૩૮. વીરિયારમ્ભઞાણનિદ્દેસો

૮૯. કથં અસલ્લીનત્તપહિતત્તપગ્ગહટ્ઠે પઞ્ઞા વીરિયારમ્ભે ઞાણં? અનુપ્પન્નાનં પાપકાનં અકુસલાનં ધમ્માનં અનુપ્પાદાય અસલ્લીનત્તપહિતત્તપગ્ગહટ્ઠે પઞ્ઞા વીરિયારમ્ભે ઞાણં. ઉપ્પન્નાનં પાપકાનં અકુસલાનં ધમ્માનં પહાનાય અસલ્લીનત્તપહિતત્તપગ્ગહટ્ઠે પઞ્ઞા વીરિયારમ્ભે ઞાણં. અનુપ્પન્નાનં કુસલાનં ધમ્માનં ઉપ્પાદાય અસલ્લીનત્તપહિતત્તપગ્ગહટ્ઠે પઞ્ઞા વીરિયારમ્ભે ઞાણં. ઉપ્પન્નાનં કુસલાનં ધમ્માનં ઠિતિયા અસમ્મોસાય ભિય્યોભાવાય વેપુલ્લાય ભાવનાય પારિપૂરિયા અસલ્લીનત્તપહિતત્તપગ્ગહટ્ઠે પઞ્ઞા વીરિયારમ્ભે ઞાણં.

અનુપ્પન્નસ્સ કામચ્છન્દસ્સ અનુપ્પાદાય અસલ્લીનત્તપહિતત્તપગ્ગહટ્ઠે પઞ્ઞા વીરિયારમ્ભે ઞાણં. ઉપ્પન્નસ્સ કામચ્છન્દસ્સ પહાનાય અસલ્લીનત્તપહિતત્તપગ્ગહટ્ઠે પઞ્ઞા વીરિયારમ્ભે ઞાણં. અનુપ્પન્નસ્સ નેક્ખમ્મસ્સ ઉપ્પાદાય અસલ્લીનત્તપહિતત્તપગ્ગહટ્ઠે પઞ્ઞા વીરિયારમ્ભે ઞાણં. ઉપ્પન્નસ્સ નેક્ખમ્મસ્સ ઠિતિયા અસમ્મોસાય ભિય્યોભાવાય વેપુલ્લાય ભાવનાય પારિપૂરિયા અસલ્લીનત્તપહિતત્તપગ્ગહટ્ઠે પઞ્ઞા વીરિયારમ્ભે ઞાણં…પે….

અનુપ્પન્નાનં સબ્બકિલેસાનં અનુપ્પાદાય અસલ્લીનત્તપહિતત્તપગ્ગહટ્ઠે પઞ્ઞા વીરિયારમ્ભે ઞાણં. ઉપ્પન્નાનં સબ્બકિલેસાનં પહાનાય અસલ્લીનત્તપહિતત્તપગ્ગહટ્ઠે પઞ્ઞા વીરિયારમ્ભે ઞાણં…પે… અનુપ્પન્નસ્સ અરહત્તમગ્ગસ્સ ઉપ્પાદાય અસલ્લીનત્તપહિતત્તપગ્ગહટ્ઠે પઞ્ઞા વીરિયારમ્ભે ઞાણં. ઉપ્પન્નસ્સ અરહત્તમગ્ગસ્સ ઠિતિયા અસમ્મોસાય ભિય્યોભાવાય વેપુલ્લાય ભાવનાય પારિપૂરિયા અસલ્લીનત્તપહિતત્તપગ્ગહટ્ઠે પઞ્ઞા વીરિયારમ્ભે ઞાણં. તં ઞાતટ્ઠેન ઞાણં, પજાનનટ્ઠેન પઞ્ઞા. તેન વુચ્ચતિ – ‘‘અસલ્લીનત્તપહિતત્તપગ્ગહટ્ઠે પઞ્ઞા વીરિયારમ્ભે ઞાણં’’.

વીરિયારમ્ભઞાણનિદ્દેસો અટ્ઠતિંસતિમો.