૯. મગ્ગકથા

૨૩૭. મગ્ગોતિ કેનટ્ઠેન મગ્ગો? સોતાપત્તિમગ્ગક્ખણે દસ્સનટ્ઠેન સમ્માદિટ્ઠિ મિચ્છાદિટ્ઠિયા પહાનાય મગ્ગો ચેવ હેતુ ચ, સહજાતાનં ધમ્માનં ઉપત્થમ્ભનાય મગ્ગો ચેવ હેતુ ચ, કિલેસાનં પરિયાદાનાય મગ્ગો ચેવ હેતુ ચ, પટિવેધાદિવિસોધનાય મગ્ગો ચેવ હેતુ ચ, ચિત્તસ્સ અધિટ્ઠાનાય મગ્ગો ચેવ હેતુ ચ, ચિત્તસ્સ વોદાનાય મગ્ગો ચેવ હેતુ ચ, વિસેસાધિગમાય મગ્ગો ચેવ હેતુ ચ, ઉત્તરિ પટિવેધાય [ઉત્તરિં પટિવેધાય (સ્યા.)] મગ્ગો ચેવ હેતુ ચ, સચ્ચાભિસમયાય મગ્ગો ચેવ હેતુ ચ, નિરોધે પતિટ્ઠાપનાય મગ્ગો ચેવ હેતુ ચ.

અભિનિરોપનટ્ઠેન સમ્માસઙ્કપ્પો મિચ્છાસઙ્કપ્પસ્સ પહાનાય મગ્ગો ચેવ હેતુ ચ, સહજાતાનં ધમ્માનં ઉપત્થમ્ભનાય મગ્ગો ચેવ હેતુ ચ, કિલેસાનં પરિયાદાનાય મગ્ગો ચેવ હેતુ ચ, પટિવેધાદિવિસોધનાય મગ્ગો ચેવ હેતુ ચ, ચિત્તસ્સ અધિટ્ઠાનાય મગ્ગો ચેવ હેતુ ચ, ચિત્તસ્સ વોદાનાય મગ્ગો ચેવ હેતુ ચ, વિસેસાધિગમાય મગ્ગો ચેવ હેતુ ચ, ઉત્તરિ પટિવેધાય મગ્ગો ચેવ હેતુ ચ, સચ્ચાભિસમયાય મગ્ગો ચેવ હેતુ ચ, નિરોધે પતિટ્ઠાપનાય મગ્ગો ચેવ હેતુ ચ.

પરિગ્ગહટ્ઠેન સમ્માવાચા મિચ્છાવાચાય પહાનાય મગ્ગો ચેવ હેતુ ચ, સહજાતાનં ધમ્માનં ઉપત્થમ્ભનાય મગ્ગો ચેવ હેતુ ચ, કિલેસાનં પરિયાદાનાય મગ્ગો ચેવ હેતુ ચ, પટિવેધાદિવિસોધનાય મગ્ગો ચેવ હેતુ ચ, ચિત્તસ્સ અધિટ્ઠાનાય મગ્ગો ચેવ હેતુ ચ, ચિત્તસ્સ વોદાનાય મગ્ગો ચેવ હેતુ ચ, વિસેસાધિગમાય મગ્ગો ચેવ હેતુ ચ, ઉત્તરિ પટિવેધાય મગ્ગો ચેવ હેતુ ચ, સચ્ચાભિસમયાય મગ્ગો ચેવ હેતુ ચ, નિરોધે પતિટ્ઠાપનાય મગ્ગો ચેવ હેતુ ચ.

સમુટ્ઠાનટ્ઠેન સમ્માકમ્મન્તો મિચ્છાકમ્મન્તસ્સ પહાનાય મગ્ગો ચેવ હેતુ ચ, સહજાતાનં ધમ્માનં ઉપત્થમ્ભનાય મગ્ગો ચેવ હેતુ ચ, કિલેસાનં પરિયાદાનાય મગ્ગો ચેવ હેતુ ચ પટિવેધાદિવિસોધનાય મગ્ગો ચેવ હેતુ ચ, ચિત્તસ્સ અધિટ્ઠાનાય મગ્ગો ચેવ હેતુ ચ, ચિત્તસ્સ વોદાનાય મગ્ગો ચેવ હેતુ ચ, વિસેસાધિગમાય મગ્ગો ચેવ હેતુ ચ, ઉત્તરિ પટિવેધાય મગ્ગો ચેવ હેતુ ચ, સચ્ચાભિસમયાય મગ્ગો ચેવ હેતુ ચ, નિરોધે પતિટ્ઠાપનાય મગ્ગો ચેવ હેતુ ચ.

