ઝઙ્ગા…પે… સમ્માસમાધિસ્સ અવિક્ખેપટ્ઠં બુજ્ઝન્તીતિ – બોજ્ઝઙ્ગા.

ઇન્દ્રિયાનં આધિપતેય્યટ્ઠં બુજ્ઝન્તીતિ – બોજ્ઝઙ્ગા. બલાનં અકમ્પિયટ્ઠં બુજ્ઝન્તીતિ – બોજ્ઝઙ્ગા. નિય્યાનટ્ઠં બુજ્ઝન્તીતિ – બોજ્ઝઙ્ગા. મગ્ગસ્સ હેતુટ્ઠં બુજ્ઝન્તીતિ – બોજ્ઝઙ્ગા. સતિપટ્ઠાનાનં ઉપટ્ઠાનટ્ઠં બુજ્ઝન્તીતિ – બોજ્ઝઙ્ગા. સમ્મપ્પધાનાનં પદહનટ્ઠં બુજ્ઝન્તીતિ – બોજ્ઝઙ્ગા. ઇદ્ધિપાદાનં ઇજ્ઝનટ્ઠં બુજ્ઝન્તીતિ – બોજ્ઝઙ્ગા. સચ્ચાનં તથટ્ઠં બુજ્ઝન્તીતિ – બોજ્ઝઙ્ગા. પયોગાનં પટિપ્પસ્સદ્ધટ્ઠં બુજ્ઝન્તીતિ – બોજ્ઝઙ્ગા. ફલાનં સચ્છિકિરિયટ્ઠં બુજ્ઝન્તીતિ – બોજ્ઝઙ્ગા.

વિતક્કસ્સ અભિનિરોપનટ્ઠં બુજ્ઝન્તીતિ – બોજ્ઝઙ્ગા. વિચારસ્સ ઉપવિચારટ્ઠં બુજ્ઝન્તીતિ – બોજ્ઝઙ્ગા. પીતિયા ફરણટ્ઠં બુજ્ઝન્તીતિ – બોજ્ઝઙ્ગા. સુખસ્સ અભિસન્દનટ્ઠં બુજ્ઝન્તીતિ – બોજ્ઝઙ્ગા. ચિત્તસ્સ એકગ્ગટ્ઠં બુજ્ઝન્તીતિ – બોજ્ઝઙ્ગા.

આવજ્જનટ્ઠં બુજ્ઝન્તીતિ – બોજ્ઝઙ્ગા. વિજાનનટ્ઠં બુજ્ઝન્તીતિ – બોજ્ઝઙ્ગા. પજાનનટ્ઠં બુજ્ઝન્તીતિ – બોજ્ઝઙ્ગા. સઞ્જાનનટ્ઠં બુજ્ઝન્તીતિ – બોજ્ઝઙ્ગા. એકોદટ્ઠં બુજ્ઝન્તીતિ – બોજ્ઝઙ્ગા. અભિઞ્ઞાય ઞાતટ્ઠં [અભિઞ્ઞેય્યત્થં (સ્યા.)] બુજ્ઝન્તીતિ – બોજ્ઝઙ્ગા. પરિઞ્ઞાય તીરણટ્ઠં બુજ્ઝન્તીતિ – બોજ્ઝઙ્ગા. પહાનસ્સ પરિચ્ચાગટ્ઠં બુજ્ઝન્તીતિ – બોજ્ઝઙ્ગા. ભાવનાય એકરસટ્ઠં બુજ્ઝન્તીતિ – બોજ્ઝઙ્ગા. સચ્છિકિરિયાય ફસ્સનટ્ઠં બુજ્ઝન્તીતિ – બોજ્ઝઙ્ગા. ખન્ધાનં ખન્ધટ્ઠં બુજ્ઝન્તીતિ – બોજ્ઝઙ્ગા. ધાતૂનં ધાતુટ્ઠં બુજ્ઝન્તીતિ – બોજ્ઝઙ્ગા. આયતનાનં આયતનટ્ઠં બુજ્ઝન્તીતિ – બોજ્ઝઙ્ગા. સઙ્ખતાનં સઙ્ખતટ્ઠં બુજ્ઝન્તીતિ – બોજ્ઝઙ્ગા. અસઙ્ખતસ્સ અસઙ્ખતટ્ઠં બુજ્ઝન્તીતિ – બોજ્ઝઙ્ગા.

ચિત્તટ્ઠં બુજ્ઝન્તીતિ – બોજ્ઝઙ્ગા. ચિત્તાનન્તરિયટ્ઠં બુજ્ઝન્તીતિ – બોજ્ઝઙ્ગા. ચિત્તસ્સ વુટ્ઠાનટ્ઠં બુજ્ઝન્તીતિ – બોજ્ઝઙ્ગા. ચિત્તસ્સ વિવટ્ટનટ્ઠં [વિવજ્જનટ્ઠં (સ્યા.)] બુજ્ઝન્તીતિ – બોજ્ઝઙ્ગા. ચિત્તસ્સ હેતુટ્ઠં બુજ્ઝન્તીતિ – બોજ્ઝઙ્ગા. ચિત્તસ્સ પચ્ચયટ્ઠં બુજ્ઝન્તીતિ – બોજ્ઝઙ્ગા. ચિત્તસ્સ વત્થુટ્ઠં બુજ્ઝન્તીતિ – બોજ્ઝઙ્ગા. ચિત્તસ્સ ભૂમટ્ઠં [ભુમ્મટ્ઠં (સ્યા.) પટિ. મ. ૧.૧૪ પસ્સિતબ્બા] બુજ્ઝન્તીતિ – બોજ્ઝઙ્ગા. ચિત્તસ્સ આરમ્મણટ્ઠં બુજ્ઝન્તીતિ – બોજ્ઝઙ્ગા. ચિત્તસ્સ ગોચરટ્ઠં બુજ્ઝન્તીતિ – બોજ્ઝઙ્ગા. ચિત્તસ્સ ચરિયટ્ઠં બુજ્ઝન્તીતિ – બોજ્ઝઙ્ગા. ચિત્તસ્સ ગતટ્ઠં બુજ્ઝન્તીતિ – બોજ્ઝઙ્ગા. ચિત્તસ્સ અભિનીહારટ્ઠં બુજ્ઝન્તીતિ – બોજ્ઝઙ્ગા. ચિત્તસ્સ નિય્યાનટ્ઠં બુજ્ઝન્તીતિ – બોજ્ઝઙ્ગા. ચિત્તસ્સ નિસ્સરણટ્ઠં બુજ્ઝન્તીતિ – બોજ્ઝઙ્ગા.

