૩૬. સમસીસટ્ઠઞાણનિદ્દેસો

૮૭. કથં સબ્બધમ્માનં સમ્મા સમુચ્છેદે નિરોધે ચ અનુપટ્ઠાનતા પઞ્ઞા સમસીસટ્ઠે ઞાણં? સબ્બધમ્માનન્તિ – પઞ્ચક્ખન્ધા, દ્વાદસાયતનાનિ, અટ્ઠારસ ધાતુયો, કુસલા ધમ્મા, અકુસલા ધમ્મા, અબ્યાકતા ધમ્મા, કામાવચરા ધમ્મા, રૂપાવચરા ધમ્મા, અરૂપાવચરા ધમ્મા, અપરિયાપન્ના ધમ્મા. સમ્મા સમુચ્છેદેતિ નેક્ખમ્મેન કામચ્છન્દં સમ્મા સમુચ્છિન્દતિ. અબ્યાપાદેન બ્યાપાદં સમ્મા સમુચ્છિન્દતિ. આલોકસઞ્ઞાય થિનમિદ્ધં સમ્મા સમુચ્છિન્દતિ. અવિક્ખેપેન ઉદ્ધચ્ચં સમ્મા સમુચ્છિન્દતિ. ધમ્મવવત્થાનેન વિચિકિચ્છં સમ્મા સમુચ્છિન્દતિ. ઞાણેન અવિજ્જં સમ્મા સમુચ્છિન્દતિ. પામોજ્જેન અરતિં સમ્મા સમુચ્છિન્દતિ. પઠમેન ઝાનેન નીવરણે સમ્મા સમુચ્છિન્દતિ…પે… અરહત્તમગ્ગેન સબ્બકિલેસે સમ્મા સમુચ્છિન્દતિ.

નિરોધેતિ નેક્ખમ્મેન કામચ્છન્દં નિરોધેતિ. અબ્યાપાદેન બ્યાપાદં નિરોધેતિ. આલોકસઞ્ઞાય થિનમિદ્ધં નિરોધેતિ. અવિક્ખેપેન ઉદ્ધચ્ચં નિરોધેતિ. ધમ્મવવત્થાનેન વિચિકિચ્છં નિરોધેતિ. ઞાણેન અવિજ્જં નિરોધેતિ. પામોજ્જેન અરતિં નિરોધેતિ. પઠમેન ઝાનેન નીવરણે નિરોધેતિ…પે… અરહત્તમગ્ગેન સબ્બકિલેસે નિરોધેતિ.

અનુપટ્ઠાનતાતિ નેક્ખમ્મં પટિલદ્ધસ્સ કામચ્છન્દો ન ઉપટ્ઠાતિ. અબ્યાપાદં પટિલદ્ધસ્સ બ્યાપાદો ન ઉપટ્ઠાતિ. આલોકસઞ્ઞં પટિલદ્ધસ્સ થિનમિદ્ધં ન ઉપટ્ઠાતિ. અવિક્ખેપં પટિલદ્ધસ્સ ઉદ્ધચ્ચં ન ઉપટ્ઠાતિ. ધમ્મવવત્થાનં પટિલદ્ધસ્સ વિચિકિચ્છા ન ઉપટ્ઠાતિ. ઞાણં પટિલદ્ધસ્સ અવિજ્જા ન ઉપટ્ઠાતિ. પામોજ્જં પટિલદ્ધસ્સ અરતિ ન ઉપટ્ઠાતિ. પઠમં ઝાનં પટિલદ્ધસ્સ નીવરણા ન ઉપટ્ઠહન્તિ…પે… અરહત્તમગ્ગં પટિલદ્ધસ્સ સબ્બકિલેસા ન ઉપટ્ઠહન્તિ.

સમન્તિ કામચ્છન્દસ્સ પહીનત્તા નેક્ખમ્મં સમં. બ્યાપાદસ્સ પહીનત્તા અબ્યાપાદો સમં. થિનમિદ્ધસ્સ પહીનત્તા આલોકસઞ્ઞા સમં. ઉદ્ધચ્ચસ્સ પહીનત્તા અવિક્ખેપો સમં. વિચિકિચ્છાય પહીનત્તા ધમ્મવવત્થાનં સમં. અવિજ્જાય પહીનત્તા ઞાણં સમં. અરતિયા પહીનત્તા પામોજ્જં સમં. નીવરણાનં પહીનત્તા પઠમં ઝાનં સમં…પે… સબ્બકિલેસાનં પહીનત્તા અરહત્તમગ્ગો સમં.

સીસન્તિ તેરસ સીસાનિ – પલિબોધસીસઞ્ચ તણ્હા, વિનિબન્ધનસીસઞ્ચ માનો, પરામાસસીસઞ્ચ દિટ્ઠિ, વિક્ખેપસીસઞ્ચ ઉદ્ધચ્ચં, સંકિલેસસીસઞ્ચ અવિજ્જા, અધિમોક્ખસીસઞ્ચ સદ્ધા, પગ્ગહસીસઞ્ચ વીરિયં, ઉપટ્ઠાનસીસઞ્ચ સતિ, અવિક્ખેપસીસઞ્ચ સમાધિ, દસ્સનસીસઞ્ચ પઞ્ઞા, પવત્તસીસઞ્ચ જીવિતિન્દ્રિયં, ગોચરસીસઞ્ચ વિમોક્ખો, સઙ્ખારસીસઞ્ચ નિરોધો. તં ઞાતટ્ઠેન ઞાણં, પજાનનટ્ઠેન પઞ્ઞા. તેન વુચ્ચતિ – ‘‘સબ્બધમ્માનં સમ્મા સમુચ્છેદે નિરોધે ચ અનુપટ્ઠાનતા પઞ્ઞા સમસીસટ્ઠે ઞાણં’’.

સમસીસટ્ઠઞાણનિદ્દેસો છત્તિંસતિમો.