૪૧. ખન્તિઞાણનિદ્દેસો

૯૨. કથં વિદિતત્તા પઞ્ઞા ખન્તિઞાણં? રૂપં અનિચ્ચતો વિદિતં, રૂપં દુક્ખતો વિદિતં, રૂપં અનત્તતો વિદિતં. યં યં વિદિતં તં તં ખમતીતિ – વિદિતત્તા પઞ્ઞા ખન્તિઞાણં. વેદના…પે… સઞ્ઞા… સઙ્ખારા… વિઞ્ઞાણં… ચક્ખુ…પે… જરામરણં અનિચ્ચતો વિદિતં, જરામરણં દુક્ખતો વિદિતં, જરામરણં અનત્તતો વિદિતં. યં યં વિદિતં તં તં ખમતીતિ – વિદિતત્તા પઞ્ઞા ખન્તિઞાણં. તં ઞાતટ્ઠેન ઞાણં, પજાનનટ્ઠેન પઞ્ઞા. તેન વુચ્ચતિ – ‘‘વિદિતત્તા પઞ્ઞા ખન્તિઞાણં’’.

ખન્તિઞાણનિદ્દેસો એકચત્તાલીસમો.