૧. ગણનવાર

૧૫૨. સોળસવત્થુકં આનાપાનસ્સતિસમાધિં [આનાપાનસતિસમાધિં (સી. અટ્ઠ.)] ભાવયતો સમાધિકાનિ દ્વે ઞાણસતાનિ ઉપ્પજ્જન્તિ – અટ્ઠ પરિપન્થે [પરિબન્ધે (ક.)] ઞાણાનિ, અટ્ઠ ચ ઉપકારે ઞાણાનિ, અટ્ઠારસ ઉપક્કિલેસે ઞાણાનિ, તેરસ વોદાને ઞાણાનિ, બાત્તિંસ સતોકારિસ્સ [સતોકારીસુ (સ્યા.)] ઞાણાનિ, ચતુવીસતિ સમાધિવસેન ઞાણાનિ, દ્વેસત્તતિ વિપસ્સનાવસેન ઞાણાનિ, અટ્ઠ નિબ્બિદાઞાણાનિ, અટ્ઠ નિબ્બિદાનુલોમઞાણાનિ, અટ્ઠ નિબ્બિદાપટિપ્પસ્સદ્ધિઞાણાનિ, એકવીસતિ વિમુત્તિસુખે ઞાણાનિ.

કતમાનિ અટ્ઠ પરિપન્થે ઞાણાનિ, અટ્ઠ ચ ઉપકારે ઞાણાનિ? કામચ્છન્દો સમાધિસ્સ પરિપન્થો, નેક્ખમ્મં સમાધિસ્સ ઉપકારં. બ્યાપાદો સમાધિસ્સ પરિપન્થો, અબ્યાપાદો સમાધિસ્સ ઉપકારં. થિનમિદ્ધં સમાધિસ્સ પરિપન્થો, આલોકસઞ્ઞા સમાધિસ્સ ઉપકારં. ઉદ્ધચ્ચં સમાધિસ્સ પરિપન્થો, અવિક્ખેપો સમાધિસ્સ ઉપકારં. વિચિકિચ્છા સમાધિસ્સ પરિપન્થો, ધમ્મવવત્થાનં સમાધિસ્સ ઉપકારં. અવિજ્જા સમાધિસ્સ પરિપન્થો, ઞાણં સમાધિસ્સ ઉપકારં. અરતિ સમાધિસ્સ પરિપન્થો, પામોજ્જં સમાધિસ્સ ઉપકારં. સબ્બેપિ અકુસલા ધમ્મા સમાધિસ્સ પરિપન્થા, સબ્બેપિ કુસલા ધમ્મા સમાધિસ્સ ઉપકારા. ઇમાનિ અટ્ઠ પરિપન્થે ઞાણાનિ, અટ્ઠ ચ ઉપકારે ઞાણાનિ.

ગણનવારો પઠમો.