૧૪. પોસાલમાણવપુચ્છા

૧૩૭. ‘‘યો અતીતં આદિસતિ, [ઇચ્ચાયસ્મા પોસાલો]

અનેજો છિન્નસંસયો;

પારગું સબ્બધમ્માનં, અત્થિ પઞ્હેન આગમં.

૧૩૮. ‘‘વિભૂતરૂપસઞ્ઞિસ્સ, સબ્બકાયપ્પહાયિનો;

અજ્ઝત્તઞ્ચ બહિદ્ધા ચ, નત્થિ કિઞ્ચીતિ પસ્સતો;

ઞાણં સક્કાનુપુચ્છામિ, કથં નેય્યો તથાવિધો’’.

૧૩૯. ‘‘વિઞ્ઞાણટ્ઠિતિયો સબ્બા, [પોસાલાતિ ભગવા]

અભિજાનં તથાગતો;

તિટ્ઠન્તમેનં જાનાતિ, વિમુત્તં તપ્પરાયણં.

૧૪૦. ‘‘આકિઞ્ચઞ્ઞસમ્ભવં ઞત્વા, નન્દી સંયોજનં ઇતિ;

એવમેતં અભિઞ્ઞાય, તતો તત્થ વિપસ્સતિ;

એતં [એવં (સ્યા. ક.)] ઞાણં તથં તસ્સ, બ્રાહ્મણસ્સ વુસીમતો’’તિ.

પોસાલમાણવપુચ્છા ચુદ્દસમા.