૫. ઇન્દ્રિયસમોધાનં

૨૦૪. પુથુજ્જનો સમાધિં ભાવેન્તો કતિહાકારેહિ ઉપટ્ઠાનકુસલો હોતિ? સેક્ખો સમાધિં ભાવેન્તો કતિહાકારેહિ ઉપટ્ઠાનકુસલો હોતિ? વીતરાગો સમાધિં ભાવેન્તો કતિહાકારેહિ ઉપટ્ઠાનકુસલો હોતિ? પુથુજ્જનો સમાધિં ભાવેન્તો સત્તહિ આકારેહિ ઉપટ્ઠાનકુસલો હોતિ. સેક્ખો સમાધિં ભાવેન્તો અટ્ઠહિ આકારેહિ ઉપટ્ઠાનકુસલો હોતિ. વીતરાગો સમાધિં ભાવેન્તો દસહિ આકારેહિ ઉપટ્ઠાનકુસલો હોતિ.

પુથુજ્જનો સમાધિં ભાવેન્તો કતમેહિ સત્તહાકારેહિ ઉપટ્ઠાનકુસલો હોતિ? આવજ્જિતત્તા આરમ્મણૂપટ્ઠાનકુસલો હોતિ, સમથનિમિત્તૂપટ્ઠાનકુસલો હોતિ, પગ્ગહનિમિત્તૂપટ્ઠાનકુસલો હોતિ, અવિક્ખેપૂપટ્ઠાનકુસલો હોતિ, ઓભાસૂપટ્ઠાનકુસલો હોતિ, સમ્પહંસનૂપટ્ઠાનકુસલો હોતિ, ઉપેક્ખૂપટ્ઠાનકુસલો હોતિ – પુથુજ્જનો સમાધિં ભાવેન્તો ઇમેહિ સત્તહિ આકારેહિ ઉપટ્ઠાનકુસલો હોતિ.

સેક્ખો સમાધિં ભાવેન્તો કતમેહિ અટ્ઠહિ આકારેહિ ઉપટ્ઠાનકુસલો હોતિ? આવજ્જિતત્તા આરમ્મણૂપટ્ઠાનકુસલો હોતિ, સમથનિમિત્તૂપટ્ઠાનકુસલો હોતિ, પગ્ગહનિમિત્તૂપટ્ઠાનકુસલો હોતિ, અવિક્ખેપૂપટ્ઠાનકુસલો હોતિ, ઓભાસૂપટ્ઠાનકુસલો હોતિ, સમ્પહંસનૂપટ્ઠાનકુસલો હોતિ, ઉપેક્ખૂપટ્ઠાનકુસલો હોતિ, એકત્તૂપટ્ઠાનકુસલો હોતિ – સેક્ખો સમાધિં ભાવેન્તો ઇમેહિ અટ્ઠહિ આકારેહિ ઉપટ્ઠાનકુસલો હોતિ.

વીતરાગો સમાધિં ભાવેન્તો કતમેહિ દસહિ આકારેહિ ઉપટ્ઠાનકુસલો હોતિ? આવજ્જિતત્તા આરમ્મણૂપટ્ઠાનકુસલો હોતિ…પે… એકત્તૂપટ્ઠાનકુસલો હોતિ, ઞાણૂપટ્ઠાનકુસલો હોતિ, વિમુત્તૂપટ્ઠાનકુસલો હોતિ – વીતરાગો સમાધિં ભાવેન્તો ઇમેહિ દસહિ આકારેહિ ઉપટ્ઠાનકુસલો હોતિ.

૨૦૫. પુથુજ્જનો વિપસ્સનં ભાવેન્તો કતિહાકારેહિ ઉપટ્ઠાનકુસલો હોતિ, કતિહાકારેહિ અનુપટ્ઠાનકુસલો હોતિ? સેક્ખો વિપસ્સનં ભાવેન્તો કતિહાકારેહિ ઉપટ્ઠાનકુસલો હોતિ, કતિહાકારેહિ અનુપટ્ઠાનકુસલો હોતિ? વીતરાગો વિપસ્સનં ભાવેન્તો કતિહાકારેહિ ઉપટ્ઠાનકુસલો હોતિ, કતિહાકારેહિ અનુપટ્ઠાનકુસલો હોતિ?

