૧૪. પચ્ચવેક્ખણઞાણનિદ્દેસો

૬૫. કથં તદા સમુદાગતે ધમ્મે પસ્સને પઞ્ઞા પચ્ચવેક્ખણે ઞાણં? સોતાપત્તિમગ્ગક્ખણે દસ્સનટ્ઠેન સમ્માદિટ્ઠિ તદા સમુદાગતા. અભિનિરોપનટ્ઠેન સમ્માસઙ્કપ્પો તદા સમુદાગતો. પરિગ્ગહટ્ઠેન સમ્માવાચા તદા સમુદાગતા. સમુટ્ઠાનટ્ઠેન સમ્માકમ્મન્તો તદા સમુદાગતો. વોદાનટ્ઠેન સમ્માઆજીવો તદા સમુદાગતો. પગ્ગહટ્ઠેન સમ્માવાયામો તદા સમુદાગતો. ઉપટ્ઠાનટ્ઠેન સમ્માસતિ તદા સમુદાગતા. અવિક્ખેપટ્ઠેન સમ્માસમાધિ તદા સમુદાગતો.

ઉપટ્ઠાનટ્ઠેન સતિસમ્બોજ્ઝઙ્ગો તદા સમુદાગતો. પવિચયટ્ઠેન ધમ્મવિચયસમ્બોજ્ઝઙ્ગો તદા સમુદાગતો. પગ્ગહટ્ઠેન વીરિયસમ્બોજ્ઝઙ્ગો તદા સમુદાગતો. ફરણટ્ઠેન પીતિસમ્બોજ્ઝઙ્ગો તદા સમુદાગતો. ઉપસમટ્ઠેન પસ્સદ્ધિસમ્બોજ્ઝઙ્ગો તદા સમુદાગતો. અવિક્ખેપટ્ઠેન સમાધિસમ્બોજ્ઝઙ્ગો તદા સમુદાગતો. પટિસઙ્ખાનટ્ઠેન ઉપેક્ખાસમ્બોજ્ઝઙ્ગો તદા સમુદાગતો.

અસ્સદ્ધિયે અકમ્પિયટ્ઠેન સદ્ધાબલં તદા સમુદાગતં. કોસજ્જે અકમ્પિયટ્ઠેન વીરિયબલં તદા સમુદાગતં. પમાદે અકમ્પિયટ્ઠેન સતિબલં તદા સમુદાગતં. ઉદ્ધચ્ચે અકમ્પિયટ્ઠેન સમાધિબલં તદા સમુદાગતં. અવિજ્જાય અકમ્પિયટ્ઠેન પઞ્ઞાબલં તદા સમુદાગતં.

અધિમોક્ખટ્ઠેન સદ્ધિન્દ્રિયં તદા સમુદાગતં. પગ્ગહટ્ઠેન વીરિયિન્દ્રિયં તદા સમુદાગતં. ઉપટ્ઠાનટ્ઠેન સતિન્દ્રિયં તદા સમુદાગતં. અવિક્ખેપટ્ઠેન સમાધિન્દ્રિયં તદા સમુદાગતં. દસ્સનટ્ઠેન પઞ્ઞિન્દ્રિયં તદા સમુદાગતં.

આધિપતેય્યટ્ઠેન ઇન્દ્રિયા તદા સમુદાગતા. અકમ્પિયટ્ઠેન બલા તદા સમુદાગતા. નિય્યાનટ્ઠેન સમ્બોજ્ઝઙ્ગા તદા સમુદાગતા. હેતુટ્ઠેન મગ્ગો તદા સમુદાગતો. ઉપટ્ઠાનટ્ઠેન સતિપટ્ઠાના તદા સમુદાગતા. પદહનટ્ઠેન સમ્મપ્પધાના તદા સમુદાગતા. ઇજ્ઝનટ્ઠેન ઇદ્ધિપાદા તદા સમુદાગતા. તથટ્ઠેન સચ્ચા તદા સમુદાગતા. અવિક્ખેપટ્ઠેન સમથો તદા સમુદાગતો. અનુપસ્સનટ્ઠેન વિપસ્સના તદા સમુદાગતા. એકરસટ્ઠેન સમથવિપસ્સના તદા સમુદાગતા. અનતિવત્તનટ્ઠેન યુગનદ્ધં તદા સમુદાગતં. સંવરટ્ઠેન સીલવિસુદ્ધિ તદા સમુદાગતા. અવિક્ખેપટ્ઠેન ચિત્તવિસુદ્ધિ તદા સમુદાગતા. દસ્સનટ્ઠેન દિટ્ઠિવિસુદ્ધિ તદા સમુદાગતા. વિમુત્તટ્ઠેન વિમોક્ખો તદા સમુદાગતો. પટિવેધટ્ઠેન વિજ્જા તદા સમુદાગતા. પરિચ્ચાગટ્ઠેન વિમુત્તિ તદા સમુદાગતા. સમુચ્છેદટ્ઠેન ખયે ઞાણં તદા સમુદાગતં.