વોદાનટ્ઠેન સમ્માઆજીવો મિચ્છાઆજીવસ્સ પહાનાય મગ્ગો ચેવ હેતુ ચ…પે… પગ્ગહટ્ઠેન સમ્માવાયામો મિચ્છાવાયામસ્સ પહાનાય મગ્ગો ચેવ હેતુ ચ…પે… ઉપટ્ઠાનટ્ઠેન સમ્માસતિ મિચ્છાસતિયા પહાનાય મગ્ગો ચેવ હેતુ ચ…પે… અવિક્ખેપટ્ઠેન સમ્માસમાધિ મિચ્છાસમાધિસ્સ પહાનાય મગ્ગો ચેવ હેતુ ચ, સહજાતાનં ધમ્માનં ઉપત્થમ્ભનાય મગ્ગો ચેવ હેતુ ચ, કિલેસાનં પરિયાદાનાય મગ્ગો ચેવ હેતુ ચ, પટિવેધાદિવિસોધનાય મગ્ગો ચેવ હેતુ ચ, ચિત્તસ્સ અધિટ્ઠાનાય મગ્ગો ચેવ હેતુ ચ, ચિત્તસ્સ વોદાનાય મગ્ગો ચેવ હેતુ ચ, વિસેસાધિગમાય મગ્ગો ચેવ હેતુ ચ, ઉત્તરિ પટિવેધાય મગ્ગો ચેવ હેતુ ચ, સચ્ચાભિસમયાય મગ્ગો ચેવ હેતુ ચ, નિરોધે પતિટ્ઠાપનાય મગ્ગો ચેવ હેતુ ચ.

સકદાગામિમગ્ગક્ખણે દસ્સનટ્ઠેન સમ્માદિટ્ઠિ…પે… અવિક્ખેપટ્ઠેન સમ્માસમાધિ ઓળારિકસ્સ કામરાગસઞ્ઞોજનસ્સ પટિઘસઞ્ઞોજનસ્સ ઓળારિકસ્સ કામરાગાનુસયસ્સ પટિઘાનુસયસ્સ પહાનાય મગ્ગો ચેવ હેતુ ચ, સહજાતાનં ધમ્માનં ઉપત્થમ્ભનાય મગ્ગો ચેવ હેતુ ચ, કિલેસાનં પરિયાદાનાય મગ્ગો ચેવ હેતુ ચ, પટિવેધાદિવિસોધનાય મગ્ગો ચેવ હેતુ ચ, ચિત્તસ્સ અધિટ્ઠાનાય મગ્ગો ચેવ હેતુ ચ, ચિત્તસ્સ વોદાનાય મગ્ગો ચેવ હેતુ ચ, વિસેસાધિગમાય મગ્ગો ચેવ હેતુ ચ, ઉત્તરિ પટિવેધાય મગ્ગો ચેવ હેતુ ચ, સચ્ચાભિસમયાય મગ્ગો ચેવ હેતુ ચ, નિરોધે પતિટ્ઠાપનાય મગ્ગો ચેવ હેતુ ચ.

અનાગામિમગ્ગક્ખણે દસ્સનટ્ઠેન સમ્માદિટ્ઠિ…પે… અવિક્ખેપટ્ઠેન સમ્માસમાધિ અનુસહગતસ્સ કામરાગસઞ્ઞોજનસ્સ પટિઘસઞ્ઞોજનસ્સ, અનુસહગતસ્સ કામરાગાનુસયસ્સ પટિઘાનુસયસ્સ પહાનાય મગ્ગો ચેવ હેતુ ચ, સહજાતાનં ધમ્માનં ઉપત્થમ્ભનાય મગ્ગો ચેવ હેતુ ચ, કિલેસાનં પરિયાદાનાય મગ્ગો ચેવ હેતુ ચ, પટિવેધાદિવિસોધનાય મગ્ગો ચેવ હેતુ ચ, ચિત્તસ્સ અધિટ્ઠાનાય મગ્ગો ચેવ હેતુ ચ, ચિત્તસ્સ વોદાનાય મગ્ગો ચેવ હેતુ ચ, વિસેસાધિગમાય મગ્ગો ચેવ હેતુ ચ, ઉત્તરિ પટિવેધાય મગ્ગો ચેવ હેતુ ચ, સચ્ચાભિસમયાય મગ્ગો ચેવ હેતુ ચ, નિરોધે પતિટ્ઠાપનાય મગ્ગો ચેવ હેતુ ચ.

અરહત્તમગ્ગક્ખણે દસ્સનટ્ઠેન સમ્માદિટ્ઠિ…પે… અવિક્ખેપટ્ઠેન સમ્માસમાધિ રૂપરાગસ્સ અરૂપરાગસ્સ માનસ્સ ઉદ્ધચ્ચસ્સ અવિજ્જાય, માનાનુસયસ્સ ભવરાગાનુસયસ્સ અવિજ્જાનુસયસ્સ પહાનાય મગ્ગો ચેવ હેતુ ચ, સહજાતાનં ધમ્માનં ઉપત્થમ્ભનાય મગ્ગો ચેવ હેતુ ચ, કિલેસાનં પરિયાદાનાય મગ્ગો ચેવ હેતુ ચ, પટિવેધાદિવિસોધનાય મગ્ગો ચેવ હેતુ ચ, ચિત્તસ્સ અધિટ્ઠાનાય મગ્ગો ચેવ હેતુ ચ, ચિત્તસ્સ, વોદાનાય મગ્ગો ચેવ હેતુ ચ, વિસેસાધિગમાય મગ્ગો ચેવ હેતુ ચ, ઉત્તરિ પટિવેધાય મગ્ગો ચેવ હેતુ ચ, સચ્ચાભિસમયાય મગ્ગો ચેવ, હેતુ ચ, નિરોધે પતિટ્ઠાપનાય મગ્ગો ચેવ હેતુ ચ.