એકત્તે આવજ્જનટ્ઠં બુજ્ઝન્તીતિ – બોજ્ઝઙ્ગા. એકત્તે વિજાનનટ્ઠં બુજ્ઝન્તીતિ – બોજ્ઝઙ્ગા. એકત્તે પજાનનટ્ઠં બુજ્ઝન્તીતિ – બોજ્ઝઙ્ગા. એકત્તે સઞ્જાનનટ્ઠં બુજ્ઝન્તીતિ – બોજ્ઝઙ્ગા. એકત્તે એકોદટ્ઠં બુજ્ઝન્તીતિ – બોજ્ઝઙ્ગા. ( ) [(એકત્તે ઉપનિબન્ધનટ્ઠં બુજ્ઝન્તીતિ – બોજ્ઝઙ્ગા) (સબ્બત્થ)]. એકત્તે પક્ખન્દનટ્ઠં બુજ્ઝન્તીતિ – બોજ્ઝઙ્ગા. એકત્તે પસીદનટ્ઠં બુજ્ઝન્તીતિ – બોજ્ઝઙ્ગા. એકત્તે સન્તિટ્ઠનટ્ઠં બુજ્ઝન્તીતિ – બોજ્ઝઙ્ગા. એકત્તે વિમુચ્ચનટ્ઠં બુજ્ઝન્તીતિ – બોજ્ઝઙ્ગા. એકત્તે એતં સન્તન્તિ પસ્સનટ્ઠં બુજ્ઝન્તીતિ – બોજ્ઝઙ્ગા. એકત્તે યાનીકતટ્ઠં બુજ્ઝન્તીતિ – બોજ્ઝઙ્ગા. એકત્તે વત્થુકતટ્ઠં બુજ્ઝન્તીતિ – બોજ્ઝઙ્ગા. એકત્તે અનુટ્ઠિતટ્ઠં બુજ્ઝન્તીતિ – બોજ્ઝઙ્ગા. એકત્તે પરિચિતટ્ઠં બુજ્ઝન્તીતિ – બોજ્ઝઙ્ગા. એકત્તે સુસમારદ્ધટ્ઠં બુજ્ઝન્તીતિ – બોજ્ઝઙ્ગા. એકત્તે પરિગ્ગહટ્ઠં બુજ્ઝન્તીતિ – બોજ્ઝઙ્ગા. એકત્તે પરિવારટ્ઠં બુજ્ઝન્તીતિ – બોજ્ઝઙ્ગા. એકત્તે પરિપૂરણટ્ઠં બુજ્ઝન્તીતિ – બોજ્ઝઙ્ગા. એકત્તે સમોધાનટ્ઠં બુજ્ઝન્તીતિ – બોજ્ઝઙ્ગા. એકત્તે અધિટ્ઠાનટ્ઠં બુજ્ઝન્તીતિ – બોજ્ઝઙ્ગા. એકત્તે આસેવનટ્ઠં બુજ્ઝન્તીતિ – બોજ્ઝઙ્ગા. એકત્તે ભાવનટ્ઠં બુજ્ઝન્તીતિ – બોજ્ઝઙ્ગા. એકત્તે બહુલીકમ્મટ્ઠં બુજ્ઝન્તીતિ – બોજ્ઝઙ્ગા. એકત્તે સુસમુગ્ગતટ્ઠં બુજ્ઝન્તીતિ – બોજ્ઝઙ્ગા. એકત્તે સુવિમુત્તટ્ઠં બુજ્ઝન્તીતિ – બોજ્ઝઙ્ગા. એકત્તે બુજ્ઝનટ્ઠં બુજ્ઝન્તીતિ – બોજ્ઝઙ્ગા. એકત્તે અનુબુજ્ઝનટ્ઠં બુજ્ઝન્તીતિ – બોજ્ઝઙ્ગા. એકત્તે પટિબુજ્ઝનટ્ઠં બુજ્ઝન્તીતિ – બોજ્ઝઙ્ગા. એકત્તે સમ્બુજ્ઝનટ્ઠં બુજ્ઝન્તીતિ – બોજ્ઝઙ્ગા. એકત્તે બોધનટ્ઠં બુજ્ઝન્તીતિ – બોજ્ઝઙ્ગા. એકત્તે અનુબોધનટ્ઠં બુજ્ઝન્તીતિ – બોજ્ઝઙ્ગા. એકત્તે પટિબોધનટ્ઠં બુજ્ઝન્તીતિ – બોજ્ઝઙ્ગા. એકત્તે સમ્બુજ્ઝનટ્ઠં બુજ્ઝન્તીતિ – બોજ્ઝઙ્ગા. એકત્તે બોધિપક્ખિયટ્ઠં બુજ્ઝન્તીતિ – બોજ્ઝઙ્ગા. એકત્તે અનુબોધિપક્ખિયટ્ઠં બુજ્ઝન્તીતિ – બોજ્ઝઙ્ગા. એકત્તે પટિબોધિપક્ખિયટ્ઠં બુજ્ઝન્તીતિ – બોજ્ઝઙ્ગા. એકત્તે સમ્બોધિપક્ખિયટ્ઠં બુજ્ઝન્તીતિ – બોજ્ઝઙ્ગા. એકત્તે જોતનટ્ઠં બુજ્ઝન્તીતિ – બોજ્ઝઙ્ગા. એકત્તે ઉજ્જોતનટ્ઠં બુજ્ઝન્તીતિ – બોજ્ઝઙ્ગા. એકત્તે અનુજોતનટ્ઠં બુજ્ઝન્તીતિ – બોજ્ઝઙ્ગા. એકત્તે પટિજોતનટ્ઠં બુજ્ઝન્તીતિ – બોજ્ઝઙ્ગા. એકત્તે સઞ્જોતનટ્ઠં બુજ્ઝન્તીતિ – બોજ્ઝઙ્ગા.