પુથુજ્જનો વિપસ્સનં ભાવેન્તો નવહિ આકારેહિ ઉપટ્ઠાનકુસલો હોતિ, નવહિ આકારેહિ અનુપટ્ઠાનકુસલો હોતિ. સેક્ખો વિપસ્સનં ભાવેન્તો દસહિ આકારેહિ ઉપટ્ઠાનકુસલો હોતિ, દસહિ આકારેહિ અનુપટ્ઠાનકુસલો હોતિ. વીતરાગો વિપસ્સનં ભાવેન્તો દ્વાદસહિ આકારેહિ ઉપટ્ઠાનકુસલો હોતિ, દ્વાદસહિ આકારેહિ અનુપટ્ઠાનકુસલો હોતિ.

પુથુજ્જનો વિપસ્સનં ભાવેન્તો કતમેહિ નવહિ આકારેહિ ઉપટ્ઠાનકુસલો હોતિ, કતમેહિ નવહિ આકારેહિ અનુપટ્ઠાનકુસલો હોતિ? અનિચ્ચતો ઉપટ્ઠાનકુસલો હોતિ, નિચ્ચતો અનુપટ્ઠાનકુસલો હોતિ. દુક્ખતો ઉપટ્ઠાનકુસલો હોતિ, સુખતો અનુપટ્ઠાનકુસલો હોતિ. અનત્તતો ઉપટ્ઠાનકુસલો હોતિ, અત્તતો અનુપટ્ઠાનકુસલો હોતિ. ખયતો ઉપટ્ઠાનકુસલો હોતિ, ઘનતો અનુપટ્ઠાનકુસલો હોતિ. વયતો ઉપટ્ઠાનકુસલો હોતિ, આયૂહનાનુપટ્ઠાનકુસલો હોતિ. વિપરિણામૂપટ્ઠાનકુસલો હોતિ, ધુવતો અનુપટ્ઠાનકુસલો હોતિ. અનિમિત્તૂપટ્ઠાનકુસલો હોતિ, નિમિત્તાનુપટ્ઠાનકુસલો હોતિ. અપ્પણિહિતૂપટ્ઠાનકુસલો હોતિ, પણિધિઅનુપટ્ઠાનકુસલો [પણિધાનુપટ્ઠાનકુસલો (સ્યા.)] હોતિ. સુઞ્ઞતૂપટ્ઠાનકુસલો હોતિ, અભિનિવેસાનુપટ્ઠાનકુસલો હોતિ – પુથુજ્જનો વિપસ્સનં ભાવેન્તો ઇમેહિ નવહિ આકારેહિ ઉપટ્ઠાનકુસલો હોતિ, ઇમેહિ નવહિ આકારેહિ અનુપટ્ઠાનકુસલો હોતિ.

૨૦૬. સેક્ખો વિપસ્સનં ભાવેન્તો કતમેહિ દસહિ આકારેહિ ઉપટ્ઠાનકુસલો હોતિ, કતમેહિ દસહિ આકારેહિ અનુપટ્ઠાનકુસલો હોતિ? અનિચ્ચતો ઉપટ્ઠાનકુસલો હોતિ, નિચ્ચતો અનુપટ્ઠાનકુસલો હોતિ…પે… સુઞ્ઞતૂપટ્ઠાનકુસલો હોતિ, અભિનિવેસાનૂપટ્ઠાનકુસલો હોતિ. ઞાણૂપટ્ઠાનકુસલો હોતિ, અઞાણઅનુપટ્ઠાનકુસલો હોતિ – સેક્ખો વિપસ્સનં ભાવેન્તો ઇમેહિ દસહિ આકારેહિ ઉપટ્ઠાનકુસલો હોતિ, ઇમેહિ દસહિ આકારેહિ અનુપટ્ઠાનકુસલો હોતિ.

