૩૨. આનન્તરિકસમાધિઞાણનિદ્દેસો

૮૦. કથં અવિક્ખેપપરિસુદ્ધત્તા આસવસમુચ્છેદે પઞ્ઞા આનન્તરિકસમાધિમ્હિ ઞાણં? નેક્ખમ્મવસેન ચિત્તસ્સ એકગ્ગતા અવિક્ખેપો સમાધિ. તસ્સ સમાધિસ્સ વસેન ઉપ્પજ્જતિ ઞાણં. તેન ઞાણેન આસવા ખીયન્તિ. ઇતિ પઠમં સમથો, પચ્છા ઞાણં. તેન ઞાણેન આસવાનં ખયો હોતિ. તેન વુચ્ચતિ – ‘‘અવિક્ખેપપરિસુદ્ધત્તા આસવસમુચ્છેદે પઞ્ઞા આનન્તરિકસમાધિમ્હિ ઞાણં’’.

આસવાતિ કતમે તે આસવા? કામાસવો, ભવાસવો, દિટ્ઠાસવો, અવિજ્જાસવો. કત્થેતે આસવા ખીયન્તિ? સોતાપત્તિમગ્ગેન અનવસેસો દિટ્ઠાસવો ખીયતિ, અપાયગમનીયો કામાસવો ખીયતિ, અપાયગમનીયો ભવાસવો ખીયતિ, અપાયગમનીયો અવિજ્જાસવો ખીયતિ. એત્થેતે આસવા ખીયન્તિ. સકદાગામિમગ્ગેન ઓળારિકો કામાસવો ખીયતિ, તદેકટ્ઠો ભવાસવો ખીયતિ, તદેકટ્ઠો અવિજ્જાસવો ખીયતિ. એત્થેતે આસવા ખીયન્તિ. અનાગામિમગ્ગેન અનવસેસો કામાસવો ખીયતિ, તદેકટ્ઠો ભવાસવો ખીયતિ, તદેકટ્ઠો અવિજ્જાસવો ખીયતિ. એત્થેતે આસવા ખીયન્તિ. અરહત્તમગ્ગેન અનવસેસો ભવાસવો ખીયતિ, અનવસેસો અવિજ્જાસવો ખીયતિ. એત્થેતે આસવા ખીયન્તિ.

અબ્યાપાદવસેન …પે… આલોકસઞ્ઞાવસેન… અવિક્ખેપવસેન… ધમ્મવવત્થાનવસેન… ઞાણવસેન… પામોજ્જવસેન… પઠમજ્ઝાનવસેન… દુતિયજ્ઝાનવસેન… તતિયજ્ઝાનવસેન… ચતુત્થજ્ઝાનવસેન… આકાસાનઞ્ચાયતનસમાપત્તિવસેન… વિઞ્ઞાણઞ્ચાયતનસમાપત્તિવસેન… આકિઞ્ચઞ્ઞાયતનસમાપત્તિવસેન… નેવસઞ્ઞાનાસઞ્ઞાયતનસમાપત્તિવસેન… પથવીકસિણવસેન… આપોકસિણવસેન … તેજોકસિણવસેન… વાયોકસિણવસેન… નીલકસિણવસેન… પીતકસિણવસેન… લોહિતકસિણવસેન… ઓદાતકસિણવસેન… આકાસકસિણવસેન… વિઞ્ઞાણકસિણવસેન… બુદ્ધાનુસ્સતિવસેન… ધમ્માનુસ્સતિવસેન… સઙ્ઘાનુસ્સતિવસેન… સીલાનુસ્સતિવસેન… ચાગાનુસ્સતિવસેન… દેવતાનુસ્સતિવસેન… આનાપાનસ્સતિવસેન… મરણસ્સતિવસેન… કાયગતાસતિવસેન… ઉપસમાનુસ્સતિવસેન… ઉદ્ધુમાતકસઞ્ઞાવસેન… વિનીલકસઞ્ઞાવસેન… વિપુબ્બકસઞ્ઞાવસેન… વિચ્છિદ્દકસઞ્ઞાવસેન… વિક્ખાયિતકસઞ્ઞાવસેન… વિક્ખિત્તકસઞ્ઞાવસેન… હતવિક્ખિત્તકસઞ્ઞાવસેન … લોહિતકસઞ્ઞાવસેન… પુળવકસઞ્ઞાવસેન… અટ્ઠિકસઞ્ઞાવસેન.

૮૧. દીઘં અસ્સાસવસેન…પે… દીઘં પસ્સાસવસેન… રસ્સં અસ્સાસવસેન… રસ્સં પસ્સાસવસેન… સબ્બકાયપટિસંવેદી અસ્સાસવસેન… સબ્બકાયપટિસંવેદી પસ્સાસવસેન… પસ્સમ્ભયં કાયસઙ્ખારં અસ્સાસવસેન… પસ્સમ્ભયં કાયસઙ્ખારં પસ્સાસવસેન… પીતિપટિસંવેદી અસ્સાસવસેન… પીતિપટિસંવેદી પસ્સાસવસેન… સુખપટિસંવેદી અસ્સાસવસેન… સુખપટિસંવેદી પસ્સાસવસેન… ચિત્તસઙ્ખારપટિસંવેદી અસ્સાસવસેન… ચિત્તસઙ્ખારપટિસંવેદી પસ્સાસવસેન… પસ્સમ્ભયં ચિત્તસઙ્ખારં અસ્સાસવસેન… પસ્સમ્ભયં ચિત્તસઙ્ખારં પસ્સાસવસેન… ચિત્તપટિસંવેદી અસ્સાસવસેન… ચિત્તપટિસંવેદી પસ્સાસવસેન… અભિપ્પમોદયં ચિત્તં અસ્સાસવસેન… અભિપ્પમોદયં ચિત્તં પસ્સાસવસેન… સમાદહં ચિત્તં…પે… વિમોચયં ચિત્તં… અનિચ્ચાનુપસ્સી … વિરાગાનુપસ્સી… નિરોધાનુપસ્સી… પટિનિસ્સગ્ગાનુપસ્સી અસ્સાસવસેન… પટિનિસ્સગ્ગાનુપસ્સી પસ્સાસવસેન ચિત્તસ્સ એકગ્ગતા અવિક્ખેપો સમાધિ. તસ્સ સમાધિસ્સ વસેન ઉપ્પજ્જતિ ઞાણં, તેન ઞાણેન આસવા ખીયન્તિ. ઇતિ પઠમં સમથો, પચ્છા ઞાણં. તેન ઞાણેન આસવાનં ખયો હોતિ. તેન વુચ્ચતિ – ‘‘અવિક્ખેપપરિસુદ્ધત્તા આસવસમુચ્છેદે પઞ્ઞા આનન્તરિકસમાધિમ્હિ ઞાણં’’.

આસવાતિ કતમે તે આસવા? કામાસવો, ભવાસવો, દિટ્ઠાસવો, અવિજ્જાસવો. કત્થેતે આસવા ખીયન્તિ? સોતાપત્તિમગ્ગેન અનવસેસો દિટ્ઠાસવો ખીયતિ, અપાયગમનીયો કામાસવો ખીયતિ, અપાયગમનીયો ભવાસવો ખીયતિ, અપાયગમનીયો અવિજ્જાસવો ખીયતિ. એત્થેતે આસવા ખીયન્તિ. સકદાગામિમગ્ગેન ઓળારિકો કામાસવો ખીયતિ, તદેકટ્ઠો ભવાસવો ખીયતિ, તદેકટ્ઠો અવિજ્જાસવો ખીયતિ. એત્થેતે આસવા ખીયન્તિ. અનાગામિમગ્ગેન અનવસેસો કામાસવો ખીયતિ, તદેકટ્ઠો ભવાસવો ખીયતિ, તદેકટ્ઠો અવિજ્જાસવો ખીયતિ. એત્થેતે આસવા ખીયન્તિ. અરહત્તમગ્ગેન અનવસેસો ભવાસવો ખીયતિ, અનવસેસો અવિજ્જાસવો ખીયતિ. એત્થેતે આસવા ખીયન્તિ. તં ઞાતટ્ઠેન ઞાણં, પજાનનટ્ઠેન પઞ્ઞા. તેન વુચ્ચતિ – ‘‘અવિક્ખેપપરિસુદ્ધત્તા આસવસમુચ્છેદે પઞ્ઞા આનન્તરિકસમાધિમ્હિ ઞાણં’’.

આનન્તરિકસમાધિઞાણનિદ્દેસો દ્વત્તિંસતિમો.