પતાપનટ્ઠં બુજ્ઝન્તીતિ – બોજ્ઝઙ્ગા. વિરોચનટ્ઠં બુજ્ઝન્તીતિ – બોજ્ઝઙ્ગા. કિલેસાનં સન્તાપનટ્ઠં બુજ્ઝન્તીતિ – બોજ્ઝઙ્ગા. અમલટ્ઠં બુજ્ઝન્તીતિ – બોજ્ઝઙ્ગા. વિમલટ્ઠં બુજ્ઝન્તીતિ – બોજ્ઝઙ્ગા. નિમ્મલટ્ઠં બુજ્ઝન્તીતિ – બોજ્ઝઙ્ગા. સમટ્ઠં બુજ્ઝન્તીતિ – બોજ્ઝઙ્ગા. સમયટ્ઠં બુજ્ઝન્તીતિ – બોજ્ઝઙ્ગા. વિવેકટ્ઠં બુજ્ઝન્તીતિ – બોજ્ઝઙ્ગા. વિવેકચરિયટ્ઠં બુજ્ઝન્તીતિ – બોજ્ઝઙ્ગા. વિરાગટ્ઠં બુજ્ઝન્તીતિ – બોજ્ઝઙ્ગા. વિરાગચરિયટ્ઠં બુજ્ઝન્તીતિ – બોજ્ઝઙ્ગા. નિરોધટ્ઠં બુજ્ઝન્તીતિ – બોજ્ઝઙ્ગા. નિરોધચરિયટ્ઠં બુજ્ઝન્તીતિ – બોજ્ઝઙ્ગા. વોસગ્ગટ્ઠં બુજ્ઝન્તીતિ – બોજ્ઝઙ્ગા. વોસગ્ગચરિયટ્ઠં બુજ્ઝન્તીતિ – બોજ્ઝઙ્ગા. વિમુત્તટ્ઠં બુજ્ઝન્તીતિ – બોજ્ઝઙ્ગા. વિમુત્તિચરિયટ્ઠં બુજ્ઝન્તીતિ – બોજ્ઝઙ્ગા.

છન્દટ્ઠં બુજ્ઝન્તીતિ – બોજ્ઝઙ્ગા. છન્દસ્સ મૂલટ્ઠં બુજ્ઝન્તીતિ – બોજ્ઝઙ્ગા. છન્દસ્સ પાદટ્ઠં બુજ્ઝન્તીતિ – બોજ્ઝઙ્ગા. છન્દસ્સ પધાનટ્ઠં બુજ્ઝન્તીતિ – બોજ્ઝઙ્ગા. છન્દસ્સ ઇજ્ઝનટ્ઠં બુજ્ઝન્તીતિ – બોજ્ઝઙ્ગા. છન્દસ્સ અધિમોક્ખટ્ઠં બુજ્ઝન્તીતિ – બોજ્ઝઙ્ગા. છન્દસ્સ પગ્ગહટ્ઠં બુજ્ઝન્તીતિ – બોજ્ઝઙ્ગા. છન્દસ્સ ઉપટ્ઠાનટ્ઠં બુજ્ઝન્તીતિ – બોજ્ઝઙ્ગા. છન્દસ્સ અવિક્ખેપટ્ઠં બુજ્ઝન્તીતિ – બોજ્ઝઙ્ગા. છન્દસ્સ દસ્સનટ્ઠં બુજ્ઝન્તીતિ – બોજ્ઝઙ્ગા.