વીતરાગો વિપસ્સનં ભાવેન્તો કતમેહિ દ્વાદસહિ આકારેહિ ઉપટ્ઠાનકુસલો હોતિ, કતમેહિ દ્વાદસહિ આકારેહિ અનુપટ્ઠાનકુસલો હોતિ? અનિચ્ચતો ઉપટ્ઠાનકુસલો હોતિ, નિચ્ચતો અનુપટ્ઠાનકુસલો હોતિ…પે… ઞાણૂપટ્ઠાનકુસલો હોતિ, અઞાણાનુપટ્ઠાનકુસલો હોતિ. વિસઞ્ઞોગૂપટ્ઠાનકુસલો હોતિ, સઞ્ઞોગાનુપટ્ઠાનકુસલો હોતિ. નિરોધૂપટ્ઠાનકુસલો હોતિ, સઙ્ખારાનુપટ્ઠાનકુસલો હોતિ – વીતરાગો વિપસ્સનં ભાવેન્તો ઇમેહિ દ્વાદસહિ આકારેહિ ઉપટ્ઠાનકુસલો હોતિ, ઇમેહિ દ્વાદસહિ આકારેહિ અનુપટ્ઠાનકુસલો હોતિ.

આવજ્જિતત્તા આરમ્મણૂપટ્ઠાનકુસલવસેન ઇન્દ્રિયાનિ સમોધાનેતિ, ગોચરઞ્ચ પજાનાતિ, સમત્થઞ્ચ પટિવિજ્ઝતિ…પે… ધમ્મે સમોધાનેતિ, ગોચરઞ્ચ પજાનાતિ, સમત્થઞ્ચ પટિવિજ્ઝતિ. ઇન્દ્રિયાનિ સમોધાનેતીતિ કથં ઇન્દ્રિયાનિ સમોધાનેતિ? અધિમોક્ખટ્ઠેન સદ્ધિન્દ્રિયં સમોધાનેતિ…પે… સમથનિમિત્તૂપટ્ઠાનકુસલવસેન, પગ્ગહનિમિત્તૂપટ્ઠાનકુસલવસેન, અવિક્ખેપૂપટ્ઠાનકુસલવસેન, ઓભાસૂપટ્ઠાનકુસલવસેન, સમ્પહંસનૂપટ્ઠાનકુસલવસેન, ઉપેક્ખૂપટ્ઠાનકુસલવસેન, એકત્તૂપટ્ઠાનકુસલવસેન, ઞાણૂપટ્ઠાનકુસલવસેન, વિમુત્તૂપટ્ઠાનકુસલવસેન.

અનિચ્ચતો ઉપટ્ઠાનકુસલવસેન, નિચ્ચતો અનુપટ્ઠાનકુસલવસેન, દુક્ખતો ઉપટ્ઠાનકુસલવસેન, સુખતો અનુપટ્ઠાનકુસલવસેન, અનત્તતો ઉપટ્ઠાનકુસલવસેન, અત્તતો અનુપટ્ઠાનકુસલવસેન, ખયતો ઉપટ્ઠાનકુસલવસેન, ઘનતો અનુપટ્ઠાનકુસલવસેન, વયતો ઉપટ્ઠાનકુસલવસેન, આયૂહનાનુપટ્ઠાનકુસલવસેન, વિપરિણામૂપટ્ઠાનકુસલવસેન, ધુવતો અનુપટ્ઠાનકુસલવસેન, અનિમિત્તૂપટ્ઠાનકુસલવસેન, નિમિત્તાનુપટ્ઠાનકુસલવસેન, અપ્પણિહિતૂપટ્ઠાનકુસલવસેન, પણિધિઅનુપટ્ઠાનકુસલવસેન, સુઞ્ઞતૂપટ્ઠાનકુસલવસેન, અભિનિવેસાનુપટ્ઠાનકુસલવસેન, ઞાણૂપટ્ઠાનકુસલવસેન, અઞાણાનુપટ્ઠાનકુસલવસેન, વિસઞ્ઞોગૂપટ્ઠાનકુસલવસેન, સઞ્ઞોગાનુપટ્ઠાનકુસલવસેન, નિરોધૂપટ્ઠાનકુસલવસેન, સઙ્ખારાનુપટ્ઠાનકુસલવસેન ઇન્દ્રિયાનિ સમોધાનેતિ, ગોચરઞ્ચ પજાનાતિ, સમત્થઞ્ચ પટિવિજ્ઝતિ.

