૨૦-૨૪. ઞાણપઞ્ચકનિદ્દેસો

૭૫. કથં અભિઞ્ઞાપઞ્ઞા ઞાતટ્ઠે ઞાણં, પરિઞ્ઞાપઞ્ઞા તીરણટ્ઠે ઞાણં, પહાનેપઞ્ઞા પરિચ્ચાગટ્ઠે ઞાણં, ભાવના પઞ્ઞા એકરસટ્ઠે ઞાણં, સચ્છિકિરિયાપઞ્ઞા ફસ્સનટ્ઠે ઞાણં? યે યે ધમ્મા અભિઞ્ઞાતા હોન્તિ, તે તે ધમ્મા ઞાતા હોન્તિ. યે યે ધમ્મા પરિઞ્ઞાતા હોન્તિ, તે તે ધમ્મા તીરિતા હોન્તિ. યે યે ધમ્મા પહીના હોન્તિ, તે તે ધમ્મા પરિચ્ચત્તા હોન્તિ. યે યે ધમ્મા ભાવિતા હોન્તિ, તે તે ધમ્મા એકરસા હોન્તિ. યે યે ધમ્મા સચ્છિકતા હોન્તિ, તે તે ધમ્મા ફસ્સિતા હોન્તિ. તં ઞાતટ્ઠેન ઞાણં, પજાનનટ્ઠેન પઞ્ઞા. તેન વુચ્ચતિ – ‘‘અભિઞ્ઞા પઞ્ઞા ઞાતટ્ઠે ઞાણં, પરિઞ્ઞા પઞ્ઞા તીરણટ્ઠે ઞાણં, પહાને પઞ્ઞા પરિચ્ચાગટ્ઠે ઞાણં, ભાવના પઞ્ઞા એકરસટ્ઠે ઞાણં, સચ્છિકિરિયા પઞ્ઞા ફુસનટ્ઠે ઞાણં’’.

ઞાણપઞ્ચકનિદ્દેસો ચતુવીસતિમો.