વીરિયટ્ઠં બુજ્ઝન્તીતિ – બોજ્ઝઙ્ગા…પે… ચિત્તટ્ઠં બુજ્ઝન્તીતિ – બોજ્ઝઙ્ગા…પે… વીમંસટ્ઠં બુજ્ઝન્તીતિ – બોજ્ઝઙ્ગા. વીમંસાય મૂલટ્ઠં બુજ્ઝન્તીતિ – બોજ્ઝઙ્ગા. વીમંસાય પાદટ્ઠં બુજ્ઝન્તીતિ – બોજ્ઝઙ્ગા. વીમંસાય પધાનટ્ઠં બુજ્ઝન્તીતિ – બોજ્ઝઙ્ગા. વીમંસાય ઇજ્ઝનટ્ઠં બુજ્ઝન્તીતિ – બોજ્ઝઙ્ગા. વીમંસાય અધિમોક્ખટ્ઠં બુજ્ઝન્તીતિ – બોજ્ઝઙ્ગા. વીમંસાય પગ્ગહટ્ઠં બુજ્ઝન્તીતિ – બોજ્ઝઙ્ગા. વીમંસાય ઉપટ્ઠાનટ્ઠં બુજ્ઝન્તીતિ – બોજ્ઝઙ્ગા. વીમંસાય અવિક્ખેપટ્ઠં બુજ્ઝન્તીતિ – બોજ્ઝઙ્ગા. વીમંસાય દસ્સનટ્ઠં બુજ્ઝન્તીતિ – બોજ્ઝઙ્ગા.

દુક્ખટ્ઠં બુજ્ઝન્તીતિ – બોજ્ઝઙ્ગા. દુક્ખસ્સ પીળનટ્ઠં બુજ્ઝન્તીતિ – બોજ્ઝઙ્ગા. દુક્ખસ્સ સઙ્ખતટ્ઠં બુજ્ઝન્તીતિ – બોજ્ઝઙ્ગા. દુક્ખસ્સ સન્તાપટ્ઠં બુજ્ઝન્તીતિ – બોજ્ઝઙ્ગા. દુક્ખસ્સ વિપરિણામટ્ઠં બુજ્ઝન્તીતિ – બોજ્ઝઙ્ગા. સમુદયટ્ઠં બુજ્ઝન્તીતિ – બોજ્ઝઙ્ગા. સમુદયસ્સ આયૂહનટ્ઠં નિદાનટ્ઠં સઞ્ઞોગટ્ઠં પલિબોધટ્ઠં બુજ્ઝન્તીતિ – બોજ્ઝઙ્ગા. નિરોધટ્ઠં બુજ્ઝન્તીતિ – બોજ્ઝઙ્ગા. નિરોધસ્સ નિસ્સરણટ્ઠં વિવેકટ્ઠં અસઙ્ખતટ્ઠં અમતટ્ઠં બુજ્ઝન્તીતિ – બોજ્ઝઙ્ગા. મગ્ગટ્ઠં બુજ્ઝન્તીતિ – બોજ્ઝઙ્ગા. મગ્ગસ્સ નિય્યાનટ્ઠં હેતુટ્ઠં દસ્સનટ્ઠં આધિપતેય્યટ્ઠં બુજ્ઝન્તીતિ – બોજ્ઝઙ્ગા.

તથટ્ઠં બુજ્ઝન્તીતિ – બોજ્ઝઙ્ગા. અનત્તટ્ઠં બુજ્ઝન્તીતિ – બોજ્ઝઙ્ગા. સચ્ચટ્ઠં બુજ્ઝન્તીતિ – બોજ્ઝઙ્ગા. પટિવેધટ્ઠં બુજ્ઝન્તીતિ – બોજ્ઝઙ્ગા. અભિજાનનટ્ઠં બુજ્ઝન્તીતિ – બોજ્ઝઙ્ગા. પરિજાનનટ્ઠં બુજ્ઝન્તીતિ – બોજ્ઝઙ્ગા. ધમ્મટ્ઠં બુજ્ઝન્તીતિ – બોજ્ઝઙ્ગા. ધાતુટ્ઠં બુજ્ઝન્તીતિ – બોજ્ઝઙ્ગા. ઞાતટ્ઠં બુજ્ઝન્તીતિ – બોજ્ઝઙ્ગા. સચ્છિકિરિયટ્ઠં બુજ્ઝન્તીતિ – બોજ્ઝઙ્ગા. ફસ્સનટ્ઠં બુજ્ઝન્તીતિ – બોજ્ઝઙ્ગા. અભિસમયટ્ઠં બુજ્ઝન્તીતિ – બોજ્ઝઙ્ગા.

નેક્ખમ્મં બુજ્ઝન્તીતિ – બોજ્ઝઙ્ગા. અબ્યાપાદં બુજ્ઝન્તીતિ – બોજ્ઝઙ્ગા. આલોકસઞ્ઞં બુજ્ઝન્તીતિ – બોજ્ઝઙ્ગા. અવિક્ખેપં બુજ્ઝન્તીતિ – બોજ્ઝઙ્ગા. ધમ્મવવત્થાનં બુજ્ઝન્તીતિ – બોજ્ઝઙ્ગા. ઞાણં બુજ્ઝન્તીતિ – બોજ્ઝઙ્ગા. પામોજ્જં બુજ્ઝન્તીતિ – બોજ્ઝઙ્ગા. પઠમં ઝાનં બુજ્ઝન્તીતિ – બોજ્ઝઙ્ગા…પે… અરહત્તમગ્ગં બુજ્ઝન્તીતિ – બોજ્ઝઙ્ગા. અરહત્તફલસમાપત્તિં બુજ્ઝન્તીતિ – બોજ્ઝઙ્ગા.