દસ્સનમગ્ગો સમ્માદિટ્ઠિ, અભિનિરોપનમગ્ગો સમ્માસઙ્કપ્પો, પરિગ્ગહમગ્ગો સમ્માવાચા, સમુટ્ઠાનમગ્ગો સમ્માકમ્મન્તો, વોદાનમગ્ગો સમ્માઆજીવો, પગ્ગહમગ્ગો સમ્માવાયામો, ઉપટ્ઠાનમગ્ગો સમ્માસતિ, અવિક્ખેપમગ્ગો સમ્માસમાધિ. ઉપટ્ઠાનમગ્ગો સતિસમ્બોજ્ઝઙ્ગો, પવિચયમગ્ગો ધમ્મવિચયસમ્બોજ્ઝઙ્ગો, પગ્ગહમગ્ગો વીરિયસમ્બોજ્ઝઙ્ગો, ફરણમગ્ગો પીતિસમ્બોજ્ઝઙ્ગો, ઉપસમમગ્ગો પસ્સદ્ધિસમ્બોજ્ઝઙ્ગો, અવિક્ખેપમગ્ગો સમાધિસમ્બોજ્ઝઙ્ગો, પટિસઙ્ખાનમગ્ગો ઉપેક્ખાસમ્બોજ્ઝઙ્ગો.

અસ્સદ્ધિયે અકમ્પિયમગ્ગો સદ્ધાબલં, કોસજ્જે અકમ્પિયમગ્ગો વીરિયબલં, પમાદે અકમ્પિયમગ્ગો સતિબલં, ઉદ્ધચ્ચે અકમ્પિયમગ્ગો સમાધિબલં, અવિજ્જાય અકમ્પિયમગ્ગો પઞ્ઞાબલં. અધિમોક્ખમગ્ગો સદ્ધિન્દ્રિયં, પગ્ગહમગ્ગો વીરિયિન્દ્રિયં, ઉપટ્ઠાનમગ્ગો સતિન્દ્રિયં, અવિક્ખેપમગ્ગો સમાધિન્દ્રિયં, દસ્સનમગ્ગો પઞ્ઞિન્દ્રિયં.

આધિપતેય્યટ્ઠેન ઇન્દ્રિયા મગ્ગો, અકમ્પિયટ્ઠેન બલા મગ્ગો, નિય્યાનટ્ઠેન બોજ્ઝઙ્ગા મગ્ગો, હેતુટ્ઠેન મગ્ગઙ્ગા મગ્ગો, ઉપટ્ઠાનટ્ઠેન સતિપટ્ઠાના મગ્ગો, પદહનટ્ઠેન સમ્મપ્પધાના મગ્ગો, ઇજ્ઝનટ્ઠેન ઇદ્ધિપાદા મગ્ગો, તથટ્ઠેન સચ્ચાનિ મગ્ગો, અવિક્ખેપટ્ઠેન સમથો મગ્ગો, અનુપસ્સનટ્ઠેન વિપસ્સના મગ્ગો, એકરસટ્ઠેન સમથવિપસ્સના મગ્ગો, અનતિવત્તનટ્ઠેન યુગનદ્ધા મગ્ગો, સંવરટ્ઠેન સીલવિસુદ્ધિ મગ્ગો, અવિક્ખેપટ્ઠેન ચિત્તવિસુદ્ધિ મગ્ગો, દસ્સનટ્ઠેન દિટ્ઠિવિસુદ્ધિ મગ્ગો, મુત્તટ્ઠેન વિમોક્ખો મગ્ગો, પટિવેધટ્ઠેન વિજ્જા મગ્ગો, પરિચ્ચાગટ્ઠેન વિમુત્તિ મગ્ગો, સમુચ્છેદટ્ઠેન ખયે ઞાણં મગ્ગો, છન્દો મૂલટ્ઠેન મગ્ગો, મનસિકારો સમુટ્ઠાનટ્ઠેન મગ્ગો, ફસ્સો સમોધાનટ્ઠેન મગ્ગો, વેદના સમોસરણટ્ઠેન મગ્ગો, સમાધિ પમુખટ્ઠેન મગ્ગો, સતિ આધિપતેય્યટ્ઠેન મગ્ગો, પઞ્ઞા તતુત્તરટ્ઠેન મગ્ગો, વિમુત્તિ સારટ્ઠેન મગ્ગો, અમતોગધં નિબ્બાનં પરિયોસાનટ્ઠેન મગ્ગોતિ.

મગ્ગકથા નિટ્ઠિતા.