૧૩. વિમુત્તિઞાણનિદ્દેસો

૬૪. કથં છિન્નવટુમાનુપસ્સને પઞ્ઞા વિમુત્તિઞાણં? સોતાપત્તિમગ્ગેન સક્કાયદિટ્ઠિ, વિચિકિચ્છા, સીલબ્બતપરામાસો, દિટ્ઠાનુસયો, વિચિકિચ્છાનુસયો અત્તનો ચિત્તસ્સ ઉપક્કિલેસા સમ્મા સમુચ્છિન્ના હોન્તિ. ઇમેહિ પઞ્ચહિ ઉપક્કિલેસેહિ સપરિયુટ્ઠાનેહિ ચિત્તં વિમુત્તં હોતિ સુવિમુત્તં. તંવિમુત્તિ ઞાતટ્ઠેન ઞાણં, પજાનનટ્ઠેન પઞ્ઞા. તેન વુચ્ચતિ – ‘‘છિન્નવટુમાનુપસ્સને પઞ્ઞા વિમુત્તિઞાણં’’.

સકદાગામિમગ્ગેન ઓળારિકં કામરાગસઞ્ઞોજનં, પટિઘસઞ્ઞોજનં, ઓળારિકો કામરાગાનુસયો, પટિઘાનુસયો – અત્તનો ચિત્તસ્સ ઉપક્કિલેસા સમ્મા સમુચ્છિન્ના હોન્તિ. ઇમેહિ ચતૂહિ ઉપક્કિલેસેહિ સપરિયુટ્ઠાનેહિ ચિત્તં વિમુત્તં હોતિ સુવિમુત્તં. તંવિમુત્તિ ઞાતટ્ઠેન ઞાણં, પજાનનટ્ઠેન પઞ્ઞા. તેન વુચ્ચતિ – ‘‘છિન્નવટુમાનુપસ્સને પઞ્ઞા વિમુત્તિઞાણં’’.

અનાગામિમગ્ગેન અનુસહગતં કામરાગસઞ્ઞોજનં, પટિઘસઞ્ઞોજનં, અનુસહગતો કામરાગાનુસયો, પટિઘાનુસયો – અત્તનો ચિત્તસ્સ ઉપક્કિલેસા સમ્મા સમુચ્છિન્ના હોન્તિ. ઇમેહિ ચતૂહિ ઉપક્કિલેસેહિ સપરિયુટ્ઠાનેહિ ચિત્તં વિમુત્તં હોતિ સુવિમુત્તં. તંવિમુત્તિ ઞાતટ્ઠેન ઞાણં, પજાનનટ્ઠેન પઞ્ઞા. તેન વુચ્ચતિ – ‘‘છિન્નવટુમાનુપસ્સને પઞ્ઞા વિમુત્તિઞાણં’’.

અરહત્તમગ્ગેન રૂપરાગો, અરૂપરાગો, માનો, ઉદ્ધચ્ચં, અવિજ્જા, માનાનુસયો, ભવરાગાનુસયો, અવિજ્જાનુસયો – અત્તનો ચિત્તસ્સ ઉપક્કિલેસા સમ્મા સમુચ્છિન્ના હોન્તિ. ઇમેહિ અટ્ઠહિ ઉપક્કિલેસેહિ સપરિયુટ્ઠાનેહિ ચિત્તં વિમુત્તં હોતિ સુવિમુત્તં. તંવિમુત્તિ ઞાતટ્ઠેન ઞાણં, પજાનનટ્ઠેન પઞ્ઞા. તેન વુચ્ચતિ – ‘‘છિન્નવટુમાનુપસ્સને પઞ્ઞા વિમુત્તિઞાણં’’. તં ઞાતટ્ઠેન ઞાણં, પજાનનટ્ઠેન પઞ્ઞા. તેન વુચ્ચતિ – ‘‘છિન્નવટુમાનુપસ્સને પઞ્ઞા વિમુત્તિઞાણં’’.

વિમુત્તિઞાણનિદ્દેસો તેરસમો.