અધિમોક્ખટ્ઠેન સદ્ધિન્દ્રિયં બુજ્ઝન્તીતિ – બોજ્ઝઙ્ગા…પે… દસ્સનટ્ઠેન પઞ્ઞિન્દ્રિયં બુજ્ઝન્તીતિ – બોજ્ઝઙ્ગા. અસ્સદ્ધિયે અકમ્પિયટ્ઠેન સદ્ધાબલં બુજ્ઝન્તીતિ – બોજ્ઝઙ્ગા…પે… અવિજ્જાય અકમ્પિયટ્ઠેન પઞ્ઞાબલં બુજ્ઝન્તીતિ – બોજ્ઝઙ્ગા. ઉપટ્ઠાનટ્ઠેન સતિસમ્બોજ્ઝઙ્ગં બુજ્ઝન્તીતિ – બોજ્ઝઙ્ગા…પે… પટિસઙ્ખાનટ્ઠેન ઉપેક્ખાસમ્બોજ્ઝઙ્ગં બુજ્ઝન્તીતિ – બોજ્ઝઙ્ગા.

દસ્સનટ્ઠેન સમ્માદિટ્ઠિં બુજ્ઝન્તીતિ – બોજ્ઝઙ્ગા…પે… અવિક્ખેપટ્ઠેન સમ્માસમાધિં બુજ્ઝન્તીતિ – બોજ્ઝઙ્ગા. આધિપતેય્યટ્ઠેન ઇન્દ્રિયં બુજ્ઝન્તીતિ – બોજ્ઝઙ્ગા. અકમ્પિયટ્ઠેન બલં બુજ્ઝન્તીતિ – બોજ્ઝઙ્ગા. નિય્યાનટ્ઠં બુજ્ઝન્તીતિ – બોજ્ઝઙ્ગા. હેતુટ્ઠેન મગ્ગં બુજ્ઝન્તીતિ – બોજ્ઝઙ્ગા. ઉપટ્ઠાનટ્ઠેન સતિપટ્ઠાનં બુજ્ઝન્તીતિ – બોજ્ઝઙ્ગા. પદહનટ્ઠેન સમ્મપ્પધાનં બુજ્ઝન્તીતિ – બોજ્ઝઙ્ગા. ઇજ્ઝનટ્ઠેન ઇદ્ધિપાદં બુજ્ઝન્તીતિ – બોજ્ઝઙ્ગા. તથટ્ઠેન સચ્ચં બુજ્ઝન્તીતિ – બોજ્ઝઙ્ગા. અવિક્ખેપટ્ઠેન સમથં બુજ્ઝન્તીતિ – બોજ્ઝઙ્ગા. અનુપસ્સનટ્ઠે વિપસ્સનં …પે… એકરસટ્ઠેન સમથવિપસ્સનં બુજ્ઝન્તીતિ – બોજ્ઝઙ્ગા. અનતિવત્તનટ્ઠેન યુગનદ્ધં બુજ્ઝન્તીતિ – બોજ્ઝઙ્ગા. સંવરટ્ઠેન સીલવિસુદ્ધિં બુજ્ઝન્તીતિ – બોજ્ઝઙ્ગા. અવિક્ખેપટ્ઠેન ચિત્તવિસુદ્ધિં બુજ્ઝન્તીતિ – બોજ્ઝઙ્ગા. દસ્સનટ્ઠેન દિટ્ઠિવિસુદ્ધિં બુજ્ઝન્તીતિ – બોજ્ઝઙ્ગા. મુત્તટ્ઠેન વિમોક્ખં બુજ્ઝન્તીતિ – બોજ્ઝઙ્ગા. પટિવેધટ્ઠેન વિજ્જં બુજ્ઝન્તીતિ – બોજ્ઝઙ્ગા. પરિચ્ચાગટ્ઠેન વિમુત્તિં બુજ્ઝન્તીતિ – બોજ્ઝઙ્ગા. સમુચ્છેદટ્ઠેન ખયે ઞાણં બુજ્ઝન્તીતિ – બોજ્ઝઙ્ગા. પટિપ્પસ્સદ્ધટ્ઠેન અનુપ્પાદે ઞાણં બુજ્ઝન્તીતિ – બોજ્ઝઙ્ગા.

છન્દં મૂલટ્ઠેન બુજ્ઝન્તીતિ – બોજ્ઝઙ્ગા. મનસિકારં સમુટ્ઠાનટ્ઠેન બુજ્ઝન્તીતિ – બોજ્ઝઙ્ગા. ફસ્સં સમોધાનટ્ઠેન બુજ્ઝન્તીતિ – બોજ્ઝઙ્ગા. વેદનં સમોસરણટ્ઠેન બુજ્ઝન્તીતિ – બોજ્ઝઙ્ગા. સમાધિં પમુખટ્ઠેન બુજ્ઝન્તીતિ – બોજ્ઝઙ્ગા. સતિં આધિપતેય્યટ્ઠેન બુજ્ઝન્તીતિ – બોજ્ઝઙ્ગા. પઞ્ઞં તતુત્તરટ્ઠેન બુજ્ઝન્તીતિ – બોજ્ઝઙ્ગા. વિમુત્તિં સારટ્ઠેન બુજ્ઝન્તીતિ – બોજ્ઝઙ્ગા. અમતોગધં નિબ્બાનં પરિયોસાનટ્ઠેન બુજ્ઝન્તીતિ – બોજ્ઝઙ્ગા.

