૧૪. અધિટ્ઠાનહારસમ્પાતો

૭૬. તત્થ કતમો અધિટ્ઠાનો હારસમ્પાતો?

તસ્મા રક્ખિતચિત્તસ્સ, સમ્માસઙ્કપ્પગોચરોતિ ગાથા. તસ્મા રક્ખિતચિત્તસ્સાતિ એકત્તતા. ચિત્તં મનો વિઞ્ઞાણં, અયં વેમત્તતા. સમ્માસઙ્કપ્પગોચરોતિ એકત્તતા. નેક્ખમ્મસઙ્કપ્પો અબ્યાપાદસઙ્કપ્પો અવિહિંસાસઙ્કપ્પો અયં વેમત્તતા. સમ્માદિટ્ઠિપુરેક્ખારોતિ એકત્તતા. સમ્માદિટ્ઠિ નામ યં દુક્ખે ઞાણં દુક્ખસમુદયે ઞાણં દુક્ખનિરોધે ઞાણં દુક્ખનિરોધગામિનિયા પટિપદાય ઞાણં મગ્ગે ઞાણં હેતુમ્હિ ઞાણં હેતુસમુપ્પન્નેસુ ધમ્મેસુ ઞાણં પચ્ચયે ઞાણં પચ્ચયસમુપ્પન્નેસુ ધમ્મેસુ ઞાણં, યં તત્થ તત્થ યથાભૂતં ઞાણદસ્સનં અભિસમયો સમ્પટિવેધો સચ્ચાગમનં, અયં વેમત્તતા. ઞત્વાન ઉદયબ્બયન્તિ એકત્તતા, ઉદયેન અવિજ્જાપચ્ચયા સઙ્ખારા, સઙ્ખારપચ્ચયા વિઞ્ઞાણં, એવં સબ્બં સમુદયો ભવતિ. વયેન અવિજ્જાનિરોધા સઙ્ખારનિરોધો, એવં સબ્બં નિરોધો હોતિ, અયં વેમત્તતા. થિનમિદ્ધાભિભૂ ભિક્ખૂતિ એકત્તતા, થિનં નામ યા ચિત્તસ્સ અકલ્લતા અકમ્મનિયતા, મિદ્ધં નામ યં કાયસ્સ લીનત્તં, અયં વેમત્તતા. સબ્બા દુગ્ગતિયો જહેતિ એકત્તતા, દેવમનુસ્સે વા ઉપનિધાય અપાયા દુગ્ગતિ, નિબ્બાનં વા ઉપનિધાય સબ્બા ઉપપત્તિયો દુગ્ગતિ, અયં વેમત્તતા.

નિયુત્તો અધિટ્ઠાનો હારસમ્પાતો.