છન્દો મૂલટ્ઠેન તદા સમુદાગતો. મનસિકારો સમુટ્ઠાનટ્ઠેન તદા સમુદાગતો. ફસ્સો સમોધાનટ્ઠેન તદા સમુદાગતો. વેદના સમોસરણટ્ઠેન તદા સમુદાગતા. સમાધિ પમુખટ્ઠેન તદા સમુદાગતો. સતિ આધિપતેય્યટ્ઠેન તદા સમુદાગતા. પઞ્ઞા તદુત્તરટ્ઠેન તદા સમુદાગતા. વિમુત્તિ સારટ્ઠેન તદા સમુદાગતા. અમતોગધં નિબ્બાનં પરિયોસાનટ્ઠેન તદા સમુદાગતં. વુટ્ઠહિત્વા પચ્ચવેક્ખતિ, ઇમે ધમ્મા તદા સમુદાગતા.

સોતાપત્તિફલક્ખણે દસ્સનટ્ઠેન સમ્માદિટ્ઠિ તદા સમુદાગતા. અભિનિરોપનટ્ઠેન સમ્માસઙ્કપ્પો તદા સમુદાગતો…પે… પટિપ્પસ્સદ્ધટ્ઠેન અનુપ્પાદે ઞાણં તદા સમુદાગતં. છન્દો મૂલટ્ઠેન તદા સમુદાગતો. મનસિકારો સમુટ્ઠાનટ્ઠેન તદા સમુદાગતો. ફસ્સો સમોધાનટ્ઠેન તદા સમુદાગતો. વેદના સમોસરણટ્ઠેન તદા સમુદાગતા. સમાધિ પમુખટ્ઠેન તદા સમુદાગતો. સતિ આધિપતેય્યટ્ઠેન તદા સમુદાગતા. પઞ્ઞા તદુત્તરટ્ઠેન તદા સમુદાગતા. વિમુત્તિ સારટ્ઠેન તદા સમુદાગતા. અમતોગધં નિબ્બાનં પરિયોસાનટ્ઠેન તદા સમુદાગતં. વુટ્ઠહિત્વા પચ્ચવેક્ખતિ, ઇમે ધમ્મા તદા સમુદાગતા.

સકદાગામિમગ્ગક્ખણે…પે… સકદાગામિફલક્ખણે…પે… અનાગામિમગ્ગક્ખણે…પે… અનાગામિફલક્ખણે…પે… અરહત્તમગ્ગક્ખણે દસ્સનટ્ઠેન સમ્માદિટ્ઠિ તદા સમુદાગતા…પે… સમુચ્છેદટ્ઠેન ખયે ઞાણં તદા સમુદાગતં. છન્દો મૂલટ્ઠેન તદા સમુદાગતો…પે… અમતોગધં નિબ્બાનં પરિયોસાનટ્ઠેન તદા સમુદાગતં. વુટ્ઠહિત્વા પચ્ચવેક્ખતિ, ઇમે ધમ્મા તદા સમુદાગતા.

અરહત્તફલક્ખણે દસ્સનટ્ઠેન સમ્માદિટ્ઠિ તદા સમુદાગતા …પે… પટિપ્પસ્સદ્ધટ્ઠેન અનુપ્પાદે ઞાણં તદા સમુદાગતં. છન્દો મૂલટ્ઠેન તદા સમુદાગતો …પે… અમતોગધં નિબ્બાનં પરિયોસાનટ્ઠેન તદા સમુદાગતં. વુટ્ઠહિત્વા પચ્ચવેક્ખતિ, ઇમે ધમ્મા તદા સમુદાગતા. તં ઞાતટ્ઠેન ઞાણં, પજાનનટ્ઠેન પઞ્ઞા. તેન વુચ્ચતિ – ‘‘તદા સમુદાગતે ધમ્મે પસ્સને પઞ્ઞા પચ્ચવેક્ખણે ઞાણં’’.

પચ્ચવેક્ખણઞાણનિદ્દેસો ચુદ્દસમો.