૨૦. સાવત્થિનિદાનં. તત્ર ખો આયસ્મા સારિપુત્તો ભિક્ખૂ આમન્તેસિ – ‘‘આવુસો ભિક્ખવો’’તિ [આવુસોતિ (સ્યા.) સં. નિ. ૫.૧૮૫ પસ્સિતબ્બા]. ‘‘આવુસો’’તિ ખો તે ભિક્ખૂ આયસ્મતો સારિપુત્તસ્સ પચ્ચસ્સોસું. આયસ્મા સારિપુત્તો એતદવોચ –

‘‘સત્તિમે, આવુસો, બોજ્ઝઙ્ગા. કતમે સત્ત? સતિસમ્બોજ્ઝઙ્ગો, ધમ્મવિચયસમ્બોજ્ઝઙ્ગો…પે… ઉપેક્ખાસમ્બોજ્ઝઙ્ગો – ઇમે ખો, આવુસો, સત્ત બોજ્ઝઙ્ગા. ઇમેસં ખ્વાહં, આવુસો, સત્તન્નં બોજ્ઝઙ્ગાનં યેન યેન બોજ્ઝઙ્ગેન આકઙ્ખામિ પુબ્બણ્હસમયં વિહરિતું, તેન તેન બોજ્ઝઙ્ગેન પુબ્બણ્હસમયં વિહરામિ. યેન યેન બોજ્ઝઙ્ગેન આકઙ્ખામિ મજ્ઝન્હિકસમયં…પે… સાયન્હસમયં વિહરિતું, તેન તેન બોજ્ઝઙ્ગેન સાયન્હસમયં વિહરામિ. સતિસમ્બોજ્ઝઙ્ગો ઇતિ ચે મે, ‘આવુસો, હોતિ, અપ્પમાણો’તિ મે હોતિ, ‘સુસમારદ્ધો’તિ મે હોતિ. તિટ્ઠન્તઞ્ચ નં [તિટ્ઠન્તં ચરં (સ્યા.) સં. નિ. ૫.૧૮૫ પસ્સિતબ્બા] ‘તિટ્ઠતી’તિ પજાનામિ. સચેપિ મે ચવતિ, ‘ઇદપ્પચ્ચયા મે ચવતી’તિ પજાનામિ. ધમ્મવિચયસમ્બોજ્ઝઙ્ગો…પે… ઉપેક્ખાસમ્બોજ્ઝઙ્ગો ઇતિ ચે મે, આવુસો, હોતિ, ‘અપ્પમાણો’તિ મે હોતિ, ‘સુસમારદ્ધો’તિ મે હોતિ. તિટ્ઠન્તઞ્ચ નં ‘તિટ્ઠતી’તિ પજાનામિ. સચેપિ મે ચવતિ, ‘ઇદપ્પચ્ચયા મે ચવતી’તિ પજાનામિ.

‘‘સેય્યથાપિ, આવુસો, રઞ્ઞો વા રાજમહામત્તસ્સ વા નાનારત્તાનં દુસ્સાનં દુસ્સકરણ્ડકો પૂરો અસ્સ. સો યઞ્ઞદેવ દુસ્સયુગં આકઙ્ખેય્ય પુબ્બણ્હસમયં પારુપિતું, તં તદેવ દુસ્સયુગં પુબ્બણ્હસમયં પારુપેય્ય. યઞ્ઞદેવ દુસ્સયુગં આકઙ્ખેય્ય મજ્ઝન્હિકસમયં…પે… સાયન્હસમયં પારુપિતું, તં તદેવ દુસ્સયુગં સાયન્હસમયં પારુપેય્ય. એવમેવ ખ્વાહં, આવુસો, ઇમેસં સત્તન્નં બોજ્ઝઙ્ગાનં યેન યેન બોજ્ઝઙ્ગેન આકઙ્ખામિ પુબ્બણ્હસમયં વિહરિતું, તેન તેન બોજ્ઝઙ્ગેન પુબ્બણ્હસમયં વિહરામિ. યેન યેન બોજ્ઝઙ્ગેન આકઙ્ખામિ મજ્ઝન્હિકસમયં…પે… સાયન્હસમયં વિહરિતું, તેન તેન બોજ્ઝઙ્ગેન સાયન્હસમયં વિહરામિ. સતિસમ્બોજ્ઝઙ્ગો ઇતિ ચે મે, આવુસો, હોતિ, ‘અપ્પમાણો’તિ મે હોતિ, ‘સુસમારદ્ધો’તિ મે હોતિ. તિટ્ઠન્તઞ્ચ નં ‘તિટ્ઠતી’તિ પજાનામિ. સચેપિ મે ચવતિ, ‘ઇદપ્પચ્ચયા મે ચવતી’તિ પજાનામિ…પે… ઉપેક્ખાસમ્બોજ્ઝઙ્ગો ઇતિ ચે મે, આવુસો, હોતિ, ‘અપ્પમાણો’તિ મે હોતિ, ‘સુસમારદ્ધો’તિ મે હોતિ. તિટ્ઠન્તઞ્ચ નં ‘તિટ્ઠતી’તિ પજાનામિ. સચેપિ મે ચવતિ, ‘ઇદપ્પચ્ચયા મે ચવતી’તિ પજાનામિ’’.

સુત્તન્તનિદ્દેસો

૨૧. કથં સતિસમ્બોજ્ઝઙ્ગો ઇતિ ચે મે હોતીતિ બોજ્ઝઙ્ગો? યાવતા નિરોધૂપટ્ઠાતિ તાવતા સતિસમ્બોજ્ઝઙ્ગો. ઇતિ ચે મે હોતીતિ બોજ્ઝઙ્ગો. સેય્યથાપિ તેલપ્પદીપસ્સ ઝાયતો યાવતા અચ્ચિ તાવતા વણ્ણો, યાવતા વણ્ણો તાવતા અચ્ચિ. એવમેવ યાવતા નિરોધૂપટ્ઠાતિ તાવતા સતિસમ્બોજ્ઝઙ્ગો. ઇતિ ચે મે હોતીતિ બોજ્ઝઙ્ગો.

