૩૭. સલ્લેખટ્ઠઞાણનિદ્દેસો

૮૮. કથં પુથુનાનત્તેકત્તતેજપરિયાદાને પઞ્ઞા સલ્લેખટ્ઠે [પુથુનાનત્તેકત્તતેજપરિયાદાને (ક.)] ઞાણં? પુથૂતિ – રાગો પુથુ, દોસો પુથુ, મોહો પુથુ, કોધો…પે… ઉપનાહો… મક્ખો… પળાસો… ઇસ્સા… મચ્છરિયં… માયા… સાઠેય્યં… થમ્ભો… સારમ્ભો… માનો… અતિમાનો… મદો… પમાદો… સબ્બે કિલેસા… સબ્બે દુચ્ચરિતા… સબ્બે અભિસઙ્ખારા… સબ્બે ભવગામિકમ્મા.

નાનત્તેકત્તન્તિ કામચ્છન્દો નાનત્તં, નેક્ખમ્મં એકત્તં. બ્યાપાદો નાનત્તં, અબ્યાપાદો એકત્તં. થિનમિદ્ધં નાનત્તં, આલોકસઞ્ઞા એકત્તં. ઉદ્ધચ્ચં નાનત્તં, અવિક્ખેપો એકત્તં. વિચિકિચ્છા નાનત્તં, ધમ્મવવત્થાનં એકત્તં. અવિજ્જા નાનત્તં, ઞાણં એકત્તં. અરતિ નાનત્તં, પામોજ્જં એકત્તં. નીવરણા નાનત્તં, પઠમં ઝાનં એકત્તં…પે… સબ્બે કિલેસા નાનત્તં, અરહત્તમગ્ગો એકત્તં.

તેજોતિ પઞ્ચ તેજા – ચરણતેજો, ગુણતેજો, પઞ્ઞાતેજો, પુઞ્ઞતેજો, ધમ્મતેજો. ચરણતેજેન તેજિતત્તા દુસ્સીલ્યતેજં પરિયાદિયતિ. ગુણતેજેન તેજિતત્તા અગુણતેજં પરિયાદિયતિ. પઞ્ઞાતેજેન તેજિતત્તા દુપ્પઞ્ઞતેજં પરિયાદિયતિ. પુઞ્ઞતેજેન તેજિતત્તા અપુઞ્ઞતેજં પરિયાદિયતિ. ધમ્મતેજેન તેજિતત્તા અધમ્મતેજં પરિયાદિયતિ.

સલ્લેખોતિ કામચ્છન્દો અસલ્લેખો, નેક્ખમ્મં સલ્લેખો. બ્યાપાદો અસલ્લેખો, અબ્યાપાદો સલ્લેખો. થિનમિદ્ધં અસલ્લેખો, આલોકસઞ્ઞા સલ્લેખો. ઉદ્ધચ્ચં અસલ્લેખો, અવિક્ખેપો સલ્લેખો. વિચિકિચ્છા અસલ્લેખો, ધમ્મવવત્થાનં સલ્લેખો. અવિજ્જા અસલ્લેખો, ઞાણં સલ્લેખો. અરતિ અસલ્લેખો, પામોજ્જં સલ્લેખો. નીવરણા અસલ્લેખો, પઠમં ઝાનં સલ્લેખો…પે… સબ્બકિલેસા અસલ્લેખો, અરહત્તમગ્ગો સલ્લેખો. તં ઞાતટ્ઠેન ઞાણં, પજાનનટ્ઠેન પઞ્ઞા. તેન વુચ્ચતિ – ‘‘પુથુનાનત્તતેજપરિયાદાને પઞ્ઞા સલ્લેખટ્ઠે ઞાણં’’.

સલ્લેખટ્ઠઞાણનિદ્દેસો સત્તતિંસતિમો.