૧૨. ફલઞાણનિદ્દેસો

૬૩. કથં પયોગપ્પટિપ્પસ્સદ્ધિપઞ્ઞા ફલે ઞાણં? સોતાપત્તિમગ્ગક્ખણે દસ્સનટ્ઠેન સમ્માદિટ્ઠિ મિચ્છાદિટ્ઠિયા વુટ્ઠાતિ, તદનુવત્તકકિલેસેહિ ચ ખન્ધેહિ ચ વુટ્ઠાતિ, બહિદ્ધા ચ સબ્બનિમિત્તેહિ વુટ્ઠાતિ. તંપયોગપ્પટિપ્પસ્સદ્ધત્તા ઉપ્પજ્જતિ સમ્માદિટ્ઠિ. મગ્ગસ્સેતં ફલં.

અભિનિરોપનટ્ઠેન સમ્માસઙ્કપ્પો મિચ્છાસઙ્કપ્પા વુટ્ઠાતિ તદનુવત્તકકિલેસેહિ ચ ખન્ધેહિ ચ વુટ્ઠાતિ, બહિદ્ધા ચ સબ્બનિમિત્તેહિ વુટ્ઠાતિ. તંપયોગપ્પટિપ્પસ્સદ્ધત્તા ઉપ્પજ્જતિ સમ્માસઙ્કપ્પો. મગ્ગસ્સેતં ફલં.

પરિગ્ગહટ્ઠેન સમ્માવાચા મિચ્છાવાચાય વુટ્ઠાતિ, તદનુવત્તકકિલેસેહિ ચ ખન્ધેહિ ચ વુટ્ઠાતિ, બહિદ્ધા ચ સબ્બનિમિત્તેહિ વુટ્ઠાતિ. તંપયોગપ્પટિપ્પસ્સદ્ધત્તા ઉપ્પજ્જતિ સમ્માવાચા. મગ્ગસ્સેતં ફલં.

સમુટ્ઠાનટ્ઠેન સમ્માકમ્મન્તો મિચ્છાકમ્મન્તા વુટ્ઠાતિ, તદનુવત્તકકિલેસેહિ ચ ખન્ધેહિ ચ વુટ્ઠાતિ, બહિદ્ધા ચ સબ્બનિમિત્તેહિ વુટ્ઠાતિ. તંપયોગપ્પટિપ્પસ્સદ્ધત્તા ઉપ્પજ્જતિ સમ્માકમ્મન્તો. મગ્ગસ્સેતં ફલં.

વોદાનટ્ઠેન સમ્માઆજીવો મિચ્છાઆજીવા વુટ્ઠાતિ, તદનુવત્તકકિલેસેહિ ચ ખન્ધેહિ ચ વુટ્ઠાતિ, બહિદ્ધા ચ સબ્બનિમિત્તેહિ વુટ્ઠાતિ. તંપયોગપ્પટિપ્પસ્સદ્ધત્તા ઉપ્પજ્જતિ સમ્માઆજીવો. મગ્ગસ્સેતં ફલં.

પગ્ગહટ્ઠેન સમ્માવાયામો મિચ્છાવાયામા વુટ્ઠાતિ, તદનુવત્તકકિલેસેહિ ચ ખન્ધેહિ ચ વુટ્ઠાતિ, બહિદ્ધા ચ સબ્બનિમિત્તેહિ વુટ્ઠાતિ. તંપયોગપ્પટિપ્પસ્સદ્ધત્તા ઉપ્પજ્જતિ સમ્માવાયામો. મગ્ગસ્સેતં ફલં.

ઉપટ્ઠાનટ્ઠેન સમ્માસતિ મિચ્છાસતિયા વુટ્ઠાતિ, તદનુવત્તકકિલેસેહિ ચ ખન્ધેહિ ચ વુટ્ઠાતિ, બહિદ્ધા ચ સબ્બનિમિત્તેહિ વુટ્ઠાતિ. તંપયોગપ્પટિપ્પસ્સદ્ધત્તા ઉપ્પજ્જતિ સમ્માસતિ. મગ્ગસ્સેતં ફલં.

અવિક્ખેપટ્ઠેન સમ્માસમાધિ મિચ્છાસમાધિતો વુટ્ઠાતિ, તદનુવત્તકકિલેસેહિ ચ ખન્ધેહિ ચ વુટ્ઠાતિ, બહિદ્ધા ચ સબ્બનિમિત્તેહિ વુટ્ઠાતિ. તંપયોગપ્પટિપ્પસ્સદ્ધત્તા ઉપ્પજ્જતિ સમ્માસમાધિ. મગ્ગસ્સેતં ફલં.

સકદાગામિમગ્ગક્ખણે દસ્સનટ્ઠેન સમ્માદિટ્ઠિ…પે… અવિક્ખેપટ્ઠેન સમ્માસમાધિ ઓળારિકા કામરાગસઞ્ઞોજના પટિઘસઞ્ઞોજના ઓળારિકા કામરાગાનુસયા પટિઘાનુસયા વુટ્ઠાતિ, તદનુવત્તકકિલેસેહિ ચ ખન્ધેહિ ચ વુટ્ઠાતિ, બહિદ્ધા ચ સબ્બનિમિત્તેહિ વુટ્ઠાતિ. તંપયોગપ્પટિપ્પસ્સદ્ધત્તા ઉપ્પજ્જતિ સમ્માસમાધિ. મગ્ગસ્સેતં ફલં.

અનાગામિમગ્ગક્ખણે દસ્સનટ્ઠેન સમ્માદિટ્ઠિ…પે… અવિક્ખેપટ્ઠેન સમ્માસમાધિ અનુસહગતા કામરાગસઞ્ઞોજના પટિઘસઞ્ઞોજના અનુસહગતા કામરાગાનુસયા પટિઘાનુસયા વુટ્ઠાતિ, તદનુવત્તકકિલેસેહિ ચ ખન્ધેહિ ચ વુટ્ઠાતિ, બહિદ્ધા ચ સબ્બનિમિત્તેહિ વુટ્ઠાતિ. તંપયોગપ્પટિપ્પસ્સદ્ધત્તા ઉપ્પજ્જતિ સમ્માસમાધિ. મગ્ગસ્સેતં ફલં.

અરહત્તમગ્ગક્ખણે દસ્સનટ્ઠેન સમ્માદિટ્ઠિ…પે… અવિક્ખેપટ્ઠેન સમ્માસમાધિ રૂપરાગા અરૂપરાગા માના ઉદ્ધચ્ચા અવિજ્જાય માનાનુસયા ભવરાગાનુસયા અવિજ્જાનુસયા વુટ્ઠાતિ, તદનુવત્તકકિલેસેહિ ચ ખન્ધેહિ ચ વુટ્ઠાતિ, બહિદ્ધા ચ સબ્બનિમિત્તેહિ વુટ્ઠાતિ. તંપયોગપ્પટિપ્પસ્સદ્ધત્તા ઉપ્પજ્જતિ સમ્માસમાધિ. મગ્ગસ્સેતં ફલં. તં ઞાતટ્ઠેન ઞાણં, પજાનનટ્ઠેન પઞ્ઞા. તેન વુચ્ચતિ – ‘‘પયોગપ્પટિપ્પસ્સદ્ધિપઞ્ઞા ફલે ઞાણં’’.

ફલઞાણનિદ્દેસો દ્વાદસમો.