કથં અપ્પમાણો ઇતિ ચે મે હોતીતિ બોજ્ઝઙ્ગો? પમાણબદ્ધા [પમાણવન્તા (સ્યા.), અટ્ઠકથા ઓલોકેતબ્બા] કિલેસા, સબ્બે ચ પરિયુટ્ઠાના, યે ચ સઙ્ખારા પોનોભવિકા અપ્પમાણો નિરોધો અચલટ્ઠેન અસઙ્ખતટ્ઠેન. યાવતા નિરોધૂપટ્ઠાતિ તાવતા અપ્પમાણો. ઇતિ ચે મે હોતીતિ બોજ્ઝઙ્ગો.

કથં સુસમારદ્ધો ઇતિ ચે મે હોતીતિ – બોજ્ઝઙ્ગો? વિસમા કિલેસા, સબ્બે ચ પરિયુટ્ઠાના, યે ચ સઙ્ખારા પોનોભવિકા, સમધમ્મો નિરોધો સન્તટ્ઠેન પણીતટ્ઠેન. યાવતા નિરોધૂપટ્ઠાતિ તાવતા સુસમારદ્ધો ઇતિ ચે મે હોતીતિ બોજ્ઝઙ્ગો.

કથં ‘‘તિટ્ઠન્તઞ્ચ નં તિટ્ઠતી’’તિ પજાનામિ; સચેપિ ચવતિ ‘‘ઇદપ્પચ્ચયા ચવતી’’તિ પજાનામિ? કતિહાકારેહિ સતિસમ્બોજ્ઝઙ્ગો તિટ્ઠતિ? કતિહાકારેહિ સતિસમ્બોજ્ઝઙ્ગો ચવતિ? અટ્ઠહાકારેહિ સતિસમ્બોજ્ઝઙ્ગો તિટ્ઠતિ. અટ્ઠહાકારેહિ સતિસમ્બોજ્ઝઙ્ગો ચવતિ.

કતમેહિ અટ્ઠહાકારેહિ સતિસમ્બોજ્ઝઙ્ગો તિટ્ઠતિ? અનુપ્પાદં આવજ્જિતત્તા સતિસમ્બોજ્ઝઙ્ગો તિટ્ઠતિ, ઉપ્પાદં અનાવજ્જિતત્તા સતિસમ્બોજ્ઝઙ્ગો તિટ્ઠતિ, અપ્પવત્તં આવજ્જિતત્તા સતિસમ્બોજ્ઝઙ્ગો તિટ્ઠતિ, પવત્તં અનાવજ્જિતત્તા સતિસમ્બોજ્ઝઙ્ગો તિટ્ઠતિ, અનિમિત્તં આવજ્જિતત્તા સતિસમ્બોજ્ઝઙ્ગો તિટ્ઠતિ, નિમિત્તં અનાવજ્જિતત્તા સતિસમ્બોજ્ઝઙ્ગો તિટ્ઠતિ, નિરોધં આવજ્જિતત્તા સતિસમ્બોજ્ઝઙ્ગો તિટ્ઠતિ, સઙ્ખારે અનાવજ્જિતત્તા સતિસમ્બોજ્ઝઙ્ગો તિટ્ઠતિ – ઇમેહિ અટ્ઠહાકારેહિ સતિસમ્બોજ્ઝઙ્ગો તિટ્ઠતિ.

કતમેહિ અટ્ઠહાકારેહિ સતિસમ્બોજ્ઝઙ્ગો ચવતિ? ઉપ્પાદં આવજ્જિતત્તા સતિસમ્બોજ્ઝઙ્ગો ચવતિ, અનુપ્પાદં અનાવજ્જિતત્તા સતિસમ્બોજ્ઝઙ્ગો ચવતિ, પવત્તં આવજ્જિતત્તા સતિસમ્બોજ્ઝઙ્ગો ચવતિ, અપ્પવત્તં અનાવજ્જિતત્તા સતિસમ્બોજ્ઝઙ્ગો ચવતિ, નિમિત્તં આવજ્જિતત્તા સતિસમ્બોજ્ઝઙ્ગો ચવતિ, અનિમિત્તં અનાવજ્જિતત્તા સતિસમ્બોજ્ઝઙ્ગો ચવતિ, સઙ્ખારે આવજ્જિતત્તા સતિસમ્બોજ્ઝઙ્ગો ચવતિ, નિરોધં અનાવજ્જિતત્તા સતિસમ્બોજ્ઝઙ્ગો ચવતિ – ઇમેહિ અટ્ઠહાકારેહિ સતિસમ્બોજ્ઝઙ્ગો ચવતિ. એવં ‘‘તિટ્ઠન્તઞ્ચ નં તિટ્ઠતી’’તિ પજાનામિ. સચેપિ ચવતિ, ‘‘ઇદપ્પચ્ચયા મે ચવતી’’તિ પજાનામિ…પે….

કથં ઉપેક્ખાસમ્બોજ્ઝઙ્ગો ઇતિ ચે મે હોતીતિ બોજ્ઝઙ્ગો? યાવતા નિરોધૂપટ્ઠાતિ તાવતા ઉપેક્ખાસમ્બોજ્ઝઙ્ગો ઇતિ ચે મે હોતીતિ બોજ્ઝઙ્ગો. સેય્યથાપિ તેલપ્પદીપસ્સ ઝાયતો યાવતા અચ્ચિ તાવતા વણ્ણો, યાવતા વણ્ણો તાવતા અચ્ચિ. એવમેવ યાવતા નિરોધૂપટ્ઠાતિ તાવતા ઉપેક્ખાસમ્બોજ્ઝઙ્ગો ઇતિ ચે હોતીતિ બોજ્ઝઙ્ગો.