૨૦૭. ચતુસટ્ઠિયા આકારેહિ તિણ્ણન્નં ઇન્દ્રિયાનં વસીભાવતાપઞ્ઞા આસવાનં ખયે ઞાણં. કતમેસં તિણ્ણન્નં ઇન્દ્રિયાનં? અનઞ્ઞાતઞ્ઞસ્સામીતિન્દ્રિયસ્સ, અઞ્ઞિન્દ્રિયસ્સ, અઞ્ઞાતાવિન્દ્રિયસ્સ.

અનઞ્ઞાતઞ્ઞસ્સામીતિન્દ્રિયં કતિ ઠાનાનિ ગચ્છતિ? અઞ્ઞિન્દ્રિયં કતિ ઠાનાનિ ગચ્છતિ? અઞ્ઞાતાવિન્દ્રિયં કતિ ઠાનાનિ ગચ્છતિ? અનઞ્ઞાતઞ્ઞસ્સામીતિન્દ્રિયં એકં ઠાનં ગચ્છતિ – સોતાપત્તિમગ્ગં. અઞ્ઞિન્દ્રિયં છ ઠાનાનિ ગચ્છતિ – સોતાપત્તિફલં, સકદાગામિમગ્ગં, સકદાગામિફલં, અનાગામિમગ્ગં, અનાગામિફલં, અરહત્તમગ્ગં. અઞ્ઞાતાવિન્દ્રિયં એકં ઠાનં ગચ્છતિ – અરહત્તફલં.

સોતાપત્તિમગ્ગક્ખણે અનઞ્ઞાતઞ્ઞસ્સામીતિન્દ્રિયસ્સ સદ્ધિન્દ્રિયં અધિમોક્ખપરિવારં હોતિ, વીરિયિન્દ્રિયં પગ્ગહપરિવારં હોતિ, સતિન્દ્રિયં ઉપટ્ઠાનપરિવારં હોતિ, સમાધિન્દ્રિયં અવિક્ખેપપરિવારં હોતિ, પઞ્ઞિન્દ્રિયં દસ્સનપરિવારં હોતિ, મનિન્દ્રિયં વિજાનનપરિવારં હોતિ, સોમનસ્સિન્દ્રિયં અભિસન્દનપરિવારં હોતિ, જીવિતિન્દ્રિયં પવત્તસન્તતાધિપતેય્યપરિવારં હોતિ. સોતાપત્તિમગ્ગક્ખણે જાતા ધમ્મા, ઠપેત્વા ચિત્તસમુટ્ઠાનં રૂપં, સબ્બેવ કુસલા હોન્તિ, સબ્બેવ અનાસવા હોન્તિ, સબ્બેવ નિય્યાનિકા હોન્તિ, સબ્બેવ અપચયગામિનો હોન્તિ, સબ્બેવ લોકુત્તરા હોન્તિ, સબ્બેવ નિબ્બાનારમ્મણા હોન્તિ. સોતાપત્તિમગ્ગક્ખણે અનઞ્ઞાતઞ્ઞસ્સામીતિન્દ્રિયસ્સ ઇમાનિ અટ્ઠિન્દ્રિયાનિ સહજાતપરિવારા હોન્તિ, અઞ્ઞમઞ્ઞપરિવારા હોન્તિ, નિસ્સયપરિવારા હોન્તિ, સમ્પયુત્તપરિવારા હોન્તિ, સહગતા હોન્તિ, સહજાતા હોન્તિ, સંસટ્ઠા હોન્તિ, સમ્પયુત્તા હોન્તિ. તેવ તસ્સ આકારા ચેવ હોન્તિ પરિવારા ચ.

સોતાપત્તિફલક્ખણે…પે… અરહત્તફલક્ખણે અઞ્ઞાતાવિન્દ્રિયસ્સ સદ્ધિન્દ્રિયં અધિમોક્ખપરિવારં હોતિ…પે… જીવિતિન્દ્રિયં પવત્તસન્તતાધિપતેય્યપરિવારં હોતિ. અરહત્તફલક્ખણે જાતા ધમ્મા સબ્બેવ અબ્યાકતા હોન્તિ, ઠપેત્વા ચિત્તસમુટ્ઠાનં રૂપં સબ્બેવ અનાસવા હોન્તિ, સબ્બેવ લોકુત્તરા હોન્તિ, સબ્બેવ નિબ્બાનારમ્મણા હોન્તિ. અરહત્તફલક્ખણે અઞ્ઞાતાવિન્દ્રિયસ્સ ઇમાનિ અટ્ઠિન્દ્રિયાનિ સહજાતપરિવારા હોન્તિ. તેવ તસ્સ આકારા ચેવ હોન્તિ પરિવારા ચ. ઇતિ ઇમાનિ અટ્ઠ અટ્ઠકાનિ ચતુસટ્ઠિ હોન્તિ.

