૪૦. દસ્સનવિસુદ્ધિઞાણનિદ્દેસો

૯૧. કથં સબ્બધમ્માનં એકસઙ્ગહતાનાનત્તેકત્તપટિવેધે પઞ્ઞા દસ્સનવિસુદ્ધિઞાણં? સબ્બધમ્માનન્તિ પઞ્ચક્ખન્ધા…પે… અપરિયાપન્ના ધમ્મા.

એકસઙ્ગહતાતિ દ્વાદસહિ આકારેહિ સબ્બે ધમ્મા એકસઙ્ગહિતા. તથટ્ઠેન, અનત્તટ્ઠેન, સચ્ચટ્ઠેન, પટિવેધટ્ઠેન, અભિજાનનટ્ઠેન, પરિજાનનટ્ઠેન, ધમ્મટ્ઠેન, ધાતુટ્ઠેન, ઞાતટ્ઠેન, સચ્છિકિરિયટ્ઠેન, ફુસનટ્ઠેન, અભિસમયટ્ઠેન – ઇમેહિ દ્વાદસહિ આકારેહિ સબ્બે ધમ્મા એકસઙ્ગહિતા.

નાનત્તેકત્તન્તિ કામચ્છન્દો નાનત્તં, નેક્ખમ્મં એકત્તં…પે… સબ્બકિલેસા નાનત્તં, અરહત્તમગ્ગો એકત્તં.

પટિવેધેતિ દુક્ખસચ્ચં પરિઞ્ઞાપટિવેધં પટિવિજ્ઝતિ. સમુદયસચ્ચં પહાનપટિવેધં પટિવિજ્ઝતિ. નિરોધસચ્ચં સચ્છિકિરિયાપટિવેધં પટિવિજ્ઝતિ. મગ્ગસચ્ચં ભાવનાપટિવેધં પટિવિજ્ઝતિ.

દસ્સનવિસુદ્ધીતિ સોતાપત્તિમગ્ગક્ખણે દસ્સનં વિસુજ્ઝતિ; સોતાપત્તિફલક્ખણે દસ્સનં વિસુદ્ધં. સકદાગામિમગ્ગક્ખણે દસ્સનં વિસુજ્ઝતિ; સકદાગામિફલક્ખણે દસ્સનં વિસુદ્ધં. અનાગામિમગ્ગક્ખણે દસ્સનં વિસુજ્ઝતિ; અનાગામિફલક્ખણે દસ્સનં વિસુદ્ધં. અરહત્તમગ્ગક્ખણે દસ્સનં વિસુજ્ઝતિ; અરહત્તફલક્ખણે દસ્સનં વિસુદ્ધં. તં ઞાતટ્ઠેન ઞાણં, પજાનનટ્ઠેન પઞ્ઞા. તેન વુચ્ચતિ – ‘‘સબ્બધમ્માનં એકસઙ્ગહતાનાનત્તેકત્તપટિવેધે પઞ્ઞા દસ્સનવિસુદ્ધિઞાણં’’.

દસ્સનવિસુદ્ધિઞાણનિદ્દેસો ચત્તાલીસમો.