કથં અપ્પમાણો ઇતિ ચે હોતીતિ બોજ્ઝઙ્ગો? પમાણબદ્ધા કિલેસા, સબ્બે ચ પરિયુટ્ઠાના, યે ચ સઙ્ખારા પોનોભવિકા અપ્પમાણો નિરોધો અચલટ્ઠેન અસઙ્ખતટ્ઠેન. યાવતા નિરોધૂપટ્ઠાતિ તાવતા અપ્પમાણો ઇતિ ચે હોતીતિ બોજ્ઝઙ્ગો.

કથં સુસમારદ્ધો ઇતિ ચે હોતીતિ બોજ્ઝઙ્ગો? વિસમા કિલેસા, સબ્બે ચ પરિયુટ્ઠાના, યે ચ સઙ્ખારા પોનોભવિકા સમધમ્મો નિરોધો સન્તટ્ઠેન પણીતટ્ઠેન. યાવતા નિરોધૂપટ્ઠાતિ તાવતા સુસમારદ્ધો ઇતિ ચે હોતીતિ બોજ્ઝઙ્ગો.

કથં ‘‘તિટ્ઠન્તઞ્ચ નં તિટ્ઠતી’’તિ પજાનામિ; સચેપિ ચવતિ ‘‘ઇદપ્પચ્ચયા મે ચવતી’’તિ પજાનામિ? કતિહાકારેહિ ઉપેક્ખાસમ્બોજ્ઝઙ્ગો તિટ્ઠતિ? કતિહાકારેહિ ઉપેક્ખાસમ્બોજ્ઝઙ્ગો ચવતિ? અટ્ઠહાકારેહિ ઉપેક્ખાસમ્બોજ્ઝઙ્ગો તિટ્ઠતિ. અટ્ઠહાકારેહિ ઉપેક્ખાસમ્બોજ્ઝઙ્ગો ચવતિ.

કતમેહિ અટ્ઠહાકારેહિ ઉપેક્ખાસમ્બોજ્ઝઙ્ગો તિટ્ઠતિ? અનુપ્પાદં આવજ્જિતત્તા ઉપેક્ખાસમ્બોજ્ઝઙ્ગો તિટ્ઠતિ, ઉપ્પાદં અનાવજ્જિતત્તા ઉપેક્ખાસમ્બોજ્ઝઙ્ગો તિટ્ઠતિ, અપ્પવત્તં આવજ્જિતત્તા ઉપેક્ખાસમ્બોજ્ઝઙ્ગો તિટ્ઠતિ, પવત્તં અનાવજ્જિતત્તા ઉપેક્ખાસમ્બોજ્ઝઙ્ગો તિટ્ઠતિ, અનિમિત્તં આવજ્જિતત્તા ઉપેક્ખાસમ્બોજ્ઝઙ્ગો તિટ્ઠતિ, નિમિત્તં અનાવજ્જિતત્તા ઉપેક્ખાસમ્બોજ્ઝઙ્ગો તિટ્ઠતિ, નિરોધં આવજ્જિતત્તા ઉપેક્ખાસમ્બોજ્ઝઙ્ગો તિટ્ઠતિ, સઙ્ખારે અનાવજ્જિતત્તા ઉપેક્ખાસમ્બોજ્ઝઙ્ગો તિટ્ઠતિ – ઇમેહિ અટ્ઠહાકારેહિ ઉપેક્ખાસમ્બોજ્ઝઙ્ગો તિટ્ઠતિ.

કતમેહિ અટ્ઠહાકારેહિ ઉપેક્ખાસમ્બોજ્ઝઙ્ગો ચવતિ? ઉપ્પાદં આવજ્જિતત્તા ઉપેક્ખાસમ્બોજ્ઝઙ્ગો ચવતિ, અનુપ્પાદં અનાવજ્જિતત્તા ઉપેક્ખાસમ્બોજ્ઝઙ્ગો ચવતિ, પવત્તં આવજ્જિતત્તા ઉપેક્ખાસમ્બોજ્ઝઙ્ગો ચવતિ, અપ્પવત્તં અનાવજ્જિતત્તા ઉપેક્ખાસમ્બોજ્ઝઙ્ગો ચવતિ, નિમિત્તં આવજ્જિતત્તા ઉપેક્ખાસમ્બોજ્ઝઙ્ગો ચવતિ, અનિમિત્તં અનાવજ્જિતત્તા ઉપેક્ખાસમ્બોજ્ઝઙ્ગો ચવતિ, સઙ્ખારે આવજ્જિતત્તા ઉપેક્ખાસમ્બોજ્ઝઙ્ગો ચવતિ, નિરોધં અનાવજ્જિતત્તા ઉપેક્ખાસમ્બોજ્ઝઙ્ગો ચવતિ – ઇમેહિ અટ્ઠહાકારેહિ ઉપેક્ખાસમ્બોજ્ઝઙ્ગો ચવતિ. એવં ‘‘તિટ્ઠન્તઞ્ચ નં તિટ્ઠતી’’તિ પજાનામિ; સચેપિ ચવતિ, ‘‘ઇદપ્પચ્ચયા મે ચવતી’’તિ પજાનામિ.

બોજ્ઝઙ્ગકથા નિટ્ઠિતા.