આસવાતિ કતમે તે આસવા? કામાસવો, ભવાસવો, દિટ્ઠાસવો, અવિજ્જાસવો. કત્થેતે આસવા ખીયન્તિ [ખિય્યન્તિ (ક.)]? સોતાપત્તિમગ્ગેન અનવસેસો દિટ્ઠાસવો ખીયતિ. અપાયગમનીયો કામાસવો ખીયતિ, અપાયગમનીયો ભવાસવો ખીયતિ, અપાયગમનીયો અવિજ્જાસવો ખીયતિ. એત્થેતે આસવા ખીયન્તિ. સકદાગામિમગ્ગેન ઓળારિકો કામાસવો ખીયતિ, તદેકટ્ઠો ભવાસવો ખીયતિ, તદેકટ્ઠો અવિજ્જાસવો ખીયતિ. એત્થેતે આસવા ખીયન્તિ. અનાગામિમગ્ગેન અનવસેસો કામાસવો ખીયતિ, તદેકટ્ઠો ભવાસવો ખીયતિ, તદેકટ્ઠો અવિજ્જાસવો ખીયતિ. એત્થેતે આસવા ખીયન્તિ. અરહત્તમગ્ગેન અનવસેસો ભવાસવો ખીયતિ, અનવસેસો અવિજ્જાસવો ખીયતિ. એત્થેતે આસવા ખીયન્તિ.

૨૦૮. ન તસ્સ અદ્દિટ્ઠમિધત્થિ કિઞ્ચિ, અથો અવિઞ્ઞાતમજાનિતબ્બં;

સબ્બં અભિઞ્ઞાસિ યદત્થિ નેય્યં, તથાગતો તેન સમન્તચક્ખૂતિ.

સમન્તચક્ખૂતિ કેનટ્ઠેન સમન્તચક્ખુ? ચુદ્દસ બુદ્ધઞાણાનિ – દુક્ખે ઞાણં બુદ્ધઞાણં, દુક્ખસમુદયે ઞાણં બુદ્ધઞાણં…પે… સબ્બઞ્ઞુતઞાણં બુદ્ધઞાણં, અનાવરણઞાણં બુદ્ધઞાણં. ઇમાનિ ચુદ્દસ બુદ્ધઞાણાનિ. ઇમેસં ચુદ્દસન્નં બુદ્ધઞાણાનં અટ્ઠ ઞાણાનિ સાવકસાધારણાનિ, છ ઞાણાનિ અસાધારણાનિ સાવકેહિ.

યાવતા દુક્ખસ્સ દુક્ખટ્ઠો ઞાતો, અઞ્ઞાતો દુક્ખટ્ઠો નત્થીતિ – સમન્તચક્ખુ. યં સમન્તચક્ખુ તં પઞ્ઞિન્દ્રિયં. પઞ્ઞિન્દ્રિયસ્સ વસેન અધિમોક્ખટ્ઠેન સદ્ધિન્દ્રિયં, પગ્ગહટ્ઠેન વીરિયિન્દ્રિયં, ઉપટ્ઠાનટ્ઠેન સતિન્દ્રિયં, અવિક્ખેપટ્ઠેન સમાધિન્દ્રિયં. યાવતા દુક્ખસ્સ દુક્ખટ્ઠો દિટ્ઠો વિદિતો સચ્છિકતો ફસ્સિતો પઞ્ઞાય; અફસ્સિતો પઞ્ઞાય દુક્ખટ્ઠો નત્થીતિ – સમન્તચક્ખુ. યં સમન્તચક્ખુ તં પઞ્ઞિન્દ્રિયં. પઞ્ઞિન્દ્રિયસ્સ વસેન અધિમોક્ખટ્ઠેન સદ્ધિન્દ્રિયં, પગ્ગહટ્ઠેન વીરિયિન્દ્રિયં, ઉપટ્ઠાનટ્ઠેન સતિન્દ્રિયં, અવિક્ખેપટ્ઠેન સમાધિન્દ્રિયં. યાવતા સમુદયસ્સ સમુદયટ્ઠો…પે… યાવતા નિરોધસ્સ નિરોધટ્ઠો… યાવતા મગ્ગસ્સ મગ્ગટ્ઠો… યાવતા અત્થપટિસમ્ભિદાય અત્થપટિસમ્ભિદટ્ઠો… યાવતા ધમ્મપટિસમ્ભિદાય ધમ્મપટિસમ્ભિદટ્ઠો… યાવતા નિરુત્તિપટિસમ્ભિદાય નિરુત્તિપટિસમ્ભિદટ્ઠો… યાવતા પટિભાનપટિસમ્ભિદાય પટિભાનપટિસમ્ભિદટ્ઠો… યાવતા ઇન્દ્રિયપરોપરિયત્તે ઞાણં… યાવતા સત્તાનં આસયાનુસયે ઞાણં… યાવતા યમકપાટિહીરે ઞાણં… યાવતા મહાકરુણાસમાપત્તિયા ઞાણં… યાવતા સદેવકસ્સ લોકસ્સ સમારકસ્સ સબ્રહ્મકસ્સ સસ્સમણબ્રાહ્મણિયા પજાય સદેવમનુસ્સાય દિટ્ઠં સુતં મુતં વિઞ્ઞાતં પત્તં પરિયેસિતં અનુવિચરિતં મનસા, તં ઞાતં દિટ્ઠં વિદિતં સચ્છિકતં ફસ્સિતં પઞ્ઞાય. અફસ્સિતં પઞ્ઞાય નત્થીતિ – સમન્તચક્ખુ. યં સમન્તચક્ખુ તં પઞ્ઞિન્દ્રિયં. પઞ્ઞિન્દ્રિયસ્સ વસેન અધિમોક્ખટ્ઠેન સદ્ધિન્દ્રિયં, પગ્ગહટ્ઠેન વીરિયિન્દ્રિયં, ઉપટ્ઠાનટ્ઠેન સતિન્દ્રિયં, અવિક્ખેપટ્ઠેન સમાધિન્દ્રિયં.

સદ્દહન્તો પગ્ગણ્હાતિ, પગ્ગણ્હન્તો સદ્દહતિ. સદ્દહન્તો ઉપટ્ઠાપેતિ, ઉપટ્ઠાપેન્તો સદ્દહતિ. સદ્દહન્તો સમાદહતિ, સમાદહન્તો સદ્દહતિ. સદ્દહન્તો પજાનાતિ, પજાનન્તો સદ્દહતિ. પગ્ગણ્હન્તો ઉપટ્ઠાપેતિ, ઉપટ્ઠાપેન્તો પગ્ગણ્હાતિ. પગ્ગણ્હન્તો સમાદહતિ, સમાદહન્તો પગ્ગણ્હાતિ. પગ્ગણ્હન્તો પજાનાતિ, પજાનન્તો પગ્ગણ્હાતિ. પગ્ગણ્હન્તો સદ્દહતિ, સદ્દહન્તો પગ્ગણ્હાતિ. ઉપટ્ઠાપેન્તો સમાદહતિ, સમાદહન્તો ઉપટ્ઠાપેતિ. ઉપટ્ઠાપેન્તો પજાનાતિ, પજાનન્તો ઉપટ્ઠાપેતિ. ઉપટ્ઠાપેન્તો સદ્દહતિ, સદ્દહન્તો ઉપટ્ઠાપેતિ. ઉપટ્ઠાપેન્તો પગ્ગણ્હાતિ, પગ્ગણ્હન્તો ઉપટ્ઠાપેતિ. સમાદહન્તો પજાનાતિ, પજાનન્તો સમાદહતિ. સમાદહન્તો સદ્દહતિ, સદ્દહન્તો સમાદહતિ. સમાદહન્તો પગ્ગણ્હાતિ, પગ્ગણ્હન્તો સમાદહતિ. સમાદહન્તો ઉપટ્ઠાપેતિ, ઉપટ્ઠાપેન્તો સમાદહતિ. પજાનન્તો સદ્દહતિ, સદ્દહન્તો પજાનાતિ. પજાનન્તો પગ્ગણ્હાતિ, પગ્ગણ્હન્તો પજાનાતિ. પજાનન્તો ઉપટ્ઠાપેતિ, ઉપટ્ઠાપેન્તો પજાનાતિ. પજાનન્તો સમાદહતિ, સમાદહન્તો પજાનાતિ.

સદ્દહિતત્તા પગ્ગહિતં, પગ્ગહિતત્તા સદ્દહિતં. સદ્દહિતત્તા ઉપટ્ઠાપિતં, ઉપટ્ઠાપિતત્તા સદ્દહિતં. સદ્દહિતત્તા સમાદહિતં, સમાદહિતત્તા સદ્દહિતં. સદ્દહિતત્તા પજાનિતં, પજાનિતત્તા સદ્દહિતં. પગ્ગહિતત્તા ઉપટ્ઠાપિતં, ઉપટ્ઠાપિતત્તા પગ્ગહિતં. પગ્ગહિતત્તા સમાદહિતં, સમાદહિતત્તા પગ્ગહિતં. પગ્ગહિતત્તા પજાનિતં પજાનિતત્તા પગ્ગહિતં. પગ્ગહિતત્તા સદ્દહિતં, સદ્દહિતત્તા પગ્ગહિતં. ઉપટ્ઠાપિતત્તા સમાદહિતં, સમાદહિતત્તા ઉપટ્ઠાપિતં. ઉપટ્ઠાપિતત્તા પજાનિતં, પજાનિતત્તા ઉપટ્ઠાપિતં. ઉપટ્ઠાપિતત્તા સદ્દહિતં, સદ્દહિતત્તા ઉપટ્ઠાપિતં. ઉપટ્ઠાપિતત્તા પગ્ગહિતં, પગ્ગહિતત્તા ઉપટ્ઠાપિતં. સમાદહિતત્તા પજાનિતં, પજાનિતત્તા સમાદહિતં. સમાદહિતત્તા સદ્દહિતં, સદ્દહિતત્તા સમાદહિતં. સમાદહિતત્તા પગ્ગહિતં, પગ્ગહિતત્તા સમાદહિતં. સમાદહિતત્તા ઉપટ્ઠાપિતં, ઉપટ્ઠાપિતત્તા સમાદહિતં. પજાનિતત્તા સદ્દહિતં, સદ્દહિતત્તા પજાનિતં. પજાનિતત્તા પગ્ગહિતં, પગ્ગહિતત્તા પજાનિતં. પજાનિતત્તા ઉપટ્ઠાપિતં, ઉપટ્ઠાપિતત્તા પજાનિતં. પજાનિતત્તા સમાદહિતં, સમાદહિતત્તા પજાનિતં.

યં બુદ્ધચક્ખુ તં બુદ્ધઞાણં, યં બુદ્ધઞાણં તં બુદ્ધચક્ખુ, યેન ચક્ખુના તથાગતો સત્તે પસ્સતિ અપ્પરજક્ખે મહારજક્ખે તિક્ખિન્દ્રિયે મુદિન્દ્રિયે સ્વાકારે દ્વાકારે સુવિઞ્ઞાપયે દુવિઞ્ઞાપયે અપ્પેકચ્ચે પરલોકવજ્જભયદસ્સાવિનો [પરલોકવજ્જભયદસ્સાવિને (સ્યા. ક.)], અપ્પેકચ્ચે નપરલોકવજ્જભયદસ્સાવિનો.

અપ્પરજક્ખે મહારજક્ખેતિ સદ્ધો પુગ્ગલો અપ્પરજક્ખો, અસ્સદ્ધો પુગ્ગલો મહારજક્ખો. આરદ્ધવીરિયો પુગ્ગલો અપ્પરજક્ખો, કુસીતો પુગ્ગલો મહારજક્ખો. ઉપટ્ઠિતસ્સતિ પુગ્ગલો અપ્પરજક્ખો, મુટ્ઠસ્સતિ પુગ્ગલો મહારજક્ખો. સમાહિતો પુગ્ગલો અપ્પરજક્ખો, અસમાહિતો પુગ્ગલો મહારજક્ખો. પઞ્ઞવા પુગ્ગલો અપ્પરજક્ખો, દુપ્પઞ્ઞો પુગ્ગલો મહારજક્ખો.

તિક્ખિન્દ્રિયે મુદિન્દ્રિયેતિ સદ્ધો પુગ્ગલો તિક્ખિન્દ્રિયો, અસ્સદ્ધો પુગ્ગલો મુદિન્દ્રિયો…પે… પઞ્ઞવા પુગ્ગલો તિક્ખિન્દ્રિયો, દુપ્પઞ્ઞો પુગ્ગલો મુદિન્દ્રિયો. સ્વાકારે દ્વાકારેતિ સદ્ધો પુગ્ગલો સ્વાકારો, અસ્સદ્ધો પુગ્ગલો દ્વાકારો…પે… પઞ્ઞવા પુગ્ગલો સ્વાકારો, દુપ્પઞ્ઞો પુગ્ગલો દ્વાકારો. સુવિઞ્ઞાપયે દુવિઞ્ઞાપયેતિ સદ્ધો પુગ્ગલો સુવિઞ્ઞાપયો, અસ્સદ્ધો પુગ્ગલો દુવિઞ્ઞાપયો…પે… પઞ્ઞવા પુગ્ગલો સુવિઞ્ઞાપયો, દુપ્પઞ્ઞો પુગ્ગલો દુવિઞ્ઞાપયો.

અપ્પેકચ્ચે પરલોકવજ્જભયદસ્સાવિનો, અપ્પેકચ્ચે નપરલોકવજ્જભયદસ્સાવિનોતિ સદ્ધો પુગ્ગલો પરલોકવજ્જભયદસ્સાવી, અસ્સદ્ધો પુગ્ગલો નપરલોકવજ્જભયદસ્સાવી. આરદ્ધવીરિયો પુગ્ગલો પરલોકવજ્જભયદસ્સાવી, કુસીતો પુગ્ગલો નપરલોકવજ્જભયદસ્સાવી…પે… પઞ્ઞવા પુગ્ગલો પરલોકવજ્જભયદસ્સાવી, દુપ્પઞ્ઞો પુગ્ગલો નપરલોકવજ્જભયદસ્સાવી.

લોકોતિ ખન્ધલોકો ધાતુલોકો આયતનલોકો વિપત્તિભવલોકો વિપત્તિસમ્ભવલોકો સમ્પત્તિભવલોકો સમ્પત્તિસમ્ભવલોકો.

એકો લોકો – સબ્બે સત્તા આહારટ્ઠિતિકા. દ્વે લોકા – નામઞ્ચ રૂપઞ્ચ. તયો લોકા – તિસ્સો વેદના. ચત્તારો લોકા – ચત્તારો આહારા. પઞ્ચ લોકા – પઞ્ચુપાદાનક્ખન્ધા. છ લોકા – છ અજ્ઝત્તિકાનિ આયતનાનિ. સત્ત લોકા – સત્ત વિઞ્ઞાણટ્ઠિતિયો. અટ્ઠ લોકા – અટ્ઠ લોકધમ્મા. નવ લોકા – નવ સત્તાવાસા. દસ લોકા – દસાયતનાનિ. દ્વાદસ લોકા – દ્વાદસાયતનાનિ. અટ્ઠારસ લોકા – અટ્ઠારસ ધાતુયો.

વજ્જન્તિ સબ્બે કિલેસા વજ્જા, સબ્બે દુચ્ચરિતા વજ્જા, સબ્બે અભિસઙ્ખારા વજ્જા, સબ્બે ભવગામિકમ્મા વજ્જા. ઇતિ ઇમસ્મિઞ્ચ લોકે ઇમસ્મિઞ્ચ વજ્જે તિબ્બા ભયસઞ્ઞા પચ્ચુપટ્ઠિતા હોન્તિ, સેય્યથાપિ ઉક્ખિત્તાસિકે વધકે. ઇમેહિ પઞ્ઞાસાય આકારેહિ ઇમાનિ પઞ્ચિન્દ્રિયાનિ જાનાતિ પસ્સતિ અઞ્ઞાતિ પટિવિજ્ઝતીતિ.

ઇન્દ્રિયસમોધાનો પઞ્ચમો.

તતિયભાણવારો.

ઇન્દ્રિયકથા નિટ